ଵୃକଭୃଗୁମୁନିମୋହିନ୍ୟଂବରୀଷାଦିଵୃତ୍ତେ-
ଷ୍ଵୟି ତଵ ହି ମହତ୍ତ୍ଵଂ ସର୍ଵଶର୍ଵାଦିଜୈତ୍ରମ୍ ।
ସ୍ଥିତମିହ ପରମାତ୍ମନ୍ ନିଷ୍କଲାର୍ଵାଗଭିନ୍ନଂ
କିମପି ୟଦଵଭାତଂ ତଦ୍ଧି ରୂପଂ ତଵୈଵ ॥1॥
ମୂର୍ତିତ୍ରୟେଶ୍ଵରସଦାଶିଵପଂଚକଂ ୟତ୍
ପ୍ରାହୁଃ ପରାତ୍ମଵପୁରେଵ ସଦାଶିଵୋଽସ୍ମିନ୍ ।
ତତ୍ରେଶ୍ଵରସ୍ତୁ ସ ଵିକୁଂଠପଦସ୍ତ୍ଵମେଵ
ତ୍ରିତ୍ଵଂ ପୁନର୍ଭଜସି ସତ୍ୟପଦେ ତ୍ରିଭାଗେ ॥2॥
ତତ୍ରାପି ସାତ୍ତ୍ଵିକତନୁଂ ତଵ ଵିଷ୍ଣୁମାହୁ-
ର୍ଧାତା ତୁ ସତ୍ତ୍ଵଵିରଲୋ ରଜସୈଵ ପୂର୍ଣଃ ।
ସତ୍ତ୍ଵୋତ୍କଟତ୍ଵମପି ଚାସ୍ତି ତମୋଵିକାର-
ଚେଷ୍ଟାଦିକଂଚ ତଵ ଶଂକରନାମ୍ନି ମୂର୍ତୌ ॥3॥
ତଂ ଚ ତ୍ରିମୂର୍ତ୍ୟତିଗତଂ ପରପୂରୁଷଂ ତ୍ଵାଂ
ଶର୍ଵାତ୍ମନାପି ଖଲୁ ସର୍ଵମୟତ୍ଵହେତୋଃ ।
ଶଂସଂତ୍ୟୁପାସନଵିଧୌ ତଦପି ସ୍ଵତସ୍ତୁ
ତ୍ଵଦ୍ରୂପମିତ୍ୟତିଦୃଢଂ ବହୁ ନଃ ପ୍ରମାଣମ୍ ॥4॥
ଶ୍ରୀଶଂକରୋଽପି ଭଗଵାନ୍ ସକଲେଷୁ ତାଵ-
ତ୍ତ୍ଵାମେଵ ମାନୟତି ୟୋ ନ ହି ପକ୍ଷପାତୀ ।
ତ୍ଵନ୍ନିଷ୍ଠମେଵ ସ ହି ନାମସହସ୍ରକାଦି
ଵ୍ୟାଖ୍ୟାତ୍ ଭଵତ୍ସ୍ତୁତିପରଶ୍ଚ ଗତିଂ ଗତୋଽଂତେ ॥5॥
ମୂର୍ତିତ୍ରୟାତିଗମୁଵାଚ ଚ ମଂତ୍ରଶାସ୍ତ୍ର-
ସ୍ୟାଦୌ କଲାୟସୁଷମଂ ସକଲେଶ୍ଵରଂ ତ୍ଵାମ୍ ।
ଧ୍ୟାନଂ ଚ ନିଷ୍କଲମସୌ ପ୍ରଣଵେ ଖଲୂକ୍ତ୍ଵା
ତ୍ଵାମେଵ ତତ୍ର ସକଲଂ ନିଜଗାଦ ନାନ୍ୟମ୍ ॥6॥
ସମସ୍ତସାରେ ଚ ପୁରାଣସଂଗ୍ରହେ
ଵିସଂଶୟଂ ତ୍ଵନ୍ମହିମୈଵ ଵର୍ଣ୍ୟତେ ।
ତ୍ରିମୂର୍ତିୟୁକ୍ସତ୍ୟପଦତ୍ରିଭାଗତଃ
ପରଂ ପଦଂ ତେ କଥିତଂ ନ ଶୂଲିନଃ ॥7॥
ୟତ୍ ବ୍ରାହ୍ମକଲ୍ପ ଇହ ଭାଗଵତଦ୍ଵିତୀୟ-
ସ୍କଂଧୋଦିତଂ ଵପୁରନାଵୃତମୀଶ ଧାତ୍ରେ ।
ତସ୍ୟୈଵ ନାମ ହରିଶର୍ଵମୁଖଂ ଜଗାଦ
ଶ୍ରୀମାଧଵଃ ଶିଵପରୋଽପି ପୁରାଣସାରେ ॥8॥
ୟେ ସ୍ଵପ୍ରକୃତ୍ୟନୁଗୁଣା ଗିରିଶଂ ଭଜଂତେ
ତେଷାଂ ଫଲଂ ହି ଦୃଢୟୈଵ ତଦୀୟଭକ୍ତ୍ୟା।
ଵ୍ୟାସୋ ହି ତେନ କୃତଵାନଧିକାରିହେତୋଃ
ସ୍କଂଦାଦିକେଷୁ ତଵ ହାନିଵଚୋଽର୍ଥଵାଦୈଃ ॥9॥
ଭୂତାର୍ଥକୀର୍ତିରନୁଵାଦଵିରୁଦ୍ଧଵାଦୌ
ତ୍ରେଧାର୍ଥଵାଦଗତୟଃ ଖଲୁ ରୋଚନାର୍ଥାଃ ।
ସ୍କାଂଦାଦିକେଷୁ ବହଵୋଽତ୍ର ଵିରୁଦ୍ଧଵାଦା-
ସ୍ତ୍ଵତ୍ତାମସତ୍ଵପରିଭୂତ୍ୟୁପଶିକ୍ଷଣାଦ୍ୟାଃ ॥10॥
ୟତ୍ କିଂଚିଦପ୍ୟଵିଦୁଷାଽପି ଵିଭୋ ମୟୋକ୍ତଂ
ତନ୍ମଂତ୍ରଶାସ୍ତ୍ରଵଚନାଦ୍ୟଭିଦୃଷ୍ଟମେଵ ।
ଵ୍ୟାସୋକ୍ତିସାରମୟଭାଗଵତୋପଗୀତ
କ୍ଲେଶାନ୍ ଵିଧୂୟ କୁରୁ ଭକ୍ତିଭରଂ ପରାତ୍ମନ୍ ॥11॥