କୁଚେଲନାମା ଭଵତଃ ସତୀର୍ଥ୍ୟତାଂ ଗତଃ ସ ସାଂଦୀପନିମଂଦିରେ ଦ୍ଵିଜଃ ।
ତ୍ଵଦେକରାଗେଣ ଧନାଦିନିସ୍ସ୍ପୃହୋ ଦିନାନି ନିନ୍ୟେ ପ୍ରଶମୀ ଗୃହାଶ୍ରମୀ ॥1॥
ସମାନଶୀଲାଽପି ତଦୀୟଵଲ୍ଲଭା ତଥୈଵ ନୋ ଚିତ୍ତଜୟଂ ସମେୟୁଷୀ ।
କଦାଚିଦୂଚେ ବତ ଵୃତ୍ତିଲବ୍ଧୟେ ରମାପତିଃ କିଂ ନ ସଖା ନିଷେଵ୍ୟତେ ॥2॥
ଇତୀରିତୋଽୟଂ ପ୍ରିୟୟା କ୍ଷୁଧାର୍ତୟା ଜୁଗୁପ୍ସମାନୋଽପି ଧନେ ମଦାଵହେ ।
ତଦା ତ୍ଵଦାଲୋକନକୌତୁକାଦ୍ୟୟୌ ଵହନ୍ ପଟାଂତେ ପୃଥୁକାନୁପାୟନମ୍ ॥3॥
ଗତୋଽୟମାଶ୍ଚର୍ୟମୟୀଂ ଭଵତ୍ପୁରୀଂ ଗୃହେଷୁ ଶୈବ୍ୟାଭଵନଂ ସମେୟିଵାନ୍ ।
ପ୍ରଵିଶ୍ୟ ଵୈକୁଂଠମିଵାପ ନିର୍ଵୃତିଂ ତଵାତିସଂଭାଵନୟା ତୁ କିଂ ପୁନଃ ॥4॥
ପ୍ରପୂଜିତଂ ତଂ ପ୍ରିୟୟା ଚ ଵୀଜିତଂ କରେ ଗୃହୀତ୍ଵାଽକଥୟଃ ପୁରାକୃତମ୍ ।
ୟଦିଂଧନାର୍ଥଂ ଗୁରୁଦାରଚୋଦିତୈରପର୍ତୁଵର୍ଷ ତଦମର୍ଷି କାନନେ ॥5॥
ତ୍ରପାଜୁଷୋଽସ୍ମାତ୍ ପୃଥୁକଂ ବଲାଦଥ ପ୍ରଗୃହ୍ୟ ମୁଷ୍ଟୌ ସକୃଦାଶିତେ ତ୍ଵୟା ।
କୃତଂ କୃତଂ ନନ୍ଵିୟତେତି ସଂଭ୍ରମାଦ୍ରମା କିଲୋପେତ୍ୟ କରଂ ରୁରୋଧ ତେ ॥6॥
ଭକ୍ତେଷୁ ଭକ୍ତେନ ସ ମାନିତସ୍ତ୍ଵୟା ପୁରୀଂ ଵସନ୍ନେକନିଶାଂ ମହାସୁଖମ୍ ।
ବତାପରେଦ୍ୟୁର୍ଦ୍ରଵିଣଂ ଵିନା ୟୟୌ ଵିଚିତ୍ରରୂପସ୍ତଵ ଖଲ୍ଵନୁଗ୍ରହଃ ॥7॥
ୟଦି ହ୍ୟୟାଚିଷ୍ୟମଦାସ୍ୟଦଚ୍ୟୁତୋ ଵଦାମି ଭାର୍ୟାଂ କିମିତି ଵ୍ରଜନ୍ନସୌ ।
ତ୍ଵଦୁକ୍ତିଲୀଲାସ୍ମିତମଗ୍ନଧୀଃ ପୁନଃ କ୍ରମାଦପଶ୍ୟନ୍ମଣିଦୀପ୍ରମାଲୟମ୍ ॥8॥
କିଂ ମାର୍ଗଵିଭ୍ରଂଶ ଇତି ଭ୍ରଂମନ୍ କ୍ଷଣଂ ଗୃହଂ ପ୍ରଵିଷ୍ଟଃ ସ ଦଦର୍ଶ ଵଲ୍ଲଭାମ୍ ।
ସଖୀପରୀତାଂ ମଣିହେମଭୂଷିତାଂ ବୁବୋଧ ଚ ତ୍ଵତ୍କରୁଣାଂ ମହାଦ୍ଭୁତାମ୍ ॥9॥
ସ ରତ୍ନଶାଲାସୁ ଵସନ୍ନପି ସ୍ଵୟଂ ସମୁନ୍ନମଦ୍ଭକ୍ତିଭରୋଽମୃତଂ ୟୟୌ ।
ତ୍ଵମେଵମାପୂରିତଭକ୍ତଵାଂଛିତୋ ମରୁତ୍ପୁରାଧୀଶ ହରସ୍ଵ ମେ ଗଦାନ୍ ॥10॥