ସ୍ନିଗ୍ଧାଂ ମୁଗ୍ଧାଂ ସତତମପି ତାଂ ଲାଲୟନ୍ ସତ୍ୟଭାମାଂ
ୟାତୋ ଭୂୟଃ ସହ ଖଲୁ ତୟା ୟାଜ୍ଞସେନୀଵିଵାହମ୍ ।
ପାର୍ଥପ୍ରୀତ୍ୟୈ ପୁନରପି ମନାଗାସ୍ଥିତୋ ହସ୍ତିପୁର୍ୟାଂ
ସଶକ୍ରପ୍ରସ୍ଥଂ ପୁରମପି ଵିଭୋ ସଂଵିଧାୟାଗତୋଽଭୂଃ ॥1॥
ଭଦ୍ରାଂ ଭଦ୍ରାଂ ଭଵଦଵରଜାଂ କୌରଵେଣାର୍ଥ୍ୟମାନାଂ
ତ୍ଵଦ୍ଵାଚା ତାମହୃତ କୁହନାମସ୍କରୀ ଶକ୍ରସୂନୁଃ ।
ତତ୍ର କ୍ରୁଦ୍ଧଂ ବଲମନୁନୟନ୍ ପ୍ରତ୍ୟଗାସ୍ତେନ ସାର୍ଧଂ
ଶକ୍ରପ୍ରସ୍ଥଂ ପ୍ରିୟସଖମୁଦେ ସତ୍ୟଭାମାସହାୟଃ ॥2॥
ତତ୍ର କ୍ରୀଡନ୍ନପି ଚ ୟମୁନାକୂଲଦୃଷ୍ଟାଂ ଗୃହୀତ୍ଵା
ତାଂ କାଲିଂଦୀଂ ନଗରମଗମଃ ଖାଂଡଵପ୍ରୀଣିତାଗ୍ନିଃ ।
ଭ୍ରାତୃତ୍ରସ୍ତାଂ ପ୍ରଣୟଵିଵଶାଂ ଦେଵ ପୈତୃଷ୍ଵସେୟୀଂ
ରାଜ୍ଞାଂ ମଧ୍ୟେ ସପଦି ଜହୃଷେ ମିତ୍ରଵିଂଦାମଵଂତୀମ୍ ॥3॥
ସତ୍ୟାଂ ଗତ୍ଵା ପୁନରୁଦଵହୋ ନଗ୍ନଜିନ୍ନଂଦନାଂ ତାଂ
ବଧ୍ଵା ସପ୍ତାପି ଚ ଵୃଷଵରାନ୍ ସପ୍ତମୂର୍ତିର୍ନିମେଷାତ୍ ।
ଭଦ୍ରାଂ ନାମ ପ୍ରଦଦୁରଥ ତେ ଦେଵ ସଂତର୍ଦନାଦ୍ୟା-
ସ୍ତତ୍ସୋଦର୍ୟା ଵରଦ ଭଵତଃ ସାଽପି ପୈତୃଷ୍ଵସେୟୀ ॥4॥
ପାର୍ଥାଦ୍ୟୈରପ୍ୟକୃତଲଵନଂ ତୋୟମାତ୍ରାଭିଲକ୍ଷ୍ୟଂ
ଲକ୍ଷଂ ଛିତ୍ଵା ଶଫରମଵୃଥା ଲକ୍ଷ୍ମଣାଂ ମଦ୍ରକନ୍ୟାମ୍ ।
ଅଷ୍ଟାଵେଵଂ ତଵ ସମଭଵନ୍ ଵଲ୍ଲଭାସ୍ତତ୍ର ମଧ୍ୟେ
ଶୁଶ୍ରୋଥ ତ୍ଵଂ ସୁରପତିଗିରା ଭୌମଦୁଶ୍ଚେଷ୍ଟିତାନି ॥5॥
ସ୍ମୃତାୟାତଂ ପକ୍ଷିପ୍ରଵରମଧିରୂଢସ୍ତ୍ଵମଗମୋ
ଵହନ୍ନଂକେ ଭାମାମୁପଵନମିଵାରାତିଭଵନମ୍ ।
ଵିଭିଂଦନ୍ ଦୁର୍ଗାଣି ତ୍ରୁଟିତପୃତନାଶୋଣିତରସୈଃ
ପୁରଂ ତାଵତ୍ ପ୍ରାଗ୍ଜ୍ୟୋତିଷମକୁରୁଥାଃ ଶୋଣିତପୁରମ୍ ॥6॥
ମୁରସ୍ତ୍ଵାଂ ପଂଚାସ୍ୟୋ ଜଲଧିଵନମଧ୍ୟାଦୁଦପତତ୍
ସ ଚକ୍ରେ ଚକ୍ରେଣ ପ୍ରଦଲିତଶିରା ମଂକ୍ଷୁ ଭଵତା ।
ଚତୁର୍ଦଂତୈର୍ଦଂତାଵଲପତିଭିରିଂଧାନସମରଂ
ରଥାଂଗେନ ଛିତ୍ଵା ନରକମକରୋସ୍ତୀର୍ଣନରକମ୍ ॥7॥
ସ୍ତୁତୋ ଭୂମ୍ୟା ରାଜ୍ୟଂ ସପଦି ଭଗଦତ୍ତେଽସ୍ୟ ତନୟେ
ଗଜଂଚୈକଂ ଦତ୍ଵା ପ୍ରଜିଘୟିଥ ନାଗାନ୍ନିଜପୁରୀମ୍ ।
ଖଲେନାବଦ୍ଧାନାଂ ସ୍ଵଗତମନସାଂ ଷୋଡଶ ପୁନଃ
ସହସ୍ରାଣି ସ୍ତ୍ରୀଣାମପି ଚ ଧନରାଶିଂ ଚ ଵିପୁଲମ୍ ॥8॥
ଭୌମାପାହୃତକୁଂଡଲଂ ତଦଦିତେର୍ଦାତୁଂ ପ୍ରୟାତୋ ଦିଵଂ
ଶକ୍ରାଦ୍ୟୈର୍ମହିତଃ ସମଂ ଦୟିତୟା ଦ୍ୟୁସ୍ତ୍ରୀଷୁ ଦତ୍ତହ୍ରିୟା ।
ହୃତ୍ଵା କଲ୍ପତରୁଂ ରୁଷାଭିପତିତଂ ଜିତ୍ଵେଂଦ୍ରମଭ୍ୟାଗମ-
ସ୍ତତ୍ତୁ ଶ୍ରୀମଦଦୋଷ ଈଦୃଶ ଇତି ଵ୍ୟାଖ୍ୟାତୁମେଵାକୃଥାଃ ॥9॥
କଲ୍ପଦ୍ରୁଂ ସତ୍ୟଭାମାଭଵନଭୁଵି ସୃଜନ୍ ଦ୍ଵ୍ୟଷ୍ଟସାହସ୍ରୟୋଷାଃ
ସ୍ଵୀକୃତ୍ୟ ପ୍ରତ୍ୟଗାରଂ ଵିହିତବହୁଵପୁର୍ଲାଲୟନ୍ କେଲିଭେଦୈଃ ।
ଆଶ୍ଚର୍ୟାନ୍ନାରଦାଲୋକିତଵିଵିଧଗତିସ୍ତତ୍ର ତତ୍ରାପି ଗେହେ
ଭୂୟଃ ସର୍ଵାସୁ କୁର୍ଵନ୍ ଦଶ ଦଶ ତନୟାନ୍ ପାହି ଵାତାଲୟେଶ ॥10॥