ସାଲ୍ଵୋ ଭୈଷ୍ମୀଵିଵାହେ ୟଦୁବଲଵିଜିତଶ୍ଚଂଦ୍ରଚୂଡାଦ୍ଵିମାନଂ
ଵିଂଦନ୍ ସୌଭଂ ସ ମାୟୀ ତ୍ଵୟି ଵସତି କୁରୁଂସ୍ତ୍ଵତ୍ପୁରୀମଭ୍ୟଭାଂକ୍ଷୀତ୍ ।
ପ୍ରଦ୍ୟୁମ୍ନସ୍ତଂ ନିରୁଂଧନ୍ନିଖିଲୟଦୁଭଟୈର୍ନ୍ୟଗ୍ରହୀଦୁଗ୍ରଵୀର୍ୟଂ
ତସ୍ୟାମାତ୍ୟଂ ଦ୍ୟୁମଂତଂ ଵ୍ୟଜନି ଚ ସମରଃ ସପ୍ତଵିଂଶତ୍ୟହାଂତଃ ॥1॥
ତାଵତ୍ତ୍ଵଂ ରାମଶାଲୀ ତ୍ଵରିତମୁପଗତଃ ଖଂଡିତପ୍ରାୟସୈନ୍ୟଂ
ସୌଭେଶଂ ତଂ ନ୍ୟରୁଂଧାଃ ସ ଚ କିଲ ଗଦୟା ଶାର୍ଙ୍ଗମଭ୍ରଂଶୟତ୍ତେ ।
ମାୟାତାତଂ ଵ୍ୟହିଂସୀଦପି ତଵ ପୁରତସ୍ତତ୍ତ୍ଵୟାପି କ୍ଷଣାର୍ଧଂ
ନାଜ୍ଞାୟୀତ୍ୟାହୁରେକେ ତଦିଦମଵମତଂ ଵ୍ୟାସ ଏଵ ନ୍ୟଷେଧୀତ୍ ॥2॥
କ୍ଷିପ୍ତ୍ଵା ସୌଭଂ ଗଦାଚୂର୍ଣିତମୁଦକନିଧୌ ମଂକ୍ଷୁ ସାଲ୍ଵେଽପି ଚକ୍ରେ-
ଣୋତ୍କୃତ୍ତେ ଦଂତଵକ୍ତ୍ରଃ ପ୍ରସଭମଭିପତନ୍ନଭ୍ୟମୁଂଚଦ୍ଗଦାଂ ତେ ।
କୌମୋଦକ୍ୟା ହତୋଽସାଵପି ସୁକୃତନିଧିଶ୍ଚୈଦ୍ୟଵତ୍ପ୍ରାପଦୈକ୍ୟଂ
ସର୍ଵେଷାମେଷ ପୂର୍ଵଂ ତ୍ଵୟି ଧୃତମନସାଂ ମୋକ୍ଷଣାର୍ଥୋଽଵତାରଃ ॥3॥
ତ୍ଵୟ୍ୟାୟାତେଽଥ ଜାତେ କିଲ କୁରୁସଦସି ଦ୍ୟୂତକେ ସଂୟତାୟାଃ
କ୍ରଂଦଂତ୍ୟା ୟାଜ୍ଞସେନ୍ୟାଃ ସକରୁଣମକୃଥାଶ୍ଚେଲମାଲାମନଂତାମ୍ ।
ଅନ୍ନାଂତପ୍ରାପ୍ତଶର୍ଵାଂଶଜମୁନିଚକିତଦ୍ରୌପଦୀଚିଂତିତୋଽଥ
ପ୍ରାପ୍ତଃ ଶାକାନ୍ନମଶ୍ନନ୍ ମୁନିଗଣମକୃଥାସ୍ତୃପ୍ତିମଂତଂ ଵନାଂତେ ॥4॥
ୟୁଦ୍ଧୋଦ୍ୟୋଗେଽଥ ମଂତ୍ରେ ମିଲତି ସତି ଵୃତଃ ଫଲ୍ଗୁନେନ ତ୍ଵମେକଃ
କୌରଵ୍ୟେ ଦତ୍ତସୈନ୍ୟଃ କରିପୁରମଗମୋ ଦୂତ୍ୟକୃତ୍ ପାଂଡଵାର୍ଥମ୍ ।
ଭୀଷ୍ମଦ୍ରୋଣାଦିମାନ୍ୟେ ତଵ ଖଲୁ ଵଚନେ ଧିକ୍କୃତେ କୌରଵେଣ
ଵ୍ୟାଵୃଣ୍ଵନ୍ ଵିଶ୍ଵରୂପଂ ମୁନିସଦସି ପୁରୀଂ କ୍ଷୋଭୟିତ୍ଵାଗତୋଽଭୂଃ ॥5॥
ଜିଷ୍ଣୋସ୍ତ୍ଵଂ କୃଷ୍ଣ ସୂତଃ ଖଲୁ ସମରମୁଖେ ବଂଧୁଘାତେ ଦୟାଲୁଂ
ଖିନ୍ନଂ ତଂ ଵୀକ୍ଷ୍ୟ ଵୀରଂ କିମିଦମୟି ସଖେ ନିତ୍ୟ ଏକୋଽୟମାତ୍ମା ।
କୋ ଵଧ୍ୟଃ କୋଽତ୍ର ହଂତା ତଦିହ ଵଧଭିୟଂ ପ୍ରୋଜ୍ଝ୍ୟ ମୟ୍ୟର୍ପିତାତ୍ମା
ଧର୍ମ୍ୟଂ ୟୁଦ୍ଧଂ ଚରେତି ପ୍ରକୃତିମନୟଥା ଦର୍ଶୟନ୍ ଵିଶ୍ଵରୂପମ୍ ॥6॥
ଭକ୍ତୋତ୍ତଂସେଽଥ ଭୀଷ୍ମେ ତଵ ଧରଣିଭରକ୍ଷେପକୃତ୍ୟୈକସକ୍ତେ
ନିତ୍ୟଂ ନିତ୍ୟଂ ଵିଭିଂଦତ୍ୟୟୁତସମଧିକଂ ପ୍ରାପ୍ତସାଦେ ଚ ପାର୍ଥେ ।
ନିଶ୍ଶସ୍ତ୍ରତ୍ଵପ୍ରତିଜ୍ଞାଂ ଵିଜହଦରିଵରଂ ଧାରୟନ୍ କ୍ରୋଧଶାଲୀ-
ଵାଧାଵନ୍ ପ୍ରାଂଜଲିଂ ତଂ ନତଶିରସମଥୋ ଵୀକ୍ଷ୍ୟ ମୋଦାଦପାଗାଃ ॥7॥
ୟୁଦ୍ଧେ ଦ୍ରୋଣସ୍ୟ ହସ୍ତିସ୍ଥିରରଣଭଗଦତ୍ତେରିତଂ ଵୈଷ୍ଣଵାସ୍ତ୍ରଂ
ଵକ୍ଷସ୍ୟାଧତ୍ତ ଚକ୍ରସ୍ଥଗିତରଵିମହାଃ ପ୍ରାର୍ଦୟତ୍ସିଂଧୁରାଜମ୍ ।
ନାଗାସ୍ତ୍ରେ କର୍ଣମୁକ୍ତେ କ୍ଷିତିମଵନମୟନ୍ କେଵଲଂ କୃତ୍ତମୌଲିଂ
ତତ୍ରେ ତ୍ରାପି ପାର୍ଥଂ କିମିଵ ନହି ଭଵାନ୍ ପାଂଡଵାନାମକାର୍ଷୀତ୍ ॥8॥
ୟୁଦ୍ଧାଦୌ ତୀର୍ଥଗାମୀ ସ ଖଲୁ ହଲଧରୋ ନୈମିଶକ୍ଷେତ୍ରମୃଚ୍ଛ-
ନ୍ନପ୍ରତ୍ୟୁତ୍ଥାୟିସୂତକ୍ଷୟକୃଦଥ ସୁତଂ ତତ୍ପଦେ କଲ୍ପୟିତ୍ଵା ।
ୟଜ୍ଞଘ୍ନଂ ଵଲ୍କଲଂ ପର୍ଵଣି ପରିଦଲୟନ୍ ସ୍ନାତତୀର୍ଥୋ ରଣାଂତେ
ସଂପ୍ରାପ୍ତୋ ଭୀମଦୁର୍ୟୋଧନରଣମଶମଂ ଵୀକ୍ଷ୍ୟ ୟାତଃ ପୁରୀଂ ତେ ॥9॥
ସଂସୁପ୍ତଦ୍ରୌପଦେୟକ୍ଷପଣହତଧିୟଂ ଦ୍ରୌଣିମେତ୍ୟ ତ୍ଵଦୁକ୍ତ୍ୟା
ତନ୍ମୁକ୍ତଂ ବ୍ରାହ୍ମମସ୍ତ୍ରଂ ସମହୃତ ଵିଜୟୋ ମୌଲିରତ୍ନଂ ଚ ଜହ୍ରେ ।
ଉଚ୍ଛିତ୍ୟୈ ପାଂଡଵାନାଂ ପୁନରପି ଚ ଵିଶତ୍ୟୁତ୍ତରାଗର୍ଭମସ୍ତ୍ରେ
ରକ୍ଷନ୍ନଂଗୁଷ୍ଠମାତ୍ରଃ କିଲ ଜଠରମଗାଶ୍ଚକ୍ରପାଣିର୍ଵିଭୋ ତ୍ଵମ୍ ॥10॥
ଧର୍ମୌଘଂ ଧର୍ମସୂନୋରଭିଦଧଦଖିଲଂ ଛଂଦମୃତ୍ୟୁସ୍ସ ଭୀଷ୍ମ-
ସ୍ତ୍ଵାଂ ପଶ୍ୟନ୍ ଭକ୍ତିଭୂମ୍ନୈଵ ହି ସପଦି ୟୟୌ ନିଷ୍କଲବ୍ରହ୍ମଭୂୟମ୍ ।
ସଂୟାଜ୍ୟାଥାଶ୍ଵମେଧୈସ୍ତ୍ରିଭିରତିମହିତୈର୍ଧର୍ମଜଂ ପୂର୍ଣକାମଂ
ସଂପ୍ରାପ୍ତୋ ଦ୍ଵରକାଂ ତ୍ଵଂ ପଵନପୁରପତେ ପାହି ମାଂ ସର୍ଵରୋଗାତ୍ ॥11॥