ପ୍ରାତଃ ସଂତ୍ରସ୍ତଭୋଜକ୍ଷିତିପତିଵଚସା ପ୍ରସ୍ତୁତେ ମଲ୍ଲତୂର୍ୟେ
ସଂଘେ ରାଜ୍ଞାଂ ଚ ମଂଚାନଭିୟୟୁଷି ଗତେ ନଂଦଗୋପେଽପି ହର୍ମ୍ୟମ୍ ।
କଂସେ ସୌଧାଧିରୂଢେ ତ୍ଵମପି ସହବଲଃ ସାନୁଗଶ୍ଚାରୁଵେଷୋ
ରଂଗଦ୍ଵାରଂ ଗତୋଽଭୂଃ କୁପିତକୁଵଲୟାପୀଡନାଗାଵଲୀଢମ୍ ॥1॥
ପାପିଷ୍ଠାପେହି ମାର୍ଗାଦ୍ଦ୍ରୁତମିତି ଵଚସା ନିଷ୍ଠୁରକ୍ରୁଦ୍ଧବୁଦ୍ଧେ-
ରଂବଷ୍ଠସ୍ୟ ପ୍ରଣୋଦାଦଧିକଜଵଜୁଷା ହସ୍ତିନା ଗୃହ୍ୟମାଣଃ ।
କେଲୀମୁକ୍ତୋଽଥ ଗୋପୀକୁଚକଲଶଚିରସ୍ପର୍ଧିନଂ କୁଂଭମସ୍ୟ
ଵ୍ୟାହତ୍ୟାଲୀୟଥାସ୍ତ୍ଵଂ ଚରଣଭୁଵି ପୁନର୍ନିର୍ଗତୋ ଵଲ୍ଗୁହାସୀ ॥2॥
ହସ୍ତପ୍ରାପ୍ୟୋଽପ୍ୟଗମ୍ୟୋ ଝଟିତି ମୁନିଜନସ୍ୟେଵ ଧାଵନ୍ ଗଜେଂଦ୍ରଂ
କ୍ରୀଡନ୍ନାପାତ୍ୟ ଭୂମୌ ପୁନରଭିପତତସ୍ତସ୍ୟ ଦଂତଂ ସଜୀଵମ୍ ।
ମୂଲାଦୁନ୍ମୂଲ୍ୟ ତନ୍ମୂଲଗମହିତମହାମୌକ୍ତିକାନ୍ୟାତ୍ମମିତ୍ରେ
ପ୍ରାଦାସ୍ତ୍ଵଂ ହାରମେଭିର୍ଲଲିତଵିରଚିତଂ ରାଧିକାୟୈ ଦିଶେତି ॥3॥
ଗୃହ୍ଣାନଂ ଦଂତମଂସେ ୟୁତମଥ ହଲିନା ରଂଗମଂଗାଵିଶଂତଂ
ତ୍ଵାଂ ମଂଗଲ୍ୟାଂଗଭଂଗୀରଭସହୃତମନୋଲୋଚନା ଵୀକ୍ଷ୍ୟ ଲୋକାଃ ।
ହଂହୋ ଧନ୍ୟୋ ହି ନଂଦୋ ନହି ନହି ପଶୁପାଲାଂଗନା ନୋ ୟଶୋଦା
ନୋ ନୋ ଧନ୍ୟେକ୍ଷଣାଃ ସ୍ମସ୍ତ୍ରିଜଗତି ଵୟମେଵେତି ସର୍ଵେ ଶଶଂସୁଃ ॥4॥
ପୂର୍ଣଂ ବ୍ରହ୍ମୈଵ ସାକ୍ଷାନ୍ନିରଵଧି ପରମାନଂଦସାଂଦ୍ରପ୍ରକାଶଂ
ଗୋପେଶୁ ତ୍ଵଂ ଵ୍ୟଲାସୀର୍ନ ଖଲୁ ବହୁଜନୈସ୍ତାଵଦାଵେଦିତୋଽଭୂଃ ।
ଦୃଷ୍ଟ୍ଵାଽଥ ତ୍ଵାଂ ତଦେଦଂପ୍ରଥମମୁପଗତେ ପୁଣ୍ୟକାଲେ ଜନୌଘାଃ
ପୂର୍ଣାନଂଦା ଵିପାପାଃ ସରସମଭିଜଗୁସ୍ତ୍ଵତ୍କୃତାନି ସ୍ମୃତାନି ॥5॥
ଚାଣୂରୋ ମଲ୍ଲଵୀରସ୍ତଦନୁ ନୃପଗିରା ମୁଷ୍ଟିକୋ ମୁଷ୍ଟିଶାଲୀ
ତ୍ଵାଂ ରାମଂ ଚାଭିପେଦେ ଝଟଝଟିତି ମିଥୋ ମୁଷ୍ଟିପାତାତିରୂକ୍ଷମ୍ ।
ଉତ୍ପାତାପାତନାକର୍ଷଣଵିଵିଧରଣାନ୍ୟାସତାଂ ତତ୍ର ଚିତ୍ରଂ
ମୃତ୍ୟୋଃ ପ୍ରାଗେଵ ମଲ୍ଲପ୍ରଭୁରଗମଦୟଂ ଭୂରିଶୋ ବଂଧମୋକ୍ଷାନ୍ ॥6॥
ହା ଧିକ୍ କଷ୍ଟଂ କୁମାରୌ ସୁଲଲିତଵପୁଷୌ ମଲ୍ଲଵୀରୌ କଠୋରୌ
ନ ଦ୍ରକ୍ଷ୍ୟାମୋ ଵ୍ରଜାମସ୍ତ୍ଵରିତମିତି ଜନେ ଭାଷମାଣେ ତଦାନୀମ୍ ।
ଚାଣୂରଂ ତଂ କରୋଦ୍ଭ୍ରାମଣଵିଗଲଦସୁଂ ପୋଥୟାମାସିଥୋର୍ଵ୍ୟାଂ
ପିଷ୍ଟୋଽଭୂନ୍ମୁଷ୍ଟିକୋଽପି ଦ୍ରୁତମଥ ହଲିନା ନଷ୍ଟଶିଷ୍ଟୈର୍ଦଧାଵେ ॥7॥
କଂସ ସଂଵାର୍ୟ ତୂର୍ୟଂ ଖଲମତିରଵିଦନ୍ କାର୍ୟମାର୍ୟାନ୍ ପିତୃଂସ୍ତା-
ନାହଂତୁଂ ଵ୍ୟାପ୍ତମୂର୍ତେସ୍ତଵ ଚ ସମଶିଷଦ୍ଦୂରମୁତ୍ସାରଣାୟ ।
ରୁଷ୍ଟୋ ଦୁଷ୍ଟୋକ୍ତିଭିସ୍ତ୍ଵଂ ଗରୁଡ ଇଵ ଗିରିଂ ମଂଚମଂଚନ୍ନୁଦଂଚତ୍-
ଖଡ୍ଗଵ୍ୟାଵଲ୍ଗଦୁସ୍ସଂଗ୍ରହମପି ଚ ହଠାତ୍ ପ୍ରାଗ୍ରହୀରୌଗ୍ରସେନିମ୍ ॥8॥
ସଦ୍ୟୋ ନିଷ୍ପିଷ୍ଟସଂଧିଂ ଭୁଵି ନରପତିମାପାତ୍ୟ ତସ୍ୟୋପରିଷ୍ଟା-
ତ୍ତ୍ଵୟ୍ୟାପାତ୍ୟେ ତଦୈଵ ତ୍ଵଦୁପରି ପତିତା ନାକିନାଂ ପୁଷ୍ପଵୃଷ୍ଟିଃ ।
କିଂ କିଂ ବ୍ରୂମସ୍ତଦାନୀଂ ସତତମପି ଭିୟା ତ୍ଵଦ୍ଗତାତ୍ମା ସ ଭେଜେ
ସାୟୁଜ୍ୟଂ ତ୍ଵଦ୍ଵଧୋତ୍ଥା ପରମ ପରମିୟଂ ଵାସନା କାଲନେମେଃ ॥9॥
ତଦ୍ଭ୍ରାତୃନଷ୍ଟ ପିଷ୍ଟ୍ଵା ଦ୍ରୁତମଥ ପିତରୌ ସନ୍ନମନ୍ନୁଗ୍ରସେନଂ
କୃତ୍ଵା ରାଜାନମୁଚ୍ଚୈର୍ୟଦୁକୁଲମଖିଲଂ ମୋଦୟନ୍ କାମଦାନୈଃ ।
ଭକ୍ତାନାମୁତ୍ତମଂ ଚୋଦ୍ଧଵମମରଗୁରୋରାପ୍ତନୀତିଂ ସଖାୟଂ
ଲବ୍ଧ୍ଵା ତୁଷ୍ଟୋ ନଗର୍ୟାଂ ପଵନପୁରପତେ ରୁଂଧି ମେ ସର୍ଵରୋଗାନ୍ ॥10॥