ଓଂ ତଚ୍ଛଂ॒-ୟୋଁରାଵୃ॑ଣୀମହେ । ଗା॒ତୁଂ-ୟଁ॒ଜ୍ଞାୟ॑ । ଗା॒ତୁଂ-ୟଁ॒ଜ୍ଞପ॑ତୟେ । ଦୈଵୀ᳚ ସ୍ଵ॒ସ୍ତିର॑ସ୍ତୁ ନଃ । ସ୍ଵ॒ସ୍ତିର୍ମାନୁ॑ଷେଭ୍ୟଃ । ଊ॒ର୍ଧ୍ଵଂ ଜି॑ଗାତୁ ଭେଷ॒ଜମ୍ । ଶଂ ନୋ॑ ଅସ୍ତୁ ଦ୍ଵି॒ପଦେ᳚ । ଶଂ ଚତୁ॑ଷ୍ପଦେ ।
ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥
ସ॒ହସ୍ର॑ଶୀର୍ଷା॒ ପୁରୁ॑ଷଃ । ସ॒ହ॒ସ୍ରା॒କ୍ଷଃ ସ॒ହସ୍ର॑ପାତ୍ ।
ସ ଭୂମିଂ॑-ଵିଁ॒ଶ୍ଵତୋ॑ ଵୃ॒ତ୍ଵା । ଅତ୍ୟ॑ତିଷ୍ଠଦ୍ଦଶାଂଗୁ॒ଲମ୍ ॥
ପୁରୁ॑ଷ ଏ॒ଵେଦଗ୍ମ୍ ସର୍ଵମ୍᳚ । ୟଦ୍ଭୂ॒ତଂ-ୟଁଚ୍ଚ॒ ଭଵ୍ୟମ୍᳚ ।
ଉ॒ତାମୃ॑ତ॒ତ୍ଵ ସ୍ୟେଶା॑ନଃ । ୟ॒ଦନ୍ନେ॑ନାତି॒ରୋହ॑ତି ॥
ଏ॒ତାଵା॑ନସ୍ୟ ମହି॒ମା । ଅତୋ॒ ଜ୍ୟାୟାଗ୍॑ଶ୍ଚ॒ ପୂରୁ॑ଷଃ ।
ପାଦୋ᳚ଽସ୍ୟ॒ ଵିଶ୍ଵା॑ ଭୂ॒ତାନି॑ । ତ୍ରି॒ପାଦ॑ସ୍ୟା॒ମୃତଂ॑ ଦି॒ଵି ॥
ତ୍ରି॒ପାଦୂ॒ର୍ଧ୍ଵ ଉଦୈ॒ତ୍ପୁରୁ॑ଷଃ । ପାଦୋ᳚ଽସ୍ୟେ॒ହାଽଽଭ॑ଵା॒ତ୍ପୁନଃ॑ ।
ତତୋ॒ ଵିଷ୍ଵ॒ଙ୍ଵ୍ୟ॑କ୍ରାମତ୍ । ସା॒ଶ॒ନା॒ନ॒ଶ॒ନେ ଅ॒ଭି ॥
ତସ୍ମା᳚ଦ୍ଵି॒ରାଡ॑ଜାୟତ । ଵି॒ରାଜୋ॒ ଅଧି॒ ପୂରୁ॑ଷଃ ।
ସ ଜା॒ତୋ ଅତ୍ୟ॑ରିଚ୍ୟତ । ପ॒ଶ୍ଚାଦ୍ଭୂମି॒ମଥୋ॑ ପୁ॒ରଃ ॥
ୟତ୍ପୁରୁ॑ଷେଣ ହ॒ଵିଷା᳚ । ଦେ॒ଵା ୟ॒ଜ୍ଞମତ॑ନ୍ଵତ ।
ଵ॒ସଂ॒ତୋ ଅ॑ସ୍ୟାସୀ॒ଦାଜ୍ୟମ୍᳚ । ଗ୍ରୀ॒ଷ୍ମ ଇ॒ଧ୍ମଶ୍ଶ॒ରଧ୍ଧ॒ଵିଃ ॥
ସ॒ପ୍ତାସ୍ୟା॑ସନ୍ପରି॒ଧୟଃ॑ । ତ୍ରିଃ ସ॒ପ୍ତ ସ॒ମିଧଃ॑ କୃ॒ତାଃ ।
ଦେ॒ଵା ୟଦ୍ୟ॒ଜ୍ଞଂ ତ॑ନ୍ଵା॒ନାଃ । ଅବ॑ଧ୍ନ॒ନ୍-ପୁରୁ॑ଷଂ ପ॒ଶୁମ୍ ॥
ତଂ-ୟଁ॒ଜ୍ଞଂ ବ॒ର୍॒ହିଷି॒ ପ୍ରୌକ୍ଷନ୍॑ । ପୁରୁ॑ଷଂ ଜା॒ତମ॑ଗ୍ର॒ତଃ ।
ତେନ॑ ଦେ॒ଵା ଅୟ॑ଜଂତ । ସା॒ଧ୍ୟା ଋଷ॑ୟଶ୍ଚ॒ ୟେ ॥
ତସ୍ମା᳚ଦ୍ୟ॒ଜ୍ଞାଥ୍ସ॑ର୍ଵ॒ହୁତଃ॑ । ସଂଭୃ॑ତଂ ପୃଷଦା॒ଜ୍ୟମ୍ ।
ପ॒ଶୂଗ୍ଗ୍-ସ୍ତାଗ୍ଗ୍-ଶ୍ଚ॑କ୍ରେ ଵାୟ॒ଵ୍ୟାନ୍॑ । ଆ॒ର॒ଣ୍ୟାନ୍-ଗ୍ରା॒ମ୍ୟାଶ୍ଚ॒ ୟେ ॥
ତସ୍ମା᳚ଦ୍ୟ॒ଜ୍ଞାଥ୍ସ॑ର୍ଵ॒ହୁତଃ॑ । ଋଚଃ॒ ସାମା॑ନି ଜଜ୍ଞିରେ ।
ଛଂଦାଗ୍ମ୍॑ସି ଜଜ୍ଞିରେ॒ ତସ୍ମା᳚ତ୍ । ୟଜୁ॒ସ୍ତସ୍ମା॑ଦଜାୟତ ॥
ତସ୍ମା॒ଦଶ୍ଵା॑ ଅଜାୟଂତ । ୟେ କେ ଚୋ॑ଭ॒ୟାଦ॑ତଃ ।
ଗାଵୋ॑ ହ ଜଜ୍ଞିରେ॒ ତସ୍ମା᳚ତ୍ । ତସ୍ମା᳚ଜ୍ଜା॒ତା ଅ॑ଜା॒ଵୟଃ॑ ॥
ୟତ୍ପୁରୁ॑ଷଂ॒-ଵ୍ୟଁ॑ଦଧୁଃ । କ॒ତି॒ଥା ଵ୍ୟ॑କଲ୍ପୟନ୍ନ୍ ।
ମୁଖଂ॒ କିମ॑ସ୍ୟ॒ କୌ ବା॒ହୂ । କାଵୂ॒ରୂ ପାଦା॑ଵୁଚ୍ୟେତେ ॥
ବ୍ରା॒ହ୍ମ॒ଣୋ᳚ଽସ୍ୟ॒ ମୁଖ॑ମାସୀତ୍ । ବା॒ହୂ ରା॑ଜ॒ନ୍ୟଃ॑ କୃ॒ତଃ ।
ଊ॒ରୂ ତଦ॑ସ୍ୟ॒ ୟଦ୍ଵୈଶ୍ୟଃ॑ । ପ॒ଦ୍ଭ୍ୟାଗ୍ମ୍ ଶୂ॒ଦ୍ରୋ ଅ॑ଜାୟତଃ ॥
ଚଂ॒ଦ୍ରମା॒ ମନ॑ସୋ ଜା॒ତଃ । ଚକ୍ଷୋଃ॒ ସୂର୍ୟୋ॑ ଅଜାୟତ ।
ମୁଖା॒ଦିଂଦ୍ର॑ଶ୍ଚା॒ଗ୍ନିଶ୍ଚ॑ । ପ୍ରା॒ଣାଦ୍ଵା॒ୟୁର॑ଜାୟତ ॥
ନାଭ୍ୟା॑ ଆସୀଦଂ॒ତରି॑କ୍ଷମ୍ । ଶୀ॒ର୍ଷ୍ଣୋ ଦ୍ୟୌଃ ସମ॑ଵର୍ତତ ।
ପ॒ଦ୍ଭ୍ୟାଂ ଭୂମି॒ର୍ଦିଶଃ॒ ଶ୍ରୋତ୍ରା᳚ତ୍ । ତଥା॑ ଲୋ॒କାଗ୍ମ୍ ଅ॑କଲ୍ପୟନ୍ନ୍ ॥
ଵେଦା॒ହମେ॒ତଂ ପୁରୁ॑ଷଂ ମ॒ହାଂତମ୍᳚ । ଆ॒ଦି॒ତ୍ୟଵ॑ର୍ଣଂ॒ ତମ॑ସ॒ସ୍ତୁ ପା॒ରେ ।
ସର୍ଵା॑ଣି ରୂ॒ପାଣି॑ ଵି॒ଚିତ୍ୟ॒ ଧୀରଃ॑ । ନାମା॑ନି କୃ॒ତ୍ଵାଽଭି॒ଵଦ॒ନ୍॒, ୟଦାଽଽସ୍ତେ᳚ ॥
ଧା॒ତା ପୁ॒ରସ୍ତା॒ଦ୍ୟମୁ॑ଦାଜ॒ହାର॑ । ଶ॒କ୍ରଃ ପ୍ରଵି॒ଦ୍ଵାନ୍-ପ୍ର॒ଦିଶ॒ଶ୍ଚତ॑ସ୍ରଃ ।
ତମେ॒ଵଂ-ଵିଁ॒ଦ୍ଵାନ॒ମୃତ॑ ଇ॒ହ ଭ॑ଵତି । ନାନ୍ୟଃ ପଂଥା॒ ଅୟ॑ନାୟ ଵିଦ୍ୟତେ ॥
ୟ॒ଜ୍ଞେନ॑ ୟ॒ଜ୍ଞମ॑ୟଜଂତ ଦେ॒ଵାଃ । ତାନି॒ ଧର୍ମା॑ଣି ପ୍ରଥ॒ମାନ୍ୟା॑ସନ୍ନ୍ ।
ତେ ହ॒ ନାକଂ॑ ମହି॒ମାନଃ॑ ସଚଂତେ । ୟତ୍ର॒ ପୂର୍ଵେ॑ ସା॒ଧ୍ୟାସ୍ସଂତି॑ ଦେ॒ଵାଃ ॥
ଅ॒ଦ୍ଭ୍ୟଃ ସଂଭୂ॑ତଃ ପୃଥି॒ଵ୍ୟୈ ରସା᳚ଚ୍ଚ । ଵି॒ଶ୍ଵକ॑ର୍ମଣଃ॒ ସମ॑ଵର୍ତ॒ତାଧି॑ ।
ତସ୍ୟ॒ ତ୍ଵଷ୍ଟା॑ ଵି॒ଦଧ॑ଦ୍ରୂ॒ପମେ॑ତି । ତତ୍ପୁରୁ॑ଷସ୍ୟ॒ ଵିଶ୍ଵ॒ମାଜା॑ନ॒ମଗ୍ରେ᳚ ॥
ଵେଦା॒ହମେ॒ତଂ ପୁରୁ॑ଷଂ ମ॒ହାଂତମ୍᳚ । ଆ॒ଦି॒ତ୍ୟଵ॑ର୍ଣଂ॒ ତମ॑ସଃ॒ ପର॑ସ୍ତାତ୍ ।
ତମେ॒ଵଂ-ଵିଁ॒ଦ୍ଵାନ॒ମୃତ॑ ଇ॒ହ ଭ॑ଵତି । ନାନ୍ୟଃ ପଂଥା॑ ଵିଦ୍ୟ॒ତେଽୟ॑ନାୟ ॥
ପ୍ର॒ଜାପ॑ତିଶ୍ଚରତି॒ ଗର୍ଭେ॑ ଅଂ॒ତଃ । ଅ॒ଜାୟ॑ମାନୋ ବହୁ॒ଧା ଵିଜା॑ୟତେ ।
ତସ୍ୟ॒ ଧୀରାଃ॒ ପରି॑ଜାନଂତି॒ ୟୋନିମ୍᳚ । ମରୀ॑ଚୀନାଂ ପ॒ଦମି॑ଚ୍ଛଂତି ଵେ॒ଧସଃ॑ ॥
ୟୋ ଦେ॒ଵେଭ୍ୟ॒ ଆତ॑ପତି । ୟୋ ଦେ॒ଵାନାଂ᳚ ପୁ॒ରୋହି॑ତଃ ।
ପୂର୍ଵୋ॒ ୟୋ ଦେ॒ଵେଭ୍ୟୋ॑ ଜା॒ତଃ । ନମୋ॑ ରୁ॒ଚାୟ॒ ବ୍ରାହ୍ମ॑ୟେ ॥
ରୁଚଂ॑ ବ୍ରା॒ହ୍ମଂ ଜ॒ନୟଂ॑ତଃ । ଦେ॒ଵା ଅଗ୍ରେ॒ ତଦ॑ବ୍ରୁଵନ୍ନ୍ ।
ୟସ୍ତ୍ଵୈ॒ଵଂ ବ୍ରା᳚ହ୍ମ॒ଣୋ ଵି॒ଦ୍ୟାତ୍ । ତସ୍ୟ॑ ଦେ॒ଵା ଅସ॒ନ୍ ଵଶେ᳚ ॥
ହ୍ରୀଶ୍ଚ॑ ତେ ଲ॒କ୍ଷ୍ମୀଶ୍ଚ॒ ପତ୍ନ୍ୟୌ᳚ । ଅ॒ହୋ॒ରା॒ତ୍ରେ ପା॒ର୍ଶ୍ଵେ ।
ନକ୍ଷ॑ତ୍ରାଣି ରୂ॒ପମ୍ । ଅ॒ଶ୍ଵିନୌ॒ ଵ୍ୟାତ୍ତମ୍᳚ ।
ଇ॒ଷ୍ଟଂ ମ॑ନିଷାଣ । ଅ॒ମୁଂ ମ॑ନିଷାଣ । ସର୍ଵଂ॑ ମନିଷାଣ ॥
ତଚ୍ଛଂ॒-ୟୋଁରାଵୃ॑ଣୀମହେ । ଗା॒ତୁଂ-ୟଁ॒ଜ୍ଞାୟ॑ । ଗା॒ତୁଂ-ୟଁ॒ଜ୍ଞପ॑ତୟେ । ଦୈଵୀ᳚ ସ୍ଵ॒ସ୍ତିର॑ସ୍ତୁ ନଃ । ସ୍ଵ॒ସ୍ତିର୍ମାନୁ॑ଷେଭ୍ୟଃ । ଊ॒ର୍ଧ୍ଵଂ ଜି॑ଗାତୁ ଭେଷ॒ଜମ୍ । ଶଂ ନୋ॑ ଅସ୍ତୁ ଦ୍ଵି॒ପଦେ᳚ । ଶଂ ଚତୁ॑ଷ୍ପଦେ ।
ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥