ଆଦୌ ହୈରଣ୍ୟଗର୍ଭୀଂ ତନୁମଵିକଲଜୀଵାତ୍ମିକାମାସ୍ଥିତସ୍ତ୍ଵଂ
ଜୀଵତ୍ଵଂ ପ୍ରାପ୍ୟ ମାୟାଗୁଣଗଣଖଚିତୋ ଵର୍ତସେ ଵିଶ୍ଵୟୋନେ ।
ତତ୍ରୋଦ୍ଵୃଦ୍ଧେନ ସତ୍ତ୍ଵେନ ତୁ ଗୁଣୟୁଗଲଂ ଭକ୍ତିଭାଵଂ ଗତେନ
ଛିତ୍ଵା ସତ୍ତ୍ଵଂ ଚ ହିତ୍ଵା ପୁନରନୁପହିତୋ ଵର୍ତିତାହେ ତ୍ଵମେଵ ॥1॥
ସତ୍ତ୍ଵୋନ୍ମେଷାତ୍ କଦାଚିତ୍ ଖଲୁ ଵିଷୟରସେ ଦୋଷବୋଧେଽପି ଭୂମନ୍
ଭୂୟୋଽପ୍ୟେଷୁ ପ୍ରଵୃତ୍ତିସ୍ସତମସି ରଜସି ପ୍ରୋଦ୍ଧତେ ଦୁର୍ନିଵାରା ।
ଚିତ୍ତଂ ତାଵଦ୍ଗୁଣାଶ୍ଚ ଗ୍ରଥିତମିହ ମିଥସ୍ତାନି ସର୍ଵାଣି ରୋଦ୍ଧୁଂ
ତୁର୍ୟେ ତ୍ଵୟ୍ୟେକଭକ୍ତିଶ୍ଶରଣମିତି ଭଵାନ୍ ହଂସରୂପୀ ନ୍ୟଗାଦୀତ୍ ॥2॥
ସଂତି ଶ୍ରେୟାଂସି ଭୂୟାଂସ୍ୟପି ରୁଚିଭିଦୟା କର୍ମିଣାଂ ନିର୍ମିତାନି
କ୍ଷୁଦ୍ରାନଂଦାଶ୍ଚ ସାଂତା ବହୁଵିଧଗତୟଃ କୃଷ୍ଣ ତେଭ୍ୟୋ ଭଵେୟୁଃ ।
ତ୍ଵଂ ଚାଚଖ୍ୟାଥ ସଖ୍ୟେ ନନୁ ମହିତତମାଂ ଶ୍ରେୟସାଂ ଭକ୍ତିମେକାଂ
ତ୍ଵଦ୍ଭକ୍ତ୍ୟାନଂଦତୁଲ୍ୟଃ ଖଲୁ ଵିଷୟଜୁଷାଂ ସମ୍ମଦଃ କେନ ଵା ସ୍ୟାତ୍ ॥3॥
ତ୍ଵତ୍ଭକ୍ତ୍ୟା ତୁଷ୍ଟବୁଦ୍ଧେଃ ସୁଖମିହ ଚରତୋ ଵିଚ୍ୟୁତାଶସ୍ୟ ଚାଶାଃ
ସର୍ଵାଃ ସ୍ୟୁଃ ସୌଖ୍ୟମୟ୍ୟଃ ସଲିଲକୁହରଗସ୍ୟେଵ ତୋୟୈକମୟ୍ୟଃ ।
ସୋଽୟଂ ଖଲ୍ଵିଂଦ୍ରଲୋକଂ କମଲଜଭଵନଂ ୟୋଗସିଦ୍ଧୀଶ୍ଚ ହୃଦ୍ୟାଃ
ନାକାଂକ୍ଷତ୍ୟେତଦାସ୍ତାଂ ସ୍ଵୟମନୁପତିତେ ମୋକ୍ଷସୌଖ୍ୟେଽପ୍ୟନୀହଃ ॥4॥
ତ୍ଵଦ୍ଭକ୍ତୋ ବାଧ୍ୟମାନୋଽପି ଚ ଵିଷୟରସୈରିଂଦ୍ରିୟାଶାଂତିହେତୋ-
ର୍ଭକ୍ତ୍ୟୈଵାକ୍ରମ୍ୟମାଣୈଃ ପୁନରପି ଖଲୁ ତୈର୍ଦୁର୍ବଲୈର୍ନାଭିଜୟ୍ୟଃ ।
ସପ୍ତାର୍ଚିର୍ଦୀପିତାର୍ଚିର୍ଦହତି କିଲ ୟଥା ଭୂରିଦାରୁପ୍ରପଂଚଂ
ତ୍ଵଦ୍ଭକ୍ତ୍ୟୋଘେ ତଥୈଵ ପ୍ରଦହତି ଦୁରିତଂ ଦୁର୍ମଦଃ କ୍ଵେଂଦ୍ରିୟାଣାମ୍ ॥5॥
ଚିତ୍ତାର୍ଦ୍ରୀଭାଵମୁଚ୍ଚୈର୍ଵପୁଷି ଚ ପୁଲକଂ ହର୍ଷଵାଷ୍ପଂ ଚ ହିତ୍ଵା
ଚିତ୍ତଂ ଶୁଦ୍ଧ୍ୟେତ୍କଥଂ ଵା କିମୁ ବହୁତପସା ଵିଦ୍ୟୟା ଵୀତଭକ୍ତେଃ ।
ତ୍ଵଦ୍ଗାଥାସ୍ଵାଦସିଦ୍ଧାଂଜନସତତମରୀମୃଜ୍ୟମାନୋଽୟମାତ୍ମା
ଚକ୍ଷୁର୍ଵତ୍ତତ୍ତ୍ଵସୂକ୍ଷ୍ମଂ ଭଜତି ନ ତୁ ତଥାଽଭ୍ୟସ୍ତୟା ତର୍କକୋଟ୍ୟା॥6॥
ଧ୍ୟାନଂ ତେ ଶୀଲୟେୟଂ ସମତନୁସୁଖବଦ୍ଧାସନୋ ନାସିକାଗ୍ର-
ନ୍ୟସ୍ତାକ୍ଷଃ ପୂରକାଦ୍ୟୈର୍ଜିତପଵନପଥଶ୍ଚିତ୍ତପଦ୍ମଂ ତ୍ଵଵାଂଚମ୍।
ଊର୍ଧ୍ଵାଗ୍ରଂ ଭାଵୟିତ୍ଵା ରଵିଵିଧୁଶିଖିନଃ ସଂଵିଚିଂତ୍ୟୋପରିଷ୍ଟାତ୍
ତତ୍ରସ୍ଥଂ ଭାଵୟେ ତ୍ଵାଂ ସଜଲଜଲଧରଶ୍ୟାମଲଂ କୋମଲାଂଗମ୍ ॥7॥
ଆନୀଲଶ୍ଲକ୍ଷ୍ଣକେଶଂ ଜ୍ଵଲିତମକରସତ୍କୁଂଡଲଂ ମଂଦହାସ-
ସ୍ୟଂଦାର୍ଦ୍ରଂ କୌସ୍ତୁଭଶ୍ରୀପରିଗତଵନମାଲୋରୁହାରାଭିରାମମ୍ ।
ଶ୍ରୀଵତ୍ସାଂକଂ ସୁବାହୁଂ ମୃଦୁଲସଦୁଦରଂ କାଂଚନଚ୍ଛାୟଚେଲଂ
ଚାରୁସ୍ନିଗ୍ଧୋରୁମଂଭୋରୁହଲଲିତପଦଂ ଭାଵୟେଽହଂ ଭଵଂତମ୍ ॥8॥
ସର୍ଵାଂଗେଷ୍ଵଂଗ ରଂଗତ୍କୁତୁକମିତି ମୁହୁର୍ଧାରୟନ୍ନୀଶ ଚିତ୍ତଂ
ତତ୍ରାପ୍ୟେକତ୍ର ୟୁଂଜେ ଵଦନସରସିଜେ ସୁଂଦରେ ମଂଦହାସେ
ତତ୍ରାଲୀନଂ ତୁ ଚେତଃ ପରମସୁଖଚିଦଦ୍ଵୈତରୂପେ ଵିତନ୍ଵ-
ନ୍ନନ୍ୟନ୍ନୋ ଚିଂତୟେୟଂ ମୁହୁରିତି ସମୁପାରୂଢୟୋଗୋ ଭଵେୟମ୍ ॥9॥
ଇତ୍ଥଂ ତ୍ଵଦ୍ଧ୍ୟାନୟୋଗେ ସତି ପୁନରଣିମାଦ୍ୟଷ୍ଟସଂସିଦ୍ଧୟସ୍ତାଃ
ଦୂରଶ୍ରୁତ୍ୟାଦୟୋଽପି ହ୍ୟହମହମିକୟା ସଂପତେୟୁର୍ମୁରାରେ ।
ତ୍ଵତ୍ସଂପ୍ରାପ୍ତୌ ଵିଲଂବାଵହମଖିଲମିଦଂ ନାଦ୍ରିୟେ କାମୟେଽହଂ
ତ୍ଵାମେଵାନଂଦପୂର୍ଣଂ ପଵନପୁରପତେ ପାହି ମାଂ ସର୍ଵତାପାତ୍ ॥10॥