ତତଶ୍ଚ ଵୃଂଦାଵନତୋଽତିଦୂରତୋ
ଵନଂ ଗତସ୍ତ୍ଵଂ ଖଲୁ ଗୋପଗୋକୁଲୈଃ ।
ହୃଦଂତରେ ଭକ୍ତତରଦ୍ଵିଜାଂଗନା-
କଦଂବକାନୁଗ୍ରହଣାଗ୍ରହଂ ଵହନ୍ ॥1॥
ତତୋ ନିରୀକ୍ଷ୍ୟାଶରଣେ ଵନାଂତରେ
କିଶୋରଲୋକଂ କ୍ଷୁଧିତଂ ତୃଷାକୁଲମ୍ ।
ଅଦୂରତୋ ୟଜ୍ଞପରାନ୍ ଦ୍ଵିଜାନ୍ ପ୍ରତି
ଵ୍ୟସର୍ଜୟୋ ଦୀଦିଵିୟାଚନାୟ ତାନ୍ ॥2॥
ଗତେଷ୍ଵଥୋ ତେଷ୍ଵଭିଧାୟ ତେଽଭିଧାଂ
କୁମାରକେଷ୍ଵୋଦନୟାଚିଷୁ ପ୍ରଭୋ ।
ଶ୍ରୁତିସ୍ଥିରା ଅପ୍ୟଭିନିନ୍ୟୁରଶ୍ରୁତିଂ
ନ କିଂଚିଦୂଚୁଶ୍ଚ ମହୀସୁରୋତ୍ତମାଃ ॥3॥
ଅନାଦରାତ୍ ଖିନ୍ନଧିୟୋ ହି ବାଲକାଃ ।
ସମାୟୟୁର୍ୟୁକ୍ତମିଦଂ ହି ୟଜ୍ଵସୁ ।
ଚିରାଦଭକ୍ତାଃ ଖଲୁ ତେ ମହୀସୁରାଃ
କଥଂ ହି ଭକ୍ତଂ ତ୍ଵୟି ତୈଃ ସମର୍ପ୍ୟତେ ॥4॥
ନିଵେଦୟଧ୍ଵଂ ଗୃହିଣୀଜନାୟ ମାଂ
ଦିଶେୟୁରନ୍ନଂ କରୁଣାକୁଲା ଇମାଃ ।
ଇତି ସ୍ମିତାର୍ଦ୍ରଂ ଭଵତେରିତା ଗତା-
ସ୍ତେ ଦାରକା ଦାରଜନଂ ୟୟାଚିରେ ॥5॥
ଗୃହୀତନାମ୍ନି ତ୍ଵୟି ସଂଭ୍ରମାକୁଲା-
ଶ୍ଚତୁର୍ଵିଧଂ ଭୋଜ୍ୟରସଂ ପ୍ରଗୃହ୍ୟ ତାଃ ।
ଚିରଂଧୃତତ୍ଵତ୍ପ୍ରଵିଲୋକନାଗ୍ରହାଃ
ସ୍ଵକୈର୍ନିରୁଦ୍ଧା ଅପି ତୂର୍ଣମାୟୟୁଃ ॥6॥
ଵିଲୋଲପିଂଛଂ ଚିକୁରେ କପୋଲୟୋଃ
ସମୁଲ୍ଲସତ୍କୁଂଡଲମାର୍ଦ୍ରମୀକ୍ଷିତେ ।
ନିଧାୟ ବାହୁଂ ସୁହୃଦଂସସୀମନି
ସ୍ଥିତଂ ଭଵଂତଂ ସମଲୋକୟଂତ ତାଃ ॥7॥
ତଦା ଚ କାଚିତ୍ତ୍ଵଦୁପାଗମୋଦ୍ୟତା
ଗୃହୀତହସ୍ତା ଦୟିତେନ ୟଜ୍ଵନା ।
ତଦୈଵ ସଂଚିଂତ୍ୟ ଭଵଂତମଂଜସା
ଵିଵେଶ କୈଵଲ୍ୟମହୋ କୃତିନ୍ୟସୌ ॥8॥
ଆଦାୟ ଭୋଜ୍ୟାନ୍ୟନୁଗୃହ୍ୟ ତାଃ ପୁନ-
ସ୍ତ୍ଵଦଂଗସଂଗସ୍ପୃହୟୋଜ୍ଝତୀର୍ଗୃହମ୍ ।
ଵିଲୋକ୍ୟ ୟଜ୍ଞାୟ ଵିସର୍ଜୟନ୍ନିମା-
ଶ୍ଚକର୍ଥ ଭର୍ତୃନପି ତାସ୍ଵଗର୍ହଣାନ୍ ॥9॥
ନିରୂପ୍ୟ ଦୋଷଂ ନିଜମଂଗନାଜନେ
ଵିଲୋକ୍ୟ ଭକ୍ତିଂ ଚ ପୁନର୍ଵିଚାରିଭିଃ
ପ୍ରବୁଦ୍ଧତତ୍ତ୍ଵୈସ୍ତ୍ଵମଭିଷ୍ଟୁତୋ ଦ୍ଵିଜୈ-
ର୍ମରୁତ୍ପୁରାଧୀଶ ନିରୁଂଧି ମେ ଗଦାନ୍ ॥10॥