ମଦନାତୁରଚେତସୋଽନ୍ଵହଂ ଭଵଦଂଘ୍ରିଦ୍ଵୟଦାସ୍ୟକାମ୍ୟୟା ।
ୟମୁନାତଟସୀମ୍ନି ସୈକତୀଂ ତରଲାକ୍ଷ୍ୟୋ ଗିରିଜାଂ ସମାର୍ଚିଚନ୍ ॥1॥
ତଵ ନାମକଥାରତାଃ ସମଂ ସୁଦୃଶଃ ପ୍ରାତରୁପାଗତା ନଦୀମ୍ ।
ଉପହାରଶତୈରପୂଜୟନ୍ ଦୟିତୋ ନଂଦସୁତୋ ଭଵେଦିତି ॥2॥
ଇତି ମାସମୁପାହିତଵ୍ରତାସ୍ତରଲାକ୍ଷୀରଭିଵୀକ୍ଷ୍ୟ ତା ଭଵାନ୍ ।
କରୁଣାମୃଦୁଲୋ ନଦୀତଟଂ ସମୟାସୀତ୍ତଦନୁଗ୍ରହେଚ୍ଛୟା ॥3॥
ନିୟମାଵସିତୌ ନିଜାଂବରଂ ତଟସୀମନ୍ୟଵମୁଚ୍ୟ ତାସ୍ତଦା ।
ୟମୁନାଜଲଖେଲନାକୁଲାଃ ପୁରତସ୍ତ୍ଵାମଵଲୋକ୍ୟ ଲଜ୍ଜିତାଃ ॥4॥
ତ୍ରପୟା ନମିତାନନାସ୍ଵଥୋ ଵନିତାସ୍ଵଂବରଜାଲମଂତିକେ ।
ନିହିତଂ ପରିଗୃହ୍ୟ ଭୂରୁହୋ ଵିଟପଂ ତ୍ଵଂ ତରସାଽଧିରୂଢଵାନ୍ ॥5॥
ଇହ ତାଵଦୁପେତ୍ୟ ନୀୟତାଂ ଵସନଂ ଵଃ ସୁଦୃଶୋ ୟଥାୟଥମ୍ ।
ଇତି ନର୍ମମୃଦୁସ୍ମିତେ ତ୍ଵୟି ବ୍ରୁଵତି ଵ୍ୟାମୁମୁହେ ଵଧୂଜନୈଃ ॥6॥
ଅୟି ଜୀଵ ଚିରଂ କିଶୋର ନସ୍ତଵ ଦାସୀରଵଶୀକରୋଷି କିମ୍ ।
ପ୍ରଦିଶାଂବରମଂବୁଜେକ୍ଷଣେତ୍ୟୁଦିତସ୍ତ୍ଵଂ ସ୍ମିତମେଵ ଦତ୍ତଵାନ୍ ॥7॥
ଅଧିରୁହ୍ୟ ତଟଂ କୃତାଂଜଲୀଃ ପରିଶୁଦ୍ଧାଃ ସ୍ଵଗତୀର୍ନିରୀକ୍ଷ୍ୟ ତାଃ ।
ଵସନାନ୍ୟଖିଲାନ୍ୟନୁଗ୍ରହଂ ପୁନରେଵଂ ଗିରମପ୍ୟଦା ମୁଦା ॥8॥
ଵିଦିତଂ ନନୁ ଵୋ ମନୀଷିତଂ ଵଦିତାରସ୍ତ୍ଵିହ ୟୋଗ୍ୟମୁତ୍ତରମ୍ ।
ୟମୁନାପୁଲିନେ ସଚଂଦ୍ରିକାଃ କ୍ଷଣଦା ଇତ୍ୟବଲାସ୍ତ୍ଵମୂଚିଵାନ୍ ॥9॥
ଉପକର୍ଣ୍ୟ ଭଵନ୍ମୁଖଚ୍ୟୁତଂ ମଧୁନିଷ୍ୟଂଦି ଵଚୋ ମୃଗୀଦୃଶଃ ।
ପ୍ରଣୟାଦୟି ଵୀକ୍ଷ୍ୟ ଵୀକ୍ଷ୍ୟ ତେ ଵଦନାବ୍ଜଂ ଶନକୈର୍ଗୃହଂ ଗତାଃ ॥10॥
ଇତି ନନ୍ଵନୁଗୃହ୍ୟ ଵଲ୍ଲଵୀର୍ଵିପିନାଂତେଷୁ ପୁରେଵ ସଂଚରନ୍ ।
କରୁଣାଶିଶିରୋ ହରେ ହର ତ୍ଵରୟା ମେ ସକଲାମୟାଵଲିମ୍ ॥11॥