ଶ୍ରୀକୃଷ୍ଣ ତ୍ଵତ୍ପଦୋପାସନମଭୟତମଂ ବଦ୍ଧମିଥ୍ୟାର୍ଥଦୃଷ୍ଟେ-
ର୍ମର୍ତ୍ୟସ୍ୟାର୍ତସ୍ୟ ମନ୍ୟେ ଵ୍ୟପସରତି ଭୟଂ ୟେନ ସର୍ଵାତ୍ମନୈଵ ।
ୟତ୍ତାଵତ୍ ତ୍ଵତ୍ପ୍ରଣୀତାନିହ ଭଜନଵିଧୀନାସ୍ଥିତୋ ମୋହମାର୍ଗେ
ଧାଵନ୍ନପ୍ୟାଵୃତାକ୍ଷଃ ସ୍ଖଲତି ନ କୁହଚିଦ୍ଦେଵଦେଵାଖିଲାତ୍ମନ୍ ॥1॥
ଭୂମନ୍ କାୟେନ ଵାଚା ମୁହୁରପି ମନସା ତ୍ଵଦ୍ବଲପ୍ରେରିତାତ୍ମା
ୟଦ୍ୟତ୍ କୁର୍ଵେ ସମସ୍ତଂ ତଦିହ ପରତରେ ତ୍ଵୟ୍ୟସାଵର୍ପୟାମି ।
ଜାତ୍ୟାପୀହ ଶ୍ଵପାକସ୍ତ୍ଵୟି ନିହିତମନଃକର୍ମଵାଗିଂଦ୍ରିୟାର୍ଥ-
ପ୍ରାଣୋ ଵିଶ୍ଵଂ ପୁନୀତେ ନ ତୁ ଵିମୁଖମନାସ୍ତ୍ଵତ୍ପଦାଦ୍ଵିପ୍ରଵର୍ୟଃ ॥2॥
ଭୀତିର୍ନାମ ଦ୍ଵିତୀୟାଦ୍ଭଵତି ନନୁ ମନଃକଲ୍ପିତଂ ଚ ଦ୍ଵିତୀୟଂ
ତେନୈକ୍ୟାଭ୍ୟାସଶୀଲୋ ହୃଦୟମିହ ୟଥାଶକ୍ତି ବୁଦ୍ଧ୍ୟା ନିରୁଂଧ୍ୟାମ୍ ।
ମାୟାଵିଦ୍ଧେ ତୁ ତସ୍ମିନ୍ ପୁନରପି ନ ତଥା ଭାତି ମାୟାଧିନାଥଂ
ତଂ ତ୍ଵାଂ ଭକ୍ତ୍ୟା ମହତ୍ୟା ସତତମନୁଭଜନୀଶ ଭୀତିଂ ଵିଜହ୍ୟାମ୍ ॥3॥
ଭକ୍ତେରୁତ୍ପତ୍ତିଵୃଦ୍ଧୀ ତଵ ଚରଣଜୁଷାଂ ସଂଗମେନୈଵ ପୁଂସା-
ମାସାଦ୍ୟେ ପୁଣ୍ୟଭାଜାଂ ଶ୍ରିୟ ଇଵ ଜଗତି ଶ୍ରୀମତାଂ ସଂଗମେନ ।
ତତ୍ସଂଗୋ ଦେଵ ଭୂୟାନ୍ମମ ଖଲୁ ସତତଂ ତନ୍ମୁଖାଦୁନ୍ମିଷଦ୍ଭି-
ସ୍ତ୍ଵନ୍ମାହାତ୍ମ୍ୟପ୍ରକାରୈର୍ଭଵତି ଚ ସୁଦୃଢା ଭକ୍ତିରୁଦ୍ଧୂତପାପା ॥4॥
ଶ୍ରେୟୋମାର୍ଗେଷୁ ଭକ୍ତାଵଧିକବହୁମତିର୍ଜନ୍ମକର୍ମାଣି ଭୂୟୋ
ଗାୟନ୍ କ୍ଷେମାଣି ନାମାନ୍ୟପି ତଦୁଭୟତଃ ପ୍ରଦ୍ରୁତଂ ପ୍ରଦ୍ରୁତାତ୍ମା ।
ଉଦ୍ୟଦ୍ଧାସଃ କଦାଚିତ୍ କୁହଚିଦପି ରୁଦନ୍ କ୍ଵାପି ଗର୍ଜନ୍ ପ୍ରଗାୟ-
ନ୍ନୁନ୍ମାଦୀଵ ପ୍ରନୃତ୍ୟନ୍ନୟି କୁରୁ କରୁଣାଂ ଲୋକବାହ୍ୟଶ୍ଚରେୟମ୍ ॥5॥
ଭୂତାନ୍ୟେତାନି ଭୂତାତ୍ମକମପି ସକଲଂ ପକ୍ଷିମତ୍ସ୍ୟାନ୍ ମୃଗାଦୀନ୍
ମର୍ତ୍ୟାନ୍ ମିତ୍ରାଣି ଶତ୍ରୂନପି ୟମିତମତିସ୍ତ୍ଵନ୍ମୟାନ୍ୟାନମାନି ।
ତ୍ଵତ୍ସେଵାୟାଂ ହି ସିଦ୍ଧ୍ୟେନ୍ମମ ତଵ କୃପୟା ଭକ୍ତିଦାର୍ଢ୍ୟଂ ଵିରାଗ-
ସ୍ତ୍ଵତ୍ତତ୍ତ୍ଵସ୍ୟାଵବୋଧୋଽପି ଚ ଭୁଵନପତେ ୟତ୍ନଭେଦଂ ଵିନୈଵ ॥6॥
ନୋ ମୁହ୍ୟନ୍ କ୍ଷୁତ୍ତୃଡାଦ୍ୟୈର୍ଭଵସରଣିଭଵୈସ୍ତ୍ଵନ୍ନିଲୀନାଶୟତ୍ଵା-
ଚ୍ଚିଂତାସାତତ୍ୟଶାଲୀ ନିମିଷଲଵମପି ତ୍ଵତ୍ପଦାଦପ୍ରକଂପଃ ।
ଇଷ୍ଟାନିଷ୍ଟେଷୁ ତୁଷ୍ଟିଵ୍ୟସନଵିରହିତୋ ମାୟିକତ୍ଵାଵବୋଧା-
ଜ୍ଜ୍ୟୋତ୍ସ୍ନାଭିସ୍ତ୍ଵନ୍ନଖେଂଦୋରଧିକଶିଶିରିତେନାତ୍ମନା ସଂଚରେୟମ୍ ॥7॥
ଭୂତେଷ୍ଵେଷୁ ତ୍ଵଦୈକ୍ୟସ୍ମୃତିସମଧିଗତୌ ନାଧିକାରୋଽଧୁନା ଚେ-
ତ୍ତ୍ଵତ୍ପ୍ରେମ ତ୍ଵତ୍କମୈତ୍ରୀ ଜଡମତିଷୁ କୃପା ଦ୍ଵିଟ୍ସୁ ଭୂୟାଦୁପେକ୍ଷା ।
ଅର୍ଚାୟାଂ ଵା ସମର୍ଚାକୁତୁକମୁରୁତରଶ୍ରଦ୍ଧୟା ଵର୍ଧତାଂ ମେ
ତ୍ଵତ୍ସଂସେଵୀ ତଥାପି ଦ୍ରୁତମୁପଲଭତେ ଭକ୍ତଲୋକୋତ୍ତମତ୍ଵମ୍ ॥8॥
ଆଵୃତ୍ୟ ତ୍ଵତ୍ସ୍ଵରୂପଂ କ୍ଷିତିଜଲମରୁଦାଦ୍ୟାତ୍ମନା ଵିକ୍ଷିପଂତୀ
ଜୀଵାନ୍ ଭୂୟିଷ୍ଠକର୍ମାଵଲିଵିଵଶଗତୀନ୍ ଦୁଃଖଜାଲେ କ୍ଷିପଂତୀ ।
ତ୍ଵନ୍ମାୟା ମାଭିଭୂନ୍ମାମୟି ଭୁଵନପତେ କଲ୍ପତେ ତତ୍ପ୍ରଶାଂତ୍ୟୈ
ତ୍ଵତ୍ପାଦେ ଭକ୍ତିରେଵେତ୍ୟଵଦଦୟି ଵିଭୋ ସିଦ୍ଧୟୋଗୀ ପ୍ରବୁଦ୍ଧଃ ॥9॥
ଦୁଃଖାନ୍ୟାଲୋକ୍ୟ ଜଂତୁଷ୍ଵଲମୁଦିତଵିଵେକୋଽହମାଚାର୍ୟଵର୍ୟା-
ଲ୍ଲବ୍ଧ୍ଵା ତ୍ଵଦ୍ରୂପତତ୍ତ୍ଵଂ ଗୁଣଚରିତକଥାଦ୍ୟୁଦ୍ଭଵଦ୍ଭକ୍ତିଭୂମା ।
ମାୟାମେନାଂ ତରିତ୍ଵା ପରମସୁଖମୟେ ତ୍ଵତ୍ପଦେ ମୋଦିତାହେ
ତସ୍ୟାୟଂ ପୂର୍ଵରଂଗଃ ପଵନପୁରପତେ ନାଶୟାଶେଷରୋଗାନ୍ ॥10॥