ଦଦୃଶିରେ କିଲ ତତ୍କ୍ଷଣମକ୍ଷତ-
ସ୍ତନିତଜୃଂଭିତକଂପିତଦିକ୍ତଟାଃ ।
ସୁଷମୟା ଭଵଦଂଗତୁଲାଂ ଗତା
ଵ୍ରଜପଦୋପରି ଵାରିଧରାସ୍ତ୍ଵୟା ॥1॥
ଵିପୁଲକରକମିଶ୍ରୈସ୍ତୋୟଧାରାନିପାତୈ-
ର୍ଦିଶିଦିଶି ପଶୁପାନାଂ ମଂଡଲେ ଦଂଡ୍ୟମାନେ ।
କୁପିତହରିକୃତାନ୍ନଃ ପାହି ପାହୀତି ତେଷାଂ
ଵଚନମଜିତ ଶ୍ରୃଣ୍ଵନ୍ ମା ବିଭୀତେତ୍ୟଭାଣୀଃ ॥2॥
କୁଲ ଇହ ଖଲୁ ଗୋତ୍ରୋ ଦୈଵତଂ ଗୋତ୍ରଶତ୍ରୋ-
ର୍ଵିହତିମିହ ସ ରୁଂଧ୍ୟାତ୍ କୋ ନୁ ଵଃ ସଂଶୟୋଽସ୍ମିନ୍ ।
ଇତି ସହସିତଵାଦୀ ଦେଵ ଗୋଵର୍ଦ୍ଧନାଦ୍ରିଂ
ତ୍ଵରିତମୁଦମୁମୂଲୋ ମୂଲତୋ ବାଲଦୋର୍ଭ୍ୟାମ୍ ॥3॥
ତଦନୁ ଗିରିଵରସ୍ୟ ପ୍ରୋଦ୍ଧୃତସ୍ୟାସ୍ୟ ତାଵତ୍
ସିକତିଲମୃଦୁଦେଶେ ଦୂରତୋ ଵାରିତାପେ ।
ପରିକରପରିମିଶ୍ରାନ୍ ଧେନୁଗୋପାନଧସ୍ତା-
ଦୁପନିଦଧଦଧତ୍ଥା ହସ୍ତପଦ୍ମେନ ଶୈଲମ୍ ॥4॥
ଭଵତି ଵିଧୃତଶୈଲେ ବାଲିକାଭିର୍ଵୟସ୍ୟୈ-
ରପି ଵିହିତଵିଲାସଂ କେଲିଲାପାଦିଲୋଲେ ।
ସଵିଧମିଲିତଧେନୂରେକହସ୍ତେନ କଂଡୂ-
ୟତି ସତି ପଶୁପାଲାସ୍ତୋଷମୈଷଂତ ସର୍ଵେ ॥5॥
ଅତିମହାନ୍ ଗିରିରେଷ ତୁ ଵାମକେ
କରସରୋରୁହି ତଂ ଧରତେ ଚିରମ୍ ।
କିମିଦମଦ୍ଭୁତମଦ୍ରିବଲଂ ନ୍ଵିତି
ତ୍ଵଦଵଲୋକିଭିରାକଥି ଗୋପକୈଃ ॥6॥
ଅହହ ଧାର୍ଷ୍ଟ୍ୟମମୁଷ୍ୟ ଵଟୋର୍ଗିରିଂ
ଵ୍ୟଥିତବାହୁରସାଵଵରୋପୟେତ୍ ।
ଇତି ହରିସ୍ତ୍ଵୟି ବଦ୍ଧଵିଗର୍ହଣୋ
ଦିଵସସପ୍ତକମୁଗ୍ରମଵର୍ଷୟତ୍ ॥7॥
ଅଚଲତି ତ୍ଵୟି ଦେଵ ପଦାତ୍ ପଦଂ
ଗଲିତସର୍ଵଜଲେ ଚ ଘନୋତ୍କରେ ।
ଅପହୃତେ ମରୁତା ମରୁତାଂ ପତି-
ସ୍ତ୍ଵଦଭିଶଂକିତଧୀଃ ସମୁପାଦ୍ରଵତ୍ ॥8॥
ଶମମୁପେୟୁଷି ଵର୍ଷଭରେ ତଦା
ପଶୁପଧେନୁକୁଲେ ଚ ଵିନିର୍ଗତେ ।
ଭୁଵି ଵିଭୋ ସମୁପାହିତଭୂଧରଃ
ପ୍ରମୁଦିତୈଃ ପଶୁପୈଃ ପରିରେଭିଷେ ॥9॥
ଧରଣିମେଵ ପୁରା ଧୃତଵାନସି
କ୍ଷିତିଧରୋଦ୍ଧରଣେ ତଵ କଃ ଶ୍ରମଃ ।
ଇତି ନୁତସ୍ତ୍ରିଦଶୈଃ କମଲାପତେ
ଗୁରୁପୁରାଲୟ ପାଲୟ ମାଂ ଗଦାତ୍ ॥10॥