ପାଂଡଵଗୀତା

ପ୍ରହ୍ଲାଦନାରଦପରାଶରପୁଂଡରୀକ-
ଵ୍ୟାସାଂବରୀଷଶୁକଶୌନକଭୀଷ୍ମକାଵ୍ୟାଃ ।
ରୁକ୍ମାଂଗଦାର୍ଜୁନଵସିଷ୍ଠଵିଭୀଷଣାଦ୍ୟା
ଏତାନହଂ ପରମଭାଗଵତାନ୍ ନମାମି ॥ 1॥

ଲୋମହର୍ଷଣ ଉଵାଚ ।
ଧର୍ମୋ ଵିଵର୍ଧତି ୟୁଧିଷ୍ଠିରକୀର୍ତନେନ
ପାପଂ ପ୍ରଣଶ୍ୟତି ଵୃକୋଦରକୀର୍ତନେନ ।
ଶତ୍ରୁର୍ଵିନଶ୍ୟତି ଧନଂଜୟକୀର୍ତନେନ
ମାଦ୍ରୀସୁତୌ କଥୟତାଂ ନ ଭଵଂତି ରୋଗାଃ ॥ 2॥

ବ୍ରହ୍ମୋଵାଚ ।
ୟେ ମାନଵା ଵିଗତରାଗପରାଽପରଜ୍ଞା
ନାରାୟଣଂ ସୁରଗୁରୁଂ ସତତଂ ସ୍ମରଂତି ।
ଧ୍ୟାନେନ ତେନ ହତକିଲ୍ବିଷ ଚେତନାସ୍ତେ
ମାତୁଃ ପୟୋଧରରସଂ ନ ପୁନଃ ପିବଂତି ॥ 3॥

ଇଂଦ୍ର ଉଵାଚ ।
ନାରାୟଣୋ ନାମ ନରୋ ନରାଣାଂ
ପ୍ରସିଦ୍ଧଚୌରଃ କଥିତଃ ପୃଥିଵ୍ୟାମ୍ ।
ଅନେକଜନ୍ମାର୍ଜିତପାପସଂଚୟଂ
ହରତ୍ୟଶେଷଂ ସ୍ମୃତମାତ୍ର ଏଵ ୟଃ ॥ 4॥

ୟୁଧିଷ୍ଠିର ଉଵାଚ ।
ମେଘଶ୍ୟାମଂ ପୀତକୌଶେୟଵାସଂ
ଶ୍ରୀଵତ୍ସାଂକଂ କୌସ୍ତୁଭୋଦ୍ଭାସିତାଂଗମ୍ ।
ପୁଣ୍ୟୋପେତଂ ପୁଂଡରୀକାୟତାକ୍ଷଂ
ଵିଷ୍ଣୁଂ ଵଂଦେ ସର୍ଵଲୋକୈକନାଥମ୍ ॥ 5॥

ଭୀମ ଉଵାଚ ।
ଜଲୌଘମଗ୍ନା ସଚରାଽଚରା ଧରା
ଵିଷାଣକୋଟ୍ୟାଽଖିଲଵିଶ୍ଵମୂର୍ତିନା ।
ସମୁଦ୍ଧୃତା ୟେନ ଵରାହରୂପିଣା
ସ ମେ ସ୍ଵୟଂଭୂର୍ଭଗଵାନ୍ ପ୍ରସୀଦରୁ ॥ 6॥

ଅର୍ଜୁନ ଉଵାଚ ।
ଅଚିଂତ୍ୟମଵ୍ୟକ୍ତମନଂତମଵ୍ୟୟଂ
ଵିଭୁଂ ପ୍ରଭୁଂ ଭାଵିତଵିଶ୍ଵଭାଵନମ୍ ।
ତ୍ରୈଲୋକ୍ୟଵିସ୍ତାରଵିଚାରକାରକଂ
ହରିଂ ପ୍ରପନ୍ନୋଽସ୍ମି ଗତିଂ ମହାତ୍ମନାମ୍ ॥ 7॥

ନକୁଲ ଉଵାଚ ।
ୟଦି ଗମନମଧସ୍ତାତ୍ କାଲପାଶାନୁବଂଧାଦ୍
ୟଦି ଚ କୁଲଵିହୀନେ ଜାୟତେ ପକ୍ଷିକୀଟେ ।
କୃମିଶତମପି ଗତ୍ଵା ଧ୍ୟାୟତେ ଚାଂତରାତ୍ମା
ମମ ଭଵତୁ ହୃଦିସ୍ଥା କେଶଵେ ଭକ୍ତିରେକା ॥ 8॥

ସହଦେଵ ଉଵାଚ ।
ତସ୍ୟ ୟଜ୍ଞଵରାହସ୍ୟ ଵିଷ୍ଣୋରତୁଲତେଜସଃ ।
ପ୍ରଣାମଂ ୟେ ପ୍ରକୁର୍ଵଂତି ତେଷାମପି ନମୋ ନମଃ ॥ 9॥

କୁଂତୀ ଉଵାଚ ।
ସ୍ଵକର୍ମଫଲନିର୍ଦିଷ୍ଟାଂ ୟାଂ ୟାଂ ୟୋନିଂ ଵ୍ରଜାମ୍ୟହମ୍ ।
ତସ୍ୟାଂ ତସ୍ୟାଂ ହୃଷୀକେଶ ତ୍ଵୟି ଭକ୍ତିର୍ଦୃଢାଽସ୍ତୁ ମେ ॥ 10॥

ମାଦ୍ରୀ ଉଵାଚ ।
କୃଷ୍ଣେ ରତାଃ କୃଷ୍ଣମନୁସ୍ମରଂତି
ରାତ୍ରୌ ଚ କୃଷ୍ଣଂ ପୁନରୁତ୍ଥିତା ୟେ ।
ତେ ଭିନ୍ନଦେହାଃ ପ୍ରଵିଶଂତି କୃଷ୍ଣେ
ହଵିର୍ୟଥା ମଂତ୍ରହୁତଂ ହୁତାଶେ ॥ 11॥

ଦ୍ରୌପଦୀ ଉଵାଚ ।
କୀଟେଷୁ ପକ୍ଷିଷୁ ମୃଗେଷୁ ସରୀସୃପେଷୁ
ରକ୍ଷଃପିଶାଚମନୁଜେଷ୍ଵପି ୟତ୍ର ୟତ୍ର ।
ଜାତସ୍ୟ ମେ ଭଵତୁ କେଶଵ ତ୍ଵତ୍ପ୍ରସାଦାତ୍
ତ୍ଵୟ୍ୟେଵ ଭକ୍ତିରଚଲାଽଵ୍ୟଭିଚାରିଣୀ ଚ ॥ 12॥

ସୁଭଦ୍ରା ଉଵାଚ ।
ଏକୋଽପି କୃଷ୍ଣସ୍ୟ କୃତଃ ପ୍ରଣାମୋ
ଦଶାଶ୍ଵମେଧାଵଭୃଥେନ ତୁଲ୍ୟଃ ।
ଦଶାଶ୍ଵମେଧୀ ପୁନରେତି ଜନ୍ମ
କୃଷ୍ଣପ୍ରଣାମୀ ନ ପୁନର୍ଭଵାୟ ॥ 13॥

ଅଭିମନ୍ୟୁରୁଵାଚ ।
ଗୋଵିଂଦ ଗୋଵିଂଦ ହରେ ମୁରାରେ
ଗୋଵିଂଦ ଗୋଵିଂଦ ମୁକୁଂଦ କୃଷ୍ଣ
ଗୋଵିଂଦ ଗୋଵିଂଦ ରଥାଂଗପାଣେ ।
ଗୋଵିଂଦ ଗୋଵିଂଦ ନମାମି ନିତ୍ୟମ୍ ॥ 14॥

ଧୃଷ୍ଟଦ୍ୟୁମ୍ନ ଉଵାଚ ।
ଶ୍ରୀରାମ ନାରାୟଣ ଵାସୁଦେଵ
ଗୋଵିଂଦ ଵୈକୁଂଠ ମୁକୁଂଦ କୃଷ୍ଣ ।
ଶ୍ରୀକେଶଵାନଂତ ନୃସିଂହ ଵିଷ୍ଣୋ
ମାଂ ତ୍ରାହି ସଂସାରଭୁଜଂଗଦଷ୍ଟମ୍ ॥ 15॥

ସାତ୍ୟକିରୁଵାଚ ।
ଅପ୍ରମେୟ ହରେ ଵିଷ୍ଣୋ କୃଷ୍ଣ ଦାମୋଦରାଽଚ୍ୟୁତ ।
ଗୋଵିଂଦାନଂତ ସର୍ଵେଶ ଵାସୁଦେଵ ନମୋଽସ୍ତୁ ତେ ॥ 16॥

ଉଦ୍ଧଵ ଉଵାଚ ।
ଵାସୁଦେଵଂ ପରିତ୍ୟଜ୍ୟ ୟୋଽନ୍ୟଂ ଦେଵମୁପାସତେ ।
ତୃଷିତୋ ଜାହ୍ନଵୀତୀରେ କୂପଂ ଖନତି ଦୁର୍ମତିଃ ॥ 17॥

ଧୌମ୍ୟ ଉଵାଚ ।
ଅପାଂ ସମୀପେ ଶୟନାସନସ୍ଥିତେ
ଦିଵା ଚ ରାତ୍ରୌ ଚ ୟଥାଧିଗଚ୍ଛତା ।
ୟଦ୍ୟସ୍ତି କିଂଚିତ୍ ସୁକୃତଂ କୃତଂ ମୟା
ଜନାର୍ଦନସ୍ତେନ କୃତେନ ତୁଷ୍ୟତୁ ॥ 18॥

ସଂଜୟ ଉଵାଚ ।
ଆର୍ତା ଵିଷଣ୍ଣାଃ ଶିଥିଲାଶ୍ଚ ଭୀତା
ଘୋରେଷୁ ଵ୍ୟାଘ୍ରାଦିଷୁ ଵର୍ତମାନାଃ ।
ସଂକୀର୍ତ୍ୟ ନାରାୟଣଶବ୍ଦମାତ୍ରଂ
ଵିମୁକ୍ତଦୁଃଖାଃ ସୁଖିନୋ ଭଵଂତି ॥ 19॥

ଅକ୍ରୂର ଉଵାଚ ।
ଅହଂ ତୁ ନାରାୟଣଦାସଦାସ-
ଦାସସ୍ୟ ଦାସସ୍ୟ ଚ ଦାସଦାସଃ ।
ଅନ୍ୟୋ ନ ହୀଶୋ ଜଗତୋ ନରାଣାଂ
ତସ୍ମାଦହଂ ଧନ୍ୟତରୋଽସ୍ମି ଲୋକେ ॥ 20॥

ଵିରାଟ ଉଵାଚ ।
ଵାସୁଦେଵସ୍ୟ ୟେ ଭକ୍ତାଃ ଶାଂତାସ୍ତଦ୍ଗତଚେତସଃ ।
ତେଷାଂ ଦାସସ୍ୟ ଦାସୋଽହଂ ଭଵେୟଂ ଜନ୍ମଜନ୍ମନି ॥ 21॥

ଭୀଷ୍ମ ଉଵାଚ ।
ଵିପରୀତେଷୁ କାଲେଷୁ ପରିକ୍ଷୀଣେଷୁ ବଂଧୁଷୁ ।
ତ୍ରାହି ମାଂ କୃପୟା କୃଷ୍ଣ ଶରଣାଗତଵତ୍ସଲ ॥ 22॥

ଦ୍ରୋଣ ଉଵାଚ ।
ୟେ ୟେ ହତାଶ୍ଚକ୍ରଧରେଣ ଦୈତ୍ୟାଂ-
ସ୍ତ୍ରୈଲୋକ୍ୟନାଥେନ ଜନାର୍ଦନେନ ।
ତେ ତେ ଗତା ଵିଷ୍ଣୁପୁରୀଂ ପ୍ରୟାତାଃ
କ୍ରୋଧୋଽପି ଦେଵସ୍ୟ ଵରେଣ ତୁଲ୍ୟଃ ॥ 23॥

କୃପାଚାର୍ୟ ଉଵାଚ ।
ମଜ୍ଜନ୍ମନଃ ଫଲମିଦଂ ମଧୁକୈଟଭାରେ
ମତ୍ପ୍ରାର୍ଥନୀୟ ମଦନୁଗ୍ରହ ଏଷ ଏଵ ।
ତ୍ଵଦ୍ଭୃତ୍ୟଭୃତ୍ୟପରିଚାରକଭୃତ୍ୟଭୃତ୍ୟ-
ଭୃତ୍ୟସ୍ୟ ଭୃତ୍ୟ ଇତି ମାଂ ସ୍ମର ଲୋକନାଥ ॥ 24॥

ଅଶ୍ଵତ୍ଥାମ ଉଵାଚ ।
ଗୋଵିଂଦ କେଶଵ ଜନାର୍ଦନ ଵାସୁଦେଵ
ଵିଶ୍ଵେଶ ଵିଶ୍ଵ ମଧୁସୂଦନ ଵିଶ୍ଵରୂପ ।
ଶ୍ରୀପଦ୍ମନାଭ ପୁରୁଷୋତ୍ତମ ଦେହି ଦାସ୍ୟଂ
ନାରାୟଣାଚ୍ୟୁତ ନୃସିଂହ ନମୋ ନମସ୍ତେ ॥ 25॥

କର୍ଣ ଉଵାଚ ।
ନାନ୍ୟଂ ଵଦାମି ନ ଶ‍ଋଣୋମି ନ ଚିଂତୟାମି
ନାନ୍ୟଂ ସ୍ମରାମି ନ ଭଜାମି ନ ଚାଶ୍ରୟାମି ।
ଭକ୍ତ୍ୟା ତ୍ଵଦୀୟଚରଣାଂବୁଜମାଦରେଣ
ଶ୍ରୀଶ୍ରୀନିଵାସ ପୁରୁଷୋତ୍ତମ ଦେହି ଦାସ୍ୟମ୍ ॥ 26॥

ଧୃତରାଷ୍ଟ୍ର ଉଵାଚ ।
ନମୋ ନମଃ କାରଣଵାମନାୟ
ନାରାୟଣାୟାମିତଵିକ୍ରମାୟ ।
ଶ୍ରୀଶାର୍ଙ୍ଗଚକ୍ରାସିଗଦାଧରାୟ
ନମୋଽସ୍ତୁ ତସ୍ମୈ ପୁରୁଷୋତ୍ତମାୟ ॥ 27॥

ଗାଂଧାରୀ ଉଵାଚ ।
ତ୍ଵମେଵ ମାତା ଚ ପିତା ତ୍ଵମେଵ
ତ୍ଵମେଵ ବଂଧୁଶ୍ଚ ସଖା ତ୍ଵମେଵ ।
ତ୍ଵମେଵ ଵିଦ୍ୟା ଦ୍ରଵିଣଂ ତ୍ଵମେଵ
ତ୍ଵମେଵ ସର୍ଵଂ ମମ ଦେଵ ଦେଵ ॥ 28॥

ଦ୍ରୁପଦ ଉଵାଚ ।
ୟଜ୍ଞେଶାଚ୍ୟୁତ ଗୋଵିଂଦ ମାଧଵାନଂତ କେଶଵ ।
କୃଷ୍ଣ ଵିଷ୍ଣୋ ହୃଷୀକେଶ ଵାସୁଦେଵ ନମୋଽସ୍ତୁ ତେ ॥ 29॥

ଜୟଦ୍ରଥ ଉଵାଚ ।
ନମଃ କୃଷ୍ଣାୟ ଦେଵାୟ ବ୍ରହ୍ମଣେଽନଂତଶକ୍ତୟେ ।
ୟୋଗେଶ୍ଵରାୟ ୟୋଗାୟ ତ୍ଵାମହଂ ଶରଣଂ ଗତଃ ॥ 30॥

ଵିକର୍ଣ ଉଵାଚ ।
କୃଷ୍ଣାୟ ଵାସୁଦେଵାୟ ଦେଵକୀନଂଦନାୟ ଚ ।
ନଂଦଗୋପକୁମାରାୟ ଗୋଵିଂଦାୟ ନମୋ ନମଃ ॥ 31॥

ଵିରାଟ ଉଵାଚ ।
ନମୋ ବ୍ରହ୍ମଣ୍ୟଦେଵାୟ ଗୋବ୍ରାହ୍ମଣହିତାୟ ଚ ।
ଜଗଦ୍ଧିତାୟ କୃଷ୍ଣାୟ ଗୋଵିଂଦାୟ ନମୋ ନମଃ ॥ 32॥

ଶଲ୍ୟ ଉଵାଚ ।
ଅତସୀପୁଷ୍ପସଂକାଶଂ ପୀତଵାସସମଚ୍ୟୁତମ୍ ।
ୟେ ନମସ୍ୟଂତି ଗୋଵିଂଦଂ ତେଷାଂ ନ ଵିଦ୍ୟତେ ଭୟମ୍ ॥ 33॥

ବଲଭଦ୍ର ଉଵାଚ ।
କୃଷ୍ଣ କୃଷ୍ଣ କୃପାଲୋ ତ୍ଵମଗତୀନାଂ ଗତିର୍ଭଵ ।
ସଂସାରାର୍ଣଵମଗ୍ନାନାଂ ପ୍ରସୀଦ ପୁରୁଷୋତ୍ତମ ॥ 34॥

ଶ୍ରୀକୃଷ୍ଣ ଉଵାଚ ।
କୃଷ୍ଣ କୃଷ୍ଣେତି କୃଷ୍ଣେତି ୟୋ ମାଂ ସ୍ମରତି ନିତ୍ୟଶଃ ।
ଜଲଂ ଭିତ୍ଵା ୟଥା ପଦ୍ମଂ ନରକାଦୁଦ୍ଧରାମ୍ୟହମ୍ ॥ 35॥

ଶ୍ରୀକୃଷ୍ଣ ଉଵାଚ ।
ନିତ୍ୟଂ ଵଦାମି ମନୁଜାଃ ସ୍ଵୟମୂର୍ଧ୍ଵବାହୁ-
ର୍ୟୋ ମାଂ ମୁକୁଂଦ ନରସିଂହ ଜନାର୍ଦନେତି ।
ଜୀଵୋ ଜପତ୍ୟନୁଦିନଂ ମରଣେ ରଣେ ଵା
ପାଷାଣକାଷ୍ଠସଦୃଶାୟ ଦଦାମ୍ୟଭୀଷ୍ଟମ୍ ॥ 36॥

ଈଶ୍ଵର ଉଵାଚ ।
ସକୃନ୍ନାରାୟଣେତ୍ୟୁକ୍ତ୍ଵା ପୁମାନ୍ କଲ୍ପଶତତ୍ରୟମ୍ ।
ଗଂଗାଦିସର୍ଵତୀର୍ଥେଷୁ ସ୍ନାତୋ ଭଵତି ପୁତ୍ରକ ॥ 37॥

ସୂତ ଉଵାଚ ।
ତତ୍ରୈଵ ଗଂଗା ୟମୁନା ଚ ତତ୍ର
ଗୋଦାଵରୀ ସିଂଧୁ ସରସ୍ଵତୀ ଚ ।
ସର୍ଵାଣି ତୀର୍ଥାନି ଵସଂତି ତତ୍ର
ୟତ୍ରାଚ୍ୟୁତୋଦାର କଥାପ୍ରସଂଗଃ ॥ 38॥

ୟମ ଉଵାଚ ।
ନରକେ ପଚ୍ୟମାନଂ ତୁ ୟମେନଂ ପରିଭାଷିତମ୍ ।
କିଂ ତ୍ଵୟା ନାର୍ଚିତୋ ଦେଵଃ କେଶଵଃ କ୍ଲେଶନାଶନଃ ॥ 35॥

ନାରଦ ଉଵାଚ ।
ଜନ୍ମାଂତରସହସ୍ରେଣ ତପୋଧ୍ୟାନସମାଧିନା ।
ନରାଣାଂ କ୍ଷୀଣପାପାନାଂ କୃଷ୍ଣେ ଭକ୍ତିଃ ପ୍ରଜାୟତେ ॥ 40॥

ପ୍ରହ୍ଲାଦ ଉଵାଚ ।
ନାଥ ୟୋନିସହସ୍ରେଷୁ ୟେଷୁ ୟେଷୁ ଵ୍ରଜାମ୍ୟହମ୍ ।
ତେଷୁ ତେଷ୍ଵଚଲା ଭକ୍ତିରଚ୍ୟୁତାଽସ୍ତୁ ସଦା ତ୍ଵୟି ॥ 41॥

ୟା ପ୍ରୀତିରଵିଵେକନାଂ ଵିଷୟେଷ୍ଵନପାୟିନି ।
ତ୍ଵାମନୁସ୍ମରତଃ ସା ମେ ହୃଦୟାନ୍ମାଽପସର୍ପତୁ ॥ 42॥

ଵିଶ୍ଵାମିତ୍ର ଉଵାଚ ।
କିଂ ତସ୍ୟ ଦାନୈଃ କିଂ ତୀର୍ଥୈଃ କିଂ ତପୋଭିଃ କିମଧ୍ଵରୈଃ ।
ୟୋ ନିତ୍ୟଂ ଧ୍ୟାୟତେ ଦେଵଂ ନାରାୟଣମନନ୍ୟଧୀଃ ॥ 43॥

ଜମଦଗ୍ନିରୁଵାଚ ।
ନିତ୍ୟୋତ୍ସଵୋ ଭଵେତ୍ତେଷାଂ ନିତ୍ୟଂ ନିତ୍ୟଂ ଚ ମଂଗଲମ୍ ।
ୟେଷାଂ ହୃଦିସ୍ଥୋ ଭଗଵାନ୍ମଂଗଲାୟତନଂ ହରିଃ ॥ 44॥

ଭରଦ୍ଵାଜ ଉଵାଚ ।
ଲାଭସ୍ତେଷାଂ ଜୟସ୍ତେଷାଂ କୁତସ୍ତେଷାଂ ପରାଜୟଃ ।
ୟେଷାମିଂଦୀଶ୍ଵରଶ୍ୟାମୋ ହୃଦୟସ୍ଥୋ ଜନାର୍ଦନଃ ॥ 45॥

ଗୌତମ ଉଵାଚ ।
ଗୋକୋଟିଦାନଂ ଗ୍ରହଣେଷୁ କାଶୀ-
ପ୍ରୟାଗଗଂଗାୟୁତକଲ୍ପଵାସଃ ।
ୟଜ୍ଞାୟୁତଂ ମେରୁସୁଵର୍ଣଦାନଂ
ଗୋଵିଂଦନାମସ୍ମରଣେନ ତୁଲ୍ୟମ୍ ॥ 46॥

ଅଗ୍ନିରୁଵାଚ ।
ଗୋଵିଂଦେତି ସଦା ସ୍ନାନଂ ଗୋଵିଂଦେତି ସଦା ଜପଃ ।
ଗୋଵିଂଦେତି ସଦା ଧ୍ୟାନଂ ସଦା ଗୋଵିଂଦକୀର୍ତନମ୍ ॥ 47॥

ତ୍ର୍ୟକ୍ଷରଂ ପରମଂ ବ୍ରହ୍ମ ଗୋଵିଂଦ ତ୍ର୍ୟକ୍ଷରଂ ପରମ୍ ।
ତସ୍ମାଦୁଚ୍ଚାରିତଂ ୟେନ ବ୍ରହ୍ମଭୂୟାୟ କଲ୍ପତେ ॥ 48॥

ଵେଦଵ୍ୟାସ ଉଵାଚ ।
ଅଚ୍ୟୁତଃ କଲ୍ପଵୃକ୍ଷୋଽସାଵନଂତଃ କାମଧେନୁ ଵୈ ।
ଚିଂତାମଣିସ୍ତୁ ଗୋଵିଂଦୋ ହରେର୍ନାମ ଵିଚିଂତୟେତ୍ ॥ 49॥

ଇଂଦ୍ର ଉଵାଚ ।
ଜୟତୁ ଜୟତୁ ଦେଵୋ ଦେଵକୀନଂଦନୋଽୟଂ
ଜୟତୁ ଜୟତୁ କୃଷ୍ଣୋ ଵୃଷ୍ଣିଵଂଶପ୍ରଦୀପଃ ।
ଜୟତୁ ଜୟତୁ ମେଘଶ୍ୟାମଲଃ କୋମଲାଂଗୋ
ଜୟତୁ ଜୟତୁ ପୃଥ୍ଵୀଭାରନାଶୋ ମୁକୁଂଦଃ ॥ 50॥

ପିପ୍ପଲାୟନ ଉଵାଚ ।
ଶ୍ରୀମନ୍ନୃସିଂହଵିଭଵେ ଗରୁଡଧ୍ଵଜାୟ
ତାପତ୍ରୟୋପଶମନାୟ ଭଵୌଷଧାୟ ।
କୃଷ୍ଣାୟ ଵୃଶ୍ଚିକଜଲାଗ୍ନିଭୁଜଂଗରୋଗ-
କ୍ଲେଶଵ୍ୟୟାୟ ହରୟେ ଗୁରଵେ ନମସ୍ତେ ॥ 51॥

ଆଵିର୍ହୋତ୍ର ଉଵାଚ ।
କୃଷ୍ଣ ତ୍ଵଦୀୟପଦପଂକଜପଂଜରାଂତେ
ଅଦ୍ୟୈଵ ମେ ଵିଶତୁ ମାନସରାଜହଂସଃ ।
ପ୍ରାଣପ୍ରୟାଣସମୟେ କଫଵାତପିତ୍ତୈଃ
କଂଠାଵରୋଧନଵିଧୌ ସ୍ମରଣଂ କୁତସ୍ତେ ॥ 52॥

ଵିଦୁର ଉଵାଚ ।
ହରେର୍ନାମୈଵ ନାମୈଵ ନାମୈଵ ମମ ଜୀଵନମ୍ ।
କଲୌ ନାସ୍ତ୍ୟେଵ ନାସ୍ତ୍ୟେଵ ନାସ୍ତ୍ୟେଵ ଗତିରନ୍ୟଥା ॥ 53॥

ଵସିଷ୍ଠ ଉଵାଚ ।
କୃଷ୍ଣେତି ମଂଗଲଂ ନାମ ୟସ୍ୟ ଵାଚି ପ୍ରଵର୍ତତେ ।
ଭସ୍ମୀଭଵଂତି ତସ୍ୟାଶୁ ମହାପାତକକୋଟୟଃ ॥ 54॥

ଅରୁଂଧତ୍ୟୁଵାଚ ।
କୃଷ୍ଣାୟ ଵାସୁଦେଵାୟ ହରୟେ ପରମାତ୍ମନେ ।
ପ୍ରଣତକ୍ଲେଶନାଶାୟ ଗୋଵିଂଦାୟ ନମୋ ନମଃ ॥ 55॥

କଶ୍ୟପ ଉଵାଚ ।
କୃଷ୍ଣାନୁସ୍ମରଣାଦେଵ ପାପସଂଘଟ୍ଟପଂଜରମ୍ ।
ଶତଧା ଭେଦମାପ୍ନୋତି ଗିରିର୍ଵଜ୍ରହତୋ ୟଥା ॥ 56॥

ଦୁର୍ୟୋଧନ ଉଵାଚ ।
ଜାନାମି ଧର୍ମଂ ନ ଚ ମେ ପ୍ରଵୃତ୍ତି-
ର୍ଜାନାମି ପାପଂ ନ ଚ ମେ ନିଵୃତ୍ତିଃ ।
କେନାପି ଦେଵେନ ହୃଦି ସ୍ଥିତେନ
ୟଥା ନିୟୁକ୍ତୋଽସ୍ମି ତଥା କରୋମି ॥ 57॥

ୟଂତ୍ରସ୍ୟ ମମ ଦୋଷେଣ କ୍ଷମ୍ୟତାଂ ମଧୁସୂଦନ ।
ଅହଂ ୟଂତ୍ରଂ ଭଵାନ୍ ୟଂତ୍ରୀ ମମ ଦୋଷୋ ନ ଦୀୟତାମ୍ ॥ 58॥

ଭୃଗୁରୁଵାଚ ।
ନାମୈଵ ତଵ ଗୋଵିଂଦ ନାମ ତ୍ଵତ୍ତଃ ଶତାଧିକମ୍ ।
ଦଦାତ୍ତ୍ୟୁଚ୍ଚାରଣାନ୍ମୁକ୍ତିଃ ଭଵାନଷ୍ଟାଂଗୟୋଗତଃ ॥ 59॥

ଲୋମଶ ଉଵାଚ ।
ନମାମି ନାରାୟଣ ପାଦପଂକଜଂ
କରୋମି ନାରାୟଣପୂଜନଂ ସଦା ।
ଵଦାମି ନାରାୟଣନାମ ନିର୍ମଲଂ
ସ୍ମରାମି ନାରାୟଣତତ୍ତ୍ଵମଵ୍ୟୟମ୍ ॥ 60॥

ଶୌନକ ଉଵାଚ ।
ସ୍ମୃତେଃ ସକଲକଲ୍ୟାଣଂ ଭଜନଂ ୟସ୍ୟ ଜାୟତେ ।
ପୁରୁଷଂ ତମଜଂ ନିତ୍ୟଂ ଵ୍ରଜାମି ଶରଣଂ ହରିମ୍ ॥ 61॥

ଗର୍ଗ ଉଵାଚ ।
ନାରାୟଣେତି ମଂତ୍ରୋଽସ୍ତି ଵାଗସ୍ତି ଵଶଵର୍ତିନୀ ।
ତଥାପି ନରକେ ଘୋରେ ପତଂତୀତ୍ୟଦ୍ଭୁତଂ ମହତ୍ ॥ 62॥

ଦାଲ୍ଭ୍ୟ ଉଵାଚ ।
କିଂ ତସ୍ୟ ବହୁଭିର୍ମଂତ୍ରୈର୍ଭକ୍ତିର୍ୟସ୍ୟ ଜନାର୍ଦନେ ।
ନମୋ ନାରାୟଣାୟେତି ମଂତ୍ରଃ ସର୍ଵାର୍ଥସାଧାକେ ॥ 63॥

ଵୈଶଂପାୟନ ଉଵାଚ ।
ୟତ୍ର ୟୋଗେଶ୍ଵରଃ କୃଷ୍ଣୋ ୟତ୍ର ପାର୍ଥୋ ଧନୁର୍ଧରଃ ।
ତତ୍ର ଶ୍ରୀର୍ଵିଜୟୋ ଭୂତିର୍ଧ୍ରୁଵା ନୀତିର୍ମତିର୍ମମ ॥ 64॥

ଅଗ୍ନିରୁଵାଚ ।
ହରିର୍ହରତି ପାପାନି ଦୁଷ୍ଟଚିତ୍ତୈରପି ସ୍ମୃତଃ ।
ଅନିଚ୍ଛୟାପି ସଂସ୍ପୃଷ୍ଟୋ ଦହତ୍ୟେଵ ହି ପାଵକଃ ॥ 65॥

ପରମେଶ୍ଵର ଉଵାଚ ।
ସକୃଦୁଚ୍ଚରିତଂ ୟେନ ହରିରିତ୍ୟକ୍ଷରଦ୍ଵୟମ୍ ।
ଲବ୍ଧଃ ପରିକରସ୍ତେନ ମୋକ୍ଷାୟ ଗମନଂ ପ୍ରତି ॥ 66॥

ପୁଲସ୍ତ୍ୟ ଉଵାଚ ।
ହେ ଜିହ୍ଵେ ରସସାରଜ୍ଞେ ସର୍ଵଦା ମଧୁରପ୍ରିୟେ ।
ନାରାୟଣାଖ୍ୟପୀୟୂଷଂ ପିବ ଜିହ୍ଵେ ନିରଂତରମ୍ ॥ 67॥

ଵ୍ୟାସ ଉଵାଚ ।
ସତ୍ୟଂ ସତ୍ୟଂ ପୁନଃ ସତ୍ୟଂ ସତ୍ୟଂ ସତ୍ୟଂ ଵଦାମ୍ୟହମ୍ ।
ନାସ୍ତି ଵେଦାତ୍ପରଂ ଶାସ୍ତ୍ରଂ ନ ଦେଵଃ କେଶଵାତ୍ପରଃ ॥ 68॥

ଧନ୍ଵଂତରିରୁଵାଚ ।
ଅଚ୍ୟୁତାନଂତ ଗୋଵିଂଦ ନାମୋଚ୍ଚାରଣଭେଷଜାତ୍ ।
ନଶ୍ୟଂତି ସକଲା ରୋଗାଃ ସତ୍ୟଂ ସତ୍ୟଂ ଵଦାମ୍ୟହମ୍ ॥ 69॥

ମାର୍କଂଡେୟ ଉଵାଚ ।
ସ୍ଵର୍ଗଦଂ ମୋକ୍ଷଦଂ ଦେଵଂ ସୁଖଦଂ ଜଗତୋ ଗୁରୁମ୍ ।
କଥଂ ମୁହୁର୍ତମପି ତଂ ଵାସୁଦେଵଂ ନ ଚିଂତୟେତ୍ ॥ 70॥

ଅଗସ୍ତ୍ୟ ଉଵାଚ ।
ନିମିଷଂ ନିମିଷାର୍ଧଂ ଵା ପ୍ରାଣିନାଂ ଵିଷ୍ଣୁଚିଂତନମ୍ ।
ତତ୍ର ତତ୍ର କୁରୁକ୍ଷେତ୍ରଂ ପ୍ରୟାଗୋ ନୈମିଷଂ ଵରମ୍ ॥ 71॥

ଵାମଦେଵ ଉଵାଚ ।
ନିମିଷଂ ନିମିଷାର୍ଧଂ ଵା ପ୍ରାଣିନାଂ ଵିଷ୍ଣୁଚିଂତନମ୍ ।
କଲ୍ପକୋଟିସହସ୍ରାଣି ଲଭତେ ଵାଂଛିତଂ ଫଲମ୍ ॥ 72॥

ଶୁକ ଉଵାଚ ।
ଆଲୋଡ୍ୟ ସର୍ଵଶାସ୍ତ୍ରାଣି ଵିଚାର୍ୟ ଚ ପୁନଃ ପୁନଃ ।
ଇଦମେକଂ ସୁନିଷ୍ପନ୍ନଂ ଧ୍ୟେୟୋ ନାରାୟଣଃ ସଦା ॥ 73॥

ଶ୍ରୀମହାଦେଵ ଉଵାଚ ।
ଶରୀରେ ଜର୍ଜରୀଭୂତେ ଵ୍ୟାଧିଗ୍ରସ୍ତେ କଲେଵରେ ।
ଔଷଧଂ ଜାହ୍ନଵୀତୋୟଂ ଵୈଦ୍ୟୋ ନାରାୟଣୋ ହରିଃ ॥ 74॥

ଶୌନକ ଉଵାଚ ।
ଭୋଜନାଚ୍ଛାଦନେ ଚିଂତାଂ ଵୃଥା କୁର୍ଵଂତି ଵୈଷ୍ଣଵାଃ ।
ୟୋଽସୌ ଵିଶ୍ଵଂଭରୋ ଦେଵଃ ସ କିଂ ଭକ୍ତାନୁପେକ୍ଷତେ ॥ 75॥

ସନତ୍କୁମାର ଉଵାଚ ।
ୟସ୍ୟ ହସ୍ତେ ଗଦା ଚକ୍ରଂ ଗରୁଡୋ ୟସ୍ୟ ଵାହନମ୍ ।
ଶଂଖଚକ୍ରଗଦାପଦ୍ମୀ ସ ମେ ଵିଷ୍ଣୁଃ ପ୍ରସୀଦତୁ ॥ 76॥

ଏଵଂ ବ୍ରହ୍ମାଦୟୋ ଦେଵା ଋଷୟଶ୍ଚ ତପୋଧନାଃ ।
କୀର୍ତୟଂତି ସୁରଶ୍ରେଷ୍ଠମେଵଂ ନାରାୟଣଂ ଵିଭୁମ୍ ॥ 77॥

ଇଦଂ ପଵିତ୍ରମାୟୁଷ୍ୟଂ ପୁଣ୍ୟଂ ପାପପ୍ରଣାଶନମ୍ ।
ଦୁଃସ୍ଵପ୍ନନାଶନଂ ସ୍ତୋତ୍ରଂ ପାଂଡଵୈଃ ପରିକୀର୍ତିତମ୍ ॥ 78॥

ୟଃ ପଠେତ୍ପ୍ରାତରୁତ୍ଥାୟ ଶୁଚିସ୍ତଦ୍ଗତମାନସଃ ।
ଗଵାଂ ଶତସହସ୍ରସ୍ୟ ସମ୍ୟଗ୍ଦତ୍ତସ୍ୟ ୟତ୍ଫଲମ୍ ॥ 79॥

ତତ୍ଫଲଂ ସମଵାପ୍ନୋତି ୟଃ ପଠେଦିତି ସଂସ୍ତଵମ୍ ।
ସର୍ଵପାପଵିନିର୍ମୁକ୍ତୋ ଵିଷ୍ଣୁଲୋକଂ ସ ଗଚ୍ଛତି ॥ 80॥

ଗଂଗା ଗୀତା ଚ ଗାୟତ୍ରୀ ଗୋଵିଂଦୋ ଗରୁଡଧ୍ଵଜଃ ।
ଗକାରୈଃ ପଂଚଭିର୍ୟୁକ୍ତଃ ପୁନର୍ଜନ୍ମ ନ ଵିଦ୍ୟତେ ॥ 81॥

ଗୀତାଂ ୟଃ ପଠତେ ନିତ୍ୟଂ ଶ୍ଲୋକାର୍ଧଂ ଶ୍ଲୋକମେଵ ଵା ।
ମୁଚ୍ୟତେ ସର୍ଵପାପେଭ୍ୟୋ ଵିଷ୍ଣୁଲୋକଂ ସ ଗଚ୍ଛତି ॥ 82॥

ଇତି ପାଂଡଵଗୀତା ଅଥଵା ପ୍ରପନ୍ନଗୀତା ସମାପ୍ତା ।

ଓଂ ତତ୍ସତ୍ ।