ସତ୍ରାଜିତସ୍ତ୍ଵମଥ ଲୁବ୍ଧଵଦର୍କଲବ୍ଧଂ
ଦିଵ୍ୟଂ ସ୍ୟମଂତକମଣିଂ ଭଗଵନ୍ନୟାଚୀଃ ।
ତତ୍କାରଣଂ ବହୁଵିଧଂ ମମ ଭାତି ନୂନଂ
ତସ୍ୟାତ୍ମଜାଂ ତ୍ଵୟି ରତାଂ ଛଲତୋ ଵିଵୋଢୁମ୍ ॥1॥
ଅଦତ୍ତଂ ତଂ ତୁଭ୍ୟଂ ମଣିଵରମନେନାଲ୍ପମନସା
ପ୍ରସେନସ୍ତଦ୍ଭ୍ରାତା ଗଲଭୁଵି ଵହନ୍ ପ୍ରାପ ମୃଗୟାମ୍ ।
ଅହନ୍ନେନଂ ସିଂହୋ ମଣିମହସି ମାଂସଭ୍ରମଵଶାତ୍
କପୀଂଦ୍ରସ୍ତଂ ହତ୍ଵା ମଣିମପି ଚ ବାଲାୟ ଦଦିଵାନ୍ ॥2॥
ଶଶଂସୁଃ ସତ୍ରାଜିଦ୍ଗିରମନୁ ଜନାସ୍ତ୍ଵାଂ ମଣିହରଂ
ଜନାନାଂ ପୀୟୂଷଂ ଭଵତି ଗୁଣିନାଂ ଦୋଷକଣିକା ।
ତତଃ ସର୍ଵଜ୍ଞୋଽପି ସ୍ଵଜନସହିତୋ ମାର୍ଗଣପରଃ
ପ୍ରସେନଂ ତଂ ଦୃଷ୍ଟ୍ଵା ହରିମପି ଗତୋଽଭୂଃ କପିଗୁହାମ୍ ॥3॥
ଭଵଂତମଵିତର୍କୟନ୍ନତିଵୟାଃ ସ୍ଵୟଂ ଜାଂବଵାନ୍
ମୁକୁଂଦଶରଣଂ ହି ମାଂ କ ଇହ ରୋଦ୍ଧୁମିତ୍ୟାଲପନ୍ ।
ଵିଭୋ ରଘୁପତେ ହରେ ଜୟ ଜୟେତ୍ୟଲଂ ମୁଷ୍ଟିଭି-
ଶ୍ଚିରଂ ତଵ ସମର୍ଚନଂ ଵ୍ୟଧିତ ଭକ୍ତଚୂଡାମଣିଃ ॥4॥
ବୁଧ୍ଵାଽଥ ତେନ ଦତ୍ତାଂ ନଵରମଣୀଂ ଵରମଣିଂ ଚ ପରିଗୃହ୍ଣନ୍ ।
ଅନୁଗୃହ୍ଣନ୍ନମୁମାଗାଃ ସପଦି ଚ ସତ୍ରାଜିତେ ମଣିଂ ପ୍ରାଦାଃ ॥5॥
ତଦନୁ ସ ଖଲୁ ବ୍ରୀଲାଲୋଲୋ ଵିଲୋଲଵିଲୋଚନାଂ
ଦୁହିତରମହୋ ଧୀମାନ୍ ଭାମାଂ ଗିରୈଵ ପରାର୍ପିତାମ୍ ।
ଅଦିତ ମଣିନା ତୁଭ୍ୟଂ ଲଭ୍ୟଂ ସମେତ୍ୟ ଭଵାନପି
ପ୍ରମୁଦିତମନାସ୍ତସ୍ୟୈଵାଦାନ୍ମଣିଂ ଗହନାଶୟଃ ॥6॥
ଵ୍ରୀଲାକୁଲାଂ ରମୟତି ତ୍ଵୟି ସତ୍ୟଭାମାଂ
କୌଂତେୟଦାହକଥୟାଥ କୁରୂନ୍ ପ୍ରୟାତେ ।
ହୀ ଗାଂଦିନେୟକୃତଵର୍ମଗିରା ନିପାତ୍ୟ
ସତ୍ରାଜିତଂ ଶତଧନୁର୍ମଣିମାଜହାର ॥7॥
ଶୋକାତ୍ କୁରୂନୁପଗତାମଵଲୋକ୍ୟ କାଂତାଂ
ହତ୍ଵା ଦ୍ରୁତଂ ଶତଧନୁଂ ସମହର୍ଷୟସ୍ତାମ୍ ।
ରତ୍ନେ ସଶଂକ ଇଵ ମୈଥିଲଗେହମେତ୍ୟ
ରାମୋ ଗଦାଂ ସମଶିଶିକ୍ଷତ ଧାର୍ତରାଷ୍ଟ୍ରମ୍ ॥8॥
ଅକ୍ରୂର ଏଷ ଭଗଵନ୍ ଭଵଦିଚ୍ଛୟୈଵ
ସତ୍ରାଜିତଃ କୁଚରିତସ୍ୟ ୟୁୟୋଜ ହିଂସାମ୍ ।
ଅକ୍ରୂରତୋ ମଣିମନାହୃତଵାନ୍ ପୁନସ୍ତ୍ଵଂ
ତସ୍ୟୈଵ ଭୂତିମୁପଧାତୁମିତି ବ୍ରୁଵଂତି ॥9॥
ଭକ୍ତସ୍ତ୍ଵୟି ସ୍ଥିରତରଃ ସ ହି ଗାଂଦିନେୟ-
ସ୍ତସ୍ୟୈଵ କାପଥମତିଃ କଥମୀଶ ଜାତା ।
ଵିଜ୍ଞାନଵାନ୍ ପ୍ରଶମଵାନହମିତ୍ୟୁଦୀର୍ଣଂ
ଗର୍ଵଂ ଧ୍ରୁଵଂ ଶମୟିତୁଂ ଭଵତା କୃତୈଵ ॥10॥
ୟାତଂ ଭୟେନ କୃତଵର୍ମୟୁତଂ ପୁନସ୍ତ-
ମାହୂୟ ତଦ୍ଵିନିହିତଂ ଚ ମଣିଂ ପ୍ରକାଶ୍ୟ ।
ତତ୍ରୈଵ ସୁଵ୍ରତଧରେ ଵିନିଧାୟ ତୁଷ୍ୟନ୍
ଭାମାକୁଚାଂତଶୟନଃ ପଵନେଶ ପାୟାଃ ॥11॥