ୟତ୍ନେଷୁ ସର୍ଵେଷ୍ଵପି ନାଵକେଶୀ କେଶୀ ସ ଭୋଜେଶିତୁରିଷ୍ଟବଂଧୁଃ ।
ତ୍ଵାଂ ସିଂଧୁଜାଵାପ୍ୟ ଇତୀଵ ମତ୍ଵା ସଂପ୍ରାପ୍ତଵାନ୍ ସିଂଧୁଜଵାଜିରୂପଃ ॥1॥
ଗଂଧର୍ଵତାମେଷ ଗତୋଽପି ରୂକ୍ଷୈର୍ନାଦୈଃ ସମୁଦ୍ଵେଜିତସର୍ଵଲୋକଃ ।
ଭଵଦ୍ଵିଲୋକାଵଧି ଗୋପଵାଟୀଂ ପ୍ରମର୍ଦ୍ୟ ପାପଃ ପୁନରାପତତ୍ତ୍ଵାମ୍ ॥2॥
ତାର୍କ୍ଷ୍ୟାର୍ପିତାଂଘ୍ରେସ୍ତଵ ତାର୍କ୍ଷ୍ୟ ଏଷ ଚିକ୍ଷେପ ଵକ୍ଷୋଭୁଵି ନାମ ପାଦମ୍ ।
ଭୃଗୋଃ ପଦାଘାତକଥାଂ ନିଶମ୍ୟ ସ୍ଵେନାପି ଶକ୍ୟଂ ତଦିତୀଵ ମୋହାତ୍ ॥3॥
ପ୍ରଵଂଚୟନ୍ନସ୍ୟ ଖୁରାଂଚଲଂ ଦ୍ରାଗମୁଂଚ ଚିକ୍ଷେପିଥ ଦୂରଦୂରମ୍
ସମ୍ମୂର୍ଚ୍ଛିତୋଽପି ହ୍ୟତିମୂର୍ଚ୍ଛିତେନ କ୍ରୋଧୋଷ୍ମଣା ଖାଦିତୁମାଦ୍ରୁତସ୍ତ୍ଵାମ୍ ॥4॥
ତ୍ଵଂ ଵାହଦଂଡେ କୃତଧୀଶ୍ଚ ଵାହାଦଂଡଂ ନ୍ୟଧାସ୍ତସ୍ୟ ମୁଖେ ତଦାନୀମ୍ ।
ତଦ୍ ଵୃଦ୍ଧିରୁଦ୍ଧଶ୍ଵସନୋ ଗତାସୁଃ ସପ୍ତୀଭଵନ୍ନପ୍ୟୟମୈକ୍ୟମାଗାତ୍ ॥5॥
ଆଲଂଭମାତ୍ରେଣ ପଶୋଃ ସୁରାଣାଂ ପ୍ରସାଦକେ ନୂତ୍ନ ଇଵାଶ୍ଵମେଧେ ।
କୃତେ ତ୍ଵୟା ହର୍ଷଵଶାତ୍ ସୁରେଂଦ୍ରାସ୍ତ୍ଵାଂ ତୁଷ୍ଟୁଵୁଃ କେଶଵନାମଧେୟମ୍ ॥6॥
କଂସାୟ ତେ ଶୌରିସୁତତ୍ଵମୁକ୍ତ୍ଵା ତଂ ତଦ୍ଵଧୋତ୍କଂ ପ୍ରତିରୁଧ୍ୟ ଵାଚା।
ପ୍ରାପ୍ତେନ କେଶିକ୍ଷପଣାଵସାନେ ଶ୍ରୀନାରଦେନ ତ୍ଵମଭିଷ୍ଟୁତୋଽଭୂଃ ॥7॥
କଦାପି ଗୋପୈଃ ସହ କାନନାଂତେ ନିଲାୟନକ୍ରୀଡନଲୋଲୁପଂ ତ୍ଵାମ୍ ।
ମୟାତ୍ମଜଃ ପ୍ରାପ ଦୁରଂତମାୟୋ ଵ୍ୟୋମାଭିଧୋ ଵ୍ୟୋମଚରୋପରୋଧୀ ॥8॥
ସ ଚୋରପାଲାୟିତଵଲ୍ଲଵେଷୁ ଚୋରାୟିତୋ ଗୋପଶିଶୂନ୍ ପଶୂଂଶ୍ଚ
ଗୁହାସୁ କୃତ୍ଵା ପିଦଧେ ଶିଲାଭିସ୍ତ୍ଵୟା ଚ ବୁଦ୍ଧ୍ଵା ପରିମର୍ଦିତୋଽଭୂତ୍ ॥9॥
ଏଵଂ ଵିଧୈଶ୍ଚାଦ୍ଭୁତକେଲିଭେଦୈରାନଂଦମୂର୍ଚ୍ଛାମତୁଲାଂ ଵ୍ରଜସ୍ୟ ।
ପଦେ ପଦେ ନୂତନୟନ୍ନସୀମାଂ ପରାତ୍ମରୂପିନ୍ ପଵନେଶ ପାୟାଃ ॥10॥