ଶୁଦ୍ଧା ନିଷ୍କାମଧର୍ମୈଃ ପ୍ରଵରଗୁରୁଗିରା ତତ୍ସ୍ଵରୂପଂ ପରଂ ତେ
ଶୁଦ୍ଧଂ ଦେହେଂଦ୍ରିୟାଦିଵ୍ୟପଗତମଖିଲଵ୍ୟାପ୍ତମାଵେଦୟଂତେ ।
ନାନାତ୍ଵସ୍ଥୌଲ୍ୟକାର୍ଶ୍ୟାଦି ତୁ ଗୁଣଜଵପୁସ୍ସଂଗତୋଽଧ୍ୟାସିତଂ ତେ
ଵହ୍ନେର୍ଦାରୁପ୍ରଭେଦେଷ୍ଵିଵ ମହଦଣୁତାଦୀପ୍ତତାଶାଂତତାଦି ॥1॥
ଆଚାର୍ୟାଖ୍ୟାଧରସ୍ଥାରଣିସମନୁମିଲଚ୍ଛିଷ୍ୟରୂପୋତ୍ତରାର-
ଣ୍ୟାଵେଧୋଦ୍ଭାସିତେନ ସ୍ଫୁଟତରପରିବୋଧାଗ୍ନିନା ଦହ୍ୟମାନେ ।
କର୍ମାଲୀଵାସନାତତ୍କୃତତନୁଭୁଵନଭ୍ରାଂତିକାଂତାରପୂରେ
ଦାହ୍ୟାଭାଵେନ ଵିଦ୍ୟାଶିଖିନି ଚ ଵିରତେ ତ୍ଵନ୍ମୟୀ ଖଲ୍ଵଵସ୍ଥା ॥2॥
ଏଵଂ ତ୍ଵତ୍ପ୍ରାପ୍ତିତୋଽନ୍ୟୋ ନହି ଖଲୁ ନିଖିଲକ୍ଲେଶହାନେରୁପାୟୋ
ନୈକାଂତାତ୍ୟଂତିକାସ୍ତେ କୃଷିଵଦଗଦଷାଡ୍ଗୁଣ୍ୟଷଟ୍କର୍ମୟୋଗାଃ ।
ଦୁର୍ଵୈକଲ୍ୟୈରକଲ୍ୟା ଅପି ନିଗମପଥାସ୍ତତ୍ଫଲାନ୍ୟପ୍ୟଵାପ୍ତା
ମତ୍ତାସ୍ତ୍ଵାଂ ଵିସ୍ମରଂତଃ ପ୍ରସଜତି ପତନେ ୟାଂତ୍ୟନଂତାନ୍ ଵିଷାଦାନ୍॥3॥
ତ୍ଵଲ୍ଲୋକାଦନ୍ୟଲୋକଃ କ୍ଵନୁ ଭୟରହିତୋ ୟତ୍ ପରାର୍ଧଦ୍ଵୟାଂତେ
ତ୍ଵଦ୍ଭୀତସ୍ସତ୍ୟଲୋକେଽପି ନ ସୁଖଵସତିଃ ପଦ୍ମଭୂଃ ପଦ୍ମନାଭ ।
ଏଵଂ ଭାଵେ ତ୍ଵଧର୍ମାର୍ଜିତବହୁତମସାଂ କା କଥା ନାରକାଣାଂ
ତନ୍ମେ ତ୍ଵଂ ଛିଂଧି ବଂଧଂ ଵରଦ୍ କୃପଣବଂଧୋ କୃପାପୂରସିଂଧୋ ॥4॥
ୟାଥାର୍ଥ୍ୟାତ୍ତ୍ଵନ୍ମୟସ୍ୟୈଵ ହି ମମ ନ ଵିଭୋ ଵସ୍ତୁତୋ ବଂଧମୋକ୍ଷୌ
ମାୟାଵିଦ୍ୟାତନୁଭ୍ୟାଂ ତଵ ତୁ ଵିରଚିତୌ ସ୍ଵପ୍ନବୋଧୋପମୌ ତୌ ।
ବଦ୍ଧେ ଜୀଵଦ୍ଵିମୁକ୍ତିଂ ଗତଵତି ଚ ଭିଦା ତାଵତୀ ତାଵଦେକୋ
ଭୁଂକ୍ତେ ଦେହଦ୍ରୁମସ୍ଥୋ ଵିଷୟଫଲରସାନ୍ନାପରୋ ନିର୍ଵ୍ୟଥାତ୍ମା ॥5॥
ଜୀଵନ୍ମୁକ୍ତତ୍ଵମେଵଂଵିଧମିତି ଵଚସା କିଂ ଫଲଂ ଦୂରଦୂରେ
ତନ୍ନାମାଶୁଦ୍ଧବୁଦ୍ଧେର୍ନ ଚ ଲଘୁ ମନସଶ୍ଶୋଧନଂ ଭକ୍ତିତୋଽନ୍ୟତ୍ ।
ତନ୍ମେ ଵିଷ୍ଣୋ କୃଷୀଷ୍ଠାସ୍ତ୍ଵୟି କୃତସକଲପ୍ରାର୍ପଣଂ ଭକ୍ତିଭାରଂ
ୟେନ ସ୍ୟାଂ ମଂକ୍ଷୁ କିଂଚିଦ୍ ଗୁରୁଵଚନମିଲତ୍ତ୍ଵତ୍ପ୍ରବୋଧସ୍ତ୍ଵଦାତ୍ମା ॥6॥
ଶବ୍ଦ୍ବ୍ରହ୍ମଣ୍ୟପୀହ ପ୍ରୟତିତମନସସ୍ତ୍ଵାଂ ନ ଜାନଂତି କେଚିତ୍
କଷ୍ଟଂ ଵଂଧ୍ୟଶ୍ରମାସ୍ତେ ଚିରତରମିହ ଗାଂ ବିଭ୍ରତେ ନିଷ୍ପ୍ରସୂତିମ୍ ।
ୟସ୍ୟାଂ ଵିଶ୍ଵାଭିରାମାସ୍ସକଲମଲହରା ଦିଵ୍ୟଲୀଲାଵତାରାଃ
ସଚ୍ଚିତ୍ସାଂଦ୍ରଂ ଚ ରୂପଂ ତଵ ନ ନିଗଦିତଂ ତାଂ ନ ଵାଚଂ ଭ୍ରିୟାସମ୍ ॥7॥
ୟୋ ୟାଵାନ୍ ୟାଦୃଶୋ ଵା ତ୍ଵମିତି କିମପି ନୈଵାଵଗଚ୍ଛାମି ଭୂମ୍-
ନ୍ନେଵଂଚାନନ୍ୟଭାଵସ୍ତ୍ଵଦନୁଭଜନମେଵାଦ୍ରିୟେ ଚୈଦ୍ୟଵୈରିନ୍ ।
ତ୍ଵଲ୍ଲିଂଗାନାଂ ତ୍ଵଦଂଘ୍ରିପ୍ରିୟଜନସଦସାଂ ଦର୍ଶନସ୍ପର୍ଶନାଦି-
ର୍ଭୂୟାନ୍ମେ ତ୍ଵତ୍ପ୍ରପୂଜାନତିନୁତିଗୁଣକର୍ମାନୁକୀର୍ତ୍ୟାଦରୋଽପି ॥8॥
ୟଦ୍ୟଲ୍ଲଭ୍ୟେତ ତତ୍ତତ୍ତଵ ସମୁପହୃତଂ ଦେଵ ଦାସୋଽସ୍ମି ତେଽହଂ
ତ୍ଵଦ୍ଗେହୋନ୍ମାର୍ଜନାଦ୍ୟଂ ଭଵତୁ ମମ ମୁହୁଃ କର୍ମ ନିର୍ମାୟମେଵ ।
ସୂର୍ୟାଗ୍ନିବ୍ରାହ୍ମଣାତ୍ମାଦିଷୁ ଲସିତଚତୁର୍ବାହୁମାରାଧୟେ ତ୍ଵାଂ
ତ୍ଵତ୍ପ୍ରେମାର୍ଦ୍ରତ୍ଵରୂପୋ ମମ ସତତମଭିଷ୍ୟଂଦତାଂ ଭକ୍ତିୟୋଗଃ ॥9॥
ଐକ୍ୟଂ ତେ ଦାନହୋମଵ୍ରତନିୟମତପସ୍ସାଂଖ୍ୟୟୋଗୈର୍ଦୁରାପଂ
ତ୍ଵତ୍ସଂଗେନୈଵ ଗୋପ୍ୟଃ କିଲ ସୁକୃତିତମା ପ୍ରାପୁରାନଂଦସାଂଦ୍ରମ୍ ।
ଭକ୍ତେଷ୍ଵନ୍ୟେଷୁ ଭୂୟସ୍ସ୍ଵପି ବହୁମନୁଷେ ଭକ୍ତିମେଵ ତ୍ଵମାସାଂ
ତନ୍ମେ ତ୍ଵଦ୍ଭକ୍ତିମେଵ ଦ୍ରଢୟ ହର ଗଦାନ୍ କୃଷ୍ଣ ଵାତାଲୟେଶ ॥10॥