ତତୋ ମଗଧଭୂଭୃତା ଚିରନିରୋଧସଂକ୍ଲେଶିତଂ
ଶତାଷ୍ଟକୟୁତାୟୁତଦ୍ଵିତୟମୀଶ ଭୂମୀଭୃତାମ୍ ।
ଅନାଥଶରଣାୟ ତେ କମପି ପୂରୁଷଂ ପ୍ରାହିଣୋ-
ଦୟାଚତ ସ ମାଗଧକ୍ଷପଣମେଵ କିଂ ଭୂୟସା ॥1॥
ୟିୟାସୁରଭିମାଗଧଂ ତଦନୁ ନାରଦୋଦୀରିତା-
ଦ୍ୟୁଧିଷ୍ଠିରମଖୋଦ୍ୟମାଦୁଭୟକାର୍ୟପର୍ୟାକୁଲଃ ।
ଵିରୁଦ୍ଧଜୟିନୋଽଧ୍ଵରାଦୁଭୟସିଦ୍ଧିରିତ୍ୟୁଦ୍ଧଵେ
ଶଶଂସୁଷି ନିଜୈଃ ସମଂ ପୁରମିୟେଥ ୟୌଧିଷ୍ଠିରୀମ୍ ॥2॥
ଅଶେଷଦୟିତାୟୁତେ ତ୍ଵୟି ସମାଗତେ ଧର୍ମଜୋ
ଵିଜିତ୍ୟ ସହଜୈର୍ମହୀଂ ଭଵଦପାଂଗସଂଵର୍ଧିତୈଃ ।
ଶ୍ରିୟଂ ନିରୁପମାଂ ଵହନ୍ନହହ ଭକ୍ତଦାସାୟିତଂ
ଭଵଂତମୟି ମାଗଧେ ପ୍ରହିତଵାନ୍ ସଭୀମାର୍ଜୁନମ୍ ॥3॥
ଗିରିଵ୍ରଜପୁରଂ ଗତାସ୍ତଦନୁ ଦେଵ ୟୂୟଂ ତ୍ରୟୋ
ୟୟାଚ ସମରୋତ୍ସଵଂ ଦ୍ଵିଜମିଷେଣ ତଂ ମାଗଧମ୍ ।
ଅପୂର୍ଣସୁକୃତଂ ତ୍ଵମୁଂ ପଵନଜେନ ସଂଗ୍ରାମୟନ୍
ନିରୀକ୍ଷ୍ୟ ସହ ଜିଷ୍ଣୁନା ତ୍ଵମପି ରାଜୟୁଦ୍ଧ୍ଵା ସ୍ଥିତଃ ॥4॥
ଅଶାଂତସମରୋଦ୍ଧତଂ ବିଟପପାଟନାସଂଜ୍ଞୟା
ନିପାତ୍ୟ ଜରରସ୍ସୁତଂ ପଵନଜେନ ନିଷ୍ପାଟିତମ୍ ।
ଵିମୁଚ୍ୟ ନୃପତୀନ୍ ମୁଦା ସମନୁଗୃହ୍ୟ ଭକ୍ତିଂ ପରାଂ
ଦିଦେଶିଥ ଗତସ୍ପୃହାନପି ଚ ଧର୍ମଗୁପ୍ତ୍ୟୈ ଭୁଵଃ ॥5॥
ପ୍ରଚକ୍ରୁଷି ୟୁଧିଷ୍ଠିରେ ତଦନୁ ରାଜସୂୟାଧ୍ଵରଂ
ପ୍ରସନ୍ନଭୃତକୀଭଵତ୍ସକଲରାଜକଵ୍ୟାକୁଲମ୍ ।
ତ୍ଵମପ୍ୟୟି ଜଗତ୍ପତେ ଦ୍ଵିଜପଦାଵନେଜାଦିକଂ
ଚକର୍ଥ କିମୁ କଥ୍ୟତେ ନୃପଵରସ୍ୟ ଭାଗ୍ୟୋନ୍ନତିଃ ॥6॥
ତତଃ ସଵନକର୍ମଣି ପ୍ରଵରମଗ୍ର୍ୟପୂଜାଵିଧିଂ
ଵିଚାର୍ୟ ସହଦେଵଵାଗନୁଗତଃ ସ ଧର୍ମାତ୍ମଜଃ ।
ଵ୍ୟଧତ୍ତ ଭଵତେ ମୁଦା ସଦସି ଵିଶ୍ଵଭୂତାତ୍ମନେ
ତଦା ସସୁରମାନୁଷଂ ଭୁଵନମେଵ ତୃପ୍ତିଂ ଦଧୌ ॥7॥
ତତଃ ସପଦି ଚେଦିପୋ ମୁନିନୃପେଷୁ ତିଷ୍ଠତ୍ସ୍ଵହୋ
ସଭାଜୟତି କୋ ଜଡଃ ପଶୁପଦୁର୍ଦୁରୂଟଂ ଵଟୁମ୍ ।
ଇତି ତ୍ଵୟି ସ ଦୁର୍ଵଚୋଵିତତିମୁଦ୍ଵମନ୍ନାସନା-
ଦୁଦାପତଦୁଦାୟୁଧଃ ସମପତନ୍ନମୁଂ ପାଂଡଵାଃ ॥8॥
ନିଵାର୍ୟ ନିଜପକ୍ଷଗାନଭିମୁଖସ୍ୟଵିଦ୍ଵେଷିଣ-
ସ୍ତ୍ଵମେଵ ଜହୃଷେ ଶିରୋ ଦନୁଜଦାରିଣା ସ୍ଵାରିଣା ।
ଜନୁସ୍ତ୍ରିତୟଲବ୍ଧୟା ସତତଚିଂତୟା ଶୁଦ୍ଧଧୀ-
ସ୍ତ୍ଵୟା ସ ପରମେକତାମଧୃତ ୟୋଗିନାଂ ଦୁର୍ଲଭାମ୍ ॥9॥
ତତଃ ସୁମହିତେ ତ୍ଵୟା କ୍ରତୁଵରେ ନିରୂଢେ ଜନୋ
ୟୟୌ ଜୟତି ଧର୍ମଜୋ ଜୟତି କୃଷ୍ଣ ଇତ୍ୟାଲପନ୍।
ଖଲଃ ସ ତୁ ସୁୟୋଧନୋ ଧୁତମନାସ୍ସପତ୍ନଶ୍ରିୟା
ମୟାର୍ପିତସଭାମୁଖେ ସ୍ଥଲଜଲଭ୍ରମାଦଭ୍ରମୀତ୍ ॥10॥
ତଦା ହସିତମୁତ୍ଥିତଂ ଦ୍ରୁପଦନଂଦନାଭୀମୟୋ-
ରପାଂଗକଲୟା ଵିଭୋ କିମପି ତାଵଦୁଜ୍ଜୃଂଭୟନ୍ ।
ଧରାଭରନିରାକୃତୌ ସପଦି ନାମ ବୀଜଂ ଵପନ୍
ଜନାର୍ଦନ ମରୁତ୍ପୁରୀନିଲୟ ପାହି ମାମାମୟାତ୍ ॥11॥