ତ୍ରିଦିଵଵର୍ଧକିଵର୍ଧିତକୌଶଲଂ ତ୍ରିଦଶଦତ୍ତସମସ୍ତଵିଭୂତିମତ୍ ।
ଜଲଧିମଧ୍ୟଗତଂ ତ୍ଵମଭୂଷୟୋ ନଵପୁରଂ ଵପୁରଂଚିତରୋଚିଷା ॥1॥
ଦଦୁଷି ରେଵତଭୂଭୃତି ରେଵତୀଂ ହଲଭୃତେ ତନୟାଂ ଵିଧିଶାସନାତ୍ ।
ମହିତମୁତ୍ସଵଘୋଷମପୂପୁଷଃ ସମୁଦିତୈର୍ମୁଦିତୈଃ ସହ ୟାଦଵୈଃ ॥2॥
ଅଥ ଵିଦର୍ଭସୁତାଂ ଖଲୁ ରୁକ୍ମିଣୀଂ ପ୍ରଣୟିନୀଂ ତ୍ଵୟି ଦେଵ ସହୋଦରଃ ।
ସ୍ଵୟମଦିତ୍ସତ ଚେଦିମହୀଭୁଜେ ସ୍ଵତମସା ତମସାଧୁମୁପାଶ୍ରୟନ୍ ॥3॥
ଚିରଧୃତପ୍ରଣୟା ତ୍ଵୟି ବାଲିକା ସପଦି କାଂକ୍ଷିତଭଂଗସମାକୁଲା ।
ତଵ ନିଵେଦୟିତୁଂ ଦ୍ଵିଜମାଦିଶତ୍ ସ୍ଵକଦନଂ କଦନଂଗଵିନିର୍ମିତମ୍ ॥4॥
ଦ୍ଵିଜସୁତୋଽପି ଚ ତୂର୍ଣମୁପାୟୟୌ ତଵ ପୁରଂ ହି ଦୁରାଶଦୁରାସଦମ୍ ।
ମୁଦମଵାପ ଚ ସାଦରପୂଜିତଃ ସ ଭଵତା ଭଵତାପହୃତା ସ୍ଵୟମ୍ ॥5॥
ସ ଚ ଭଵଂତମଵୋଚତ କୁଂଡିନେ ନୃପସୁତା ଖଲୁ ରାଜତି ରୁକ୍ମିଣୀ ।
ତ୍ଵୟି ସମୁତ୍ସୁକୟା ନିଜଧୀରତାରହିତୟା ହି ତୟା ପ୍ରହିତୋଽସ୍ମ୍ୟହମ୍ ॥6॥
ତଵ ହୃତାଽସ୍ମି ପୁରୈଵ ଗୁଣୈରହଂ ହରତି ମାଂ କିଲ ଚେଦିନୃପୋଽଧୁନା ।
ଅୟି କୃପାଲୟ ପାଲୟ ମାମିତି ପ୍ରଜଗଦେ ଜଗଦେକପତେ ତୟା ॥7॥
ଅଶରଣାଂ ୟଦି ମାଂ ତ୍ଵମୁପେକ୍ଷସେ ସପଦି ଜୀଵିତମେଵ ଜହାମ୍ୟହମ୍ ।
ଇତି ଗିରା ସୁତନୋରତନୋତ୍ ଭୃଶଂ ସୁହୃଦୟଂ ହୃଦୟଂ ତଵ କାତରମ୍ ॥8॥
ଅକଥୟସ୍ତ୍ଵମଥୈନମୟେ ସଖେ ତଦଧିକା ମମ ମନ୍ମଥଵେଦନା ।
ନୃପସମକ୍ଷମୁପେତ୍ୟ ହରାମ୍ୟହଂ ତଦୟି ତାଂ ଦୟିତାମସିତେକ୍ଷଣାମ୍ ॥9॥
ପ୍ରମୁଦିତେନ ଚ ତେନ ସମଂ ତଦା ରଥଗତୋ ଲଘୁ କୁଂଡିନମେୟିଵାନ୍ ।
ଗୁରୁମରୁତ୍ପୁରନାୟକ ମେ ଭଵାନ୍ ଵିତନୁତାଂ ତନୁତାଂ ନିଖିଲାପଦାମ୍ ॥10॥