ବଂଧୁସ୍ନେହଂ ଵିଜହ୍ୟାଂ ତଵ ହି କରୁଣୟା ତ୍ଵୟ୍ୟୁପାଵେଶିତାତ୍ମା
ସର୍ଵଂ ତ୍ୟକ୍ତ୍ଵା ଚରେୟଂ ସକଲମପି ଜଗଦ୍ଵୀକ୍ଷ୍ୟ ମାୟାଵିଲାସମ୍ ।
ନାନାତ୍ଵାଦ୍ଭ୍ରାଂତିଜନ୍ୟାତ୍ ସତି ଖଲୁ ଗୁଣଦୋଷାଵବୋଧେ ଵିଧିର୍ଵା
ଵ୍ୟାସେଧୋ ଵା କଥଂ ତୌ ତ୍ଵୟି ନିହିତମତେର୍ଵୀତଵୈଷମ୍ୟବୁଦ୍ଧେଃ ॥1॥
କ୍ଷୁତ୍ତୃଷ୍ଣାଲୋପମାତ୍ରେ ସତତକୃତଧିୟୋ ଜଂତଵଃ ସଂତ୍ୟନଂତା-
ସ୍ତେଭ୍ୟୋ ଵିଜ୍ଞାନଵତ୍ତ୍ଵାତ୍ ପୁରୁଷ ଇହ ଵରସ୍ତଜ୍ଜନିର୍ଦୁର୍ଲଭୈଵ ।
ତତ୍ରାପ୍ୟାତ୍ମାତ୍ମନଃ ସ୍ୟାତ୍ସୁହୃଦପି ଚ ରିପୁର୍ୟସ୍ତ୍ଵୟି ନ୍ୟସ୍ତଚେତା-
ସ୍ତାପୋଚ୍ଛିତ୍ତେରୁପାୟଂ ସ୍ମରତି ସ ହି ସୁହୃତ୍ ସ୍ଵାତ୍ମଵୈରୀ ତତୋଽନ୍ୟଃ ॥2॥
ତ୍ଵତ୍କାରୁଣ୍ୟେ ପ୍ରଵୃତ୍ତେ କ ଇଵ ନହି ଗୁରୁର୍ଲୋକଵୃତ୍ତେଽପି ଭୂମନ୍
ସର୍ଵାକ୍ରାଂତାପି ଭୂମିର୍ନହି ଚଲତି ତତସ୍ସତ୍କ୍ଷମାଂ ଶିକ୍ଷୟେୟମ୍ ।
ଗୃହ୍ଣୀୟାମୀଶ ତତ୍ତଦ୍ଵିଷୟପରିଚୟେଽପ୍ୟପ୍ରସକ୍ତିଂ ସମୀରାତ୍
ଵ୍ୟାପ୍ତତ୍ଵଂଚାତ୍ମନୋ ମେ ଗଗନଗୁରୁଵଶାଦ୍ଭାତୁ ନିର୍ଲେପତା ଚ ॥3
ସ୍ଵଚ୍ଛଃ ସ୍ୟାଂ ପାଵନୋଽହଂ ମଧୁର ଉଦକଵଦ୍ଵହ୍ନିଵନ୍ମା ସ୍ମ ଗୃହ୍ଣାଂ
ସର୍ଵାନ୍ନୀନୋଽପି ଦୋଷଂ ତରୁଷୁ ତମିଵ ମାଂ ସର୍ଵଭୂତେଷ୍ଵଵେୟାମ୍ ।
ପୁଷ୍ଟିର୍ନଷ୍ଟିଃ କଲାନାଂ ଶଶିନ ଇଵ ତନୋର୍ନାତ୍ମନୋଽସ୍ତୀତି ଵିଦ୍ୟାଂ
ତୋୟାଦିଵ୍ୟସ୍ତମାର୍ତାଂଡଵଦପି ଚ ତନୁଷ୍ଵେକତାଂ ତ୍ଵତ୍ପ୍ରସାଦାତ୍ ॥4॥
ସ୍ନେହାଦ୍ଵ୍ୟାଧାତ୍ତପୁତ୍ରପ୍ରଣୟମୃତକପୋତାୟିତୋ ମା ସ୍ମ ଭୂଵଂ
ପ୍ରାପ୍ତଂ ପ୍ରାଶ୍ନନ୍ ସହେୟ କ୍ଷୁଧମପି ଶୟୁଵତ୍ ସିଂଧୁଵତ୍ସ୍ୟାମଗାଧଃ ।
ମା ପପ୍ତଂ ୟୋଷିଦାଦୌ ଶିଖିନି ଶଲଭଵତ୍ ଭୃଂଗଵତ୍ସାରଭାଗୀ
ଭୂୟାସଂ କିଂତୁ ତଦ୍ଵଦ୍ଧନଚୟନଵଶାନ୍ମାହମୀଶ ପ୍ରଣେଶମ୍ ॥5॥
ମା ବଦ୍ଧ୍ୟାସଂ ତରୁଣ୍ୟା ଗଜ ଇଵ ଵଶୟା ନାର୍ଜୟେୟଂ ଧନୌଘଂ
ହର୍ତାନ୍ୟସ୍ତଂ ହି ମାଧ୍ଵୀହର ଇଵ ମୃଗଵନ୍ମା ମୁହଂ ଗ୍ରାମ୍ୟଗୀତୈଃ ।
ନାତ୍ୟାସଜ୍ଜେୟ ଭୋଜ୍ୟେ ଝଷ ଇଵ ବଲିଶେ ପିଂଗଲାଵନ୍ନିରାଶଃ
ସୁପ୍ୟାଂ ଭର୍ତଵ୍ୟୟୋଗାତ୍ କୁରର ଇଵ ଵିଭୋ ସାମିଷୋଽନ୍ୟୈର୍ନ ହନ୍ୟୈ ॥6॥
ଵର୍ତେୟ ତ୍ୟକ୍ତମାନଃ ସୁଖମତିଶିଶୁଵନ୍ନିସ୍ସହାୟଶ୍ଚରେୟଂ
କନ୍ୟାୟା ଏକଶେଷୋ ଵଲୟ ଇଵ ଵିଭୋ ଵର୍ଜିତାନ୍ୟୋନ୍ୟଘୋଷଃ ।
ତ୍ଵଚ୍ଚିତ୍ତୋ ନାଵବୁଧ୍ୟୈ ପରମିଷୁକୃଦିଵ କ୍ଷ୍ମାଭୃଦାୟାନଘୋଷଂ
ଗେହେଷ୍ଵନ୍ୟପ୍ରଣୀତେଷ୍ଵହିରିଵ ନିଵସାନ୍ୟୁଂଦୁରୋର୍ମଂଦିରେଷୁ ॥7॥
ତ୍ଵୟ୍ୟେଵ ତ୍ଵତ୍କୃତଂ ତ୍ଵଂ କ୍ଷପୟସି ଜଗଦିତ୍ୟୂର୍ଣନାଭାତ୍ ପ୍ରତୀୟାଂ
ତ୍ଵଚ୍ଚିଂତା ତ୍ଵତ୍ସ୍ଵରୂପଂ କୁରୁତ ଇତି ଦୃଢଂ ଶିକ୍ଷୟେ ପେଶକାରାତ୍ ।
ଵିଡ୍ଭସ୍ମାତ୍ମା ଚ ଦେହୋ ଭଵତି ଗୁରୁଵରୋ ୟୋ ଵିଵେକଂ ଵିରକ୍ତିଂ
ଧତ୍ତେ ସଂଚିଂତ୍ୟମାନୋ ମମ ତୁ ବହୁରୁଜାପୀଡିତୋଽୟଂ ଵିଶେଷାତ୍ ॥8॥
ହୀ ହୀ ମେ ଦେହମୋହଂ ତ୍ୟଜ ପଵନପୁରାଧୀଶ ୟତ୍ପ୍ରେମହେତୋ-
ର୍ଗେହେ ଵିତ୍ତେ କଲତ୍ରାଦିଷୁ ଚ ଵିଵଶିତାସ୍ତ୍ଵତ୍ପଦଂ ଵିସ୍ମରଂତି ।
ସୋଽୟଂ ଵହ୍ନେଶ୍ଶୁନୋ ଵା ପରମିହ ପରତଃ ସାଂପ୍ରତଂଚାକ୍ଷିକର୍ଣ-
ତ୍ଵଗ୍ଜିହ୍ଵାଦ୍ୟା ଵିକର୍ଷଂତ୍ୟଵଶମତ ଇତଃ କୋଽପି ନ ତ୍ଵତ୍ପଦାବ୍ଜେ ॥9॥
ଦୁର୍ଵାରୋ ଦେହମୋହୋ ୟଦି ପୁନରଧୁନା ତର୍ହି ନିଶ୍ଶେଷରୋଗାନ୍
ହୃତ୍ଵା ଭକ୍ତିଂ ଦ୍ରଢିଷ୍ଠାଂ କୁରୁ ତଵ ପଦପଂକେରୁହେ ପଂକଜାକ୍ଷ ।
ନୂନଂ ନାନାଭଵାଂତେ ସମଧିଗତମମୁଂ ମୁକ୍ତିଦଂ ଵିପ୍ରଦେହଂ
କ୍ଷୁଦ୍ରେ ହା ହଂତ ମା ମା କ୍ଷିପ ଵିଷୟରସେ ପାହି ମାଂ ମାରୁତେଶ ॥10॥