ତ୍ଵଂ ହି ବ୍ରହ୍ମୈଵ ସାକ୍ଷାତ୍ ପରମୁରୁମହିମନ୍ନକ୍ଷରାଣାମକାର-
ସ୍ତାରୋ ମଂତ୍ରେଷୁ ରାଜ୍ଞାଂ ମନୁରସି ମୁନିଷୁ ତ୍ଵଂ ଭୃଗୁର୍ନାରଦୋଽପି ।
ପ୍ରହ୍ଲାଦୋ ଦାନଵାନାଂ ପଶୁଷୁ ଚ ସୁରଭିଃ ପକ୍ଷିଣାଂ ଵୈନତେୟୋ
ନାଗାନାମସ୍ୟନଂତସ୍ସୁରସରିଦପି ଚ ସ୍ରୋତସାଂ ଵିଶ୍ଵମୂର୍ତେ ॥1॥
ବ୍ରହ୍ମଣ୍ୟାନାଂ ବଲିସ୍ତ୍ଵଂ କ୍ରତୁଷୁ ଚ ଜପୟଜ୍ଞୋଽସି ଵୀରେଷୁ ପାର୍ଥୋ
ଭକ୍ତାନାମୁଦ୍ଧଵସ୍ତ୍ଵଂ ବଲମସି ବଲିନାଂ ଧାମ ତେଜସ୍ଵିନାଂ ତ୍ଵମ୍ ।
ନାସ୍ତ୍ୟଂତସ୍ତ୍ଵଦ୍ଵିଭୂତେର୍ଵିକସଦତିଶୟଂ ଵସ୍ତୁ ସର୍ଵଂ ତ୍ଵମେଵ
ତ୍ଵଂ ଜୀଵସ୍ତ୍ଵଂ ପ୍ରଧାନଂ ୟଦିହ ଭଵଦୃତେ ତନ୍ନ କିଂଚିତ୍ ପ୍ରପଂଚେ ॥2॥
ଧର୍ମଂ ଵର୍ଣାଶ୍ରମାଣାଂ ଶ୍ରୁତିପଥଵିହିତଂ ତ୍ଵତ୍ପରତ୍ଵେନ ଭକ୍ତ୍ୟା
କୁର୍ଵଂତୋଽଂତର୍ଵିରାଗେ ଵିକସତି ଶନକୈଃ ସଂତ୍ୟଜଂତୋ ଲଭଂତେ ।
ସତ୍ତାସ୍ଫୂର୍ତିପ୍ରିୟତ୍ଵାତ୍ମକମଖିଲପଦାର୍ଥେଷୁ ଭିନ୍ନେଷ୍ଵଭିନ୍ନଂ
ନିର୍ମୂଲଂ ଵିଶ୍ଵମୂଲଂ ପରମମହମିତି ତ୍ଵଦ୍ଵିବୋଧଂ ଵିଶୁଦ୍ଧମ୍ ॥3॥
ଜ୍ଞାନଂ କର୍ମାପି ଭକ୍ତିସ୍ତ୍ରିତୟମିହ ଭଵତ୍ପ୍ରାପକଂ ତତ୍ର ତାଵ-
ନ୍ନିର୍ଵିଣ୍ଣାନାମଶେଷେ ଵିଷୟ ଇହ ଭଵେତ୍ ଜ୍ଞାନୟୋଗେଽଧିକାରଃ ।
ସକ୍ତାନାଂ କର୍ମୟୋଗସ୍ତ୍ଵୟି ହି ଵିନିହିତୋ ୟେ ତୁ ନାତ୍ୟଂତସକ୍ତାଃ
ନାପ୍ୟତ୍ୟଂତଂ ଵିରକ୍ତାସ୍ତ୍ଵୟି ଚ ଧୃତରସା ଭକ୍ତିୟୋଗୋ ହ୍ୟମୀଷାମ୍ ॥4॥
ଜ୍ଞାନଂ ତ୍ଵଦ୍ଭକ୍ତତାଂ ଵା ଲଘୁ ସୁକୃତଵଶାନ୍ମର୍ତ୍ୟଲୋକେ ଲଭଂତେ
ତସ୍ମାତ୍ତତ୍ରୈଵ ଜନ୍ମ ସ୍ପୃହୟତି ଭଗଵନ୍ ନାକଗୋ ନାରକୋ ଵା ।
ଆଵିଷ୍ଟଂ ମାଂ ତୁ ଦୈଵାଦ୍ଭଵଜଲନିଧିପୋତାୟିତେ ମର୍ତ୍ୟଦେହେ
ତ୍ଵଂ କୃତ୍ଵା କର୍ଣଧାରଂ ଗୁରୁମନୁଗୁଣଵାତାୟିତସ୍ତାରୟେଥାଃ ॥5॥
ଅଵ୍ୟକ୍ତଂ ମାର୍ଗୟଂତଃ ଶ୍ରୁତିଭିରପି ନୟୈଃ କେଵଲଜ୍ଞାନଲୁବ୍ଧାଃ
କ୍ଲିଶ୍ୟଂତେଽତୀଵ ସିଦ୍ଧିଂ ବହୁତରଜନୁଷାମଂତ ଏଵାପ୍ନୁଵଂତି ।
ଦୂରସ୍ଥଃ କର୍ମୟୋଗୋଽପି ଚ ପରମଫଲେ ନନ୍ଵୟଂ ଭକ୍ତିୟୋଗ-
ସ୍ତ୍ଵାମୂଲାଦେଵ ହୃଦ୍ୟସ୍ତ୍ଵରିତମୟି ଭଵତ୍ପ୍ରାପକୋ ଵର୍ଧତାଂ ମେ ॥6॥
ଜ୍ଞାନାୟୈଵାତିୟତ୍ନଂ ମୁନିରପଵଦତେ ବ୍ରହ୍ମତତ୍ତ୍ଵଂ ତୁ ଶୃଣ୍ଵନ୍
ଗାଢଂ ତ୍ଵତ୍ପାଦଭକ୍ତିଂ ଶରଣମୟତି ୟସ୍ତସ୍ୟ ମୁକ୍ତିଃ କରାଗ୍ରେ ।
ତ୍ଵଦ୍ଧ୍ୟାନେଽପୀହ ତୁଲ୍ୟା ପୁନରସୁକରତା ଚିତ୍ତଚାଂଚଲ୍ୟହେତୋ-
ରଭ୍ୟାସାଦାଶୁ ଶକ୍ୟଂ ତଦପି ଵଶୟିତୁଂ ତ୍ଵତ୍କୃପାଚାରୁତାଭ୍ୟାମ୍ ॥7॥
ନିର୍ଵିଣ୍ଣଃ କର୍ମମାର୍ଗେ ଖଲୁ ଵିଷମତମେ ତ୍ଵତ୍କଥାଦୌ ଚ ଗାଢଂ
ଜାତଶ୍ରଦ୍ଧୋଽପି କାମାନୟି ଭୁଵନପତେ ନୈଵ ଶକ୍ନୋମି ହାତୁମ୍ ।
ତଦ୍ଭୂୟୋ ନିଶ୍ଚୟେନ ତ୍ଵୟି ନିହିତମନା ଦୋଷବୁଦ୍ଧ୍ୟା ଭଜଂସ୍ତାନ୍
ପୁଷ୍ଣୀୟାଂ ଭକ୍ତିମେଵ ତ୍ଵୟି ହୃଦୟଗତେ ମଂକ୍ଷୁ ନଂକ୍ଷ୍ୟଂତି ସଂଗାଃ ॥8॥
କଶ୍ଚିତ୍ କ୍ଲେଶାର୍ଜିତାର୍ଥକ୍ଷୟଵିମଲମତିର୍ନୁଦ୍ୟମାନୋ ଜନୌଘୈଃ
ପ୍ରାଗେଵଂ ପ୍ରାହ ଵିପ୍ରୋ ନ ଖଲୁ ମମ ଜନଃ କାଲକର୍ମଗ୍ରହା ଵା।
ଚେତୋ ମେ ଦୁଃଖହେତୁସ୍ତଦିହ ଗୁଣଗଣଂ ଭାଵୟତ୍ସର୍ଵକାରୀ-
ତ୍ୟୁକ୍ତ୍ଵା ଶାଂତୋ ଗତସ୍ତ୍ଵାଂ ମମ ଚ କୁରୁ ଵିଭୋ ତାଦୃଶୀ ଚିତ୍ତଶାଂତିମ୍ ॥9॥
ଐଲଃ ପ୍ରାଗୁର୍ଵଶୀଂ ପ୍ରତ୍ୟତିଵିଵଶମନାଃ ସେଵମାନଶ୍ଚିରଂ ତାଂ
ଗାଢଂ ନିର୍ଵିଦ୍ୟ ଭୂୟୋ ୟୁଵତିସୁଖମିଦଂ କ୍ଷୁଦ୍ରମେଵେତି ଗାୟନ୍ ।
ତ୍ଵଦ୍ଭକ୍ତିଂ ପ୍ରାପ୍ୟ ପୂର୍ଣଃ ସୁଖତରମଚରତ୍ତଦ୍ଵଦୁଦ୍ଧୂତସଂଗଂ
ଭକ୍ତୋତ୍ତଂସଂ କ୍ରିୟା ମାଂ ପଵନପୁରପତେ ହଂତ ମେ ରୁଂଧି ରୋଗାନ୍ ॥10॥