(ଶ୍ରୀଦେଵୀଭାଗଵତଂ, ଦ୍ଵାଦଶ ସ୍କଂଧଂ, ଦ୍ଵାଦଶୋଽଧ୍ୟାୟଃ, ମଣିଦ୍ଵୀପ ଵର୍ଣନ – 3)
ଵ୍ୟାସ ଉଵାଚ ।
ତଦେଵ ଦେଵୀସଦନଂ ମଧ୍ୟଭାଗେ ଵିରାଜତେ ।
ସହସ୍ର ସ୍ତଂଭସଂୟୁକ୍ତାଶ୍ଚତ୍ଵାରସ୍ତେଷୁ ମଂଡପାଃ ॥ 1 ॥
ଶୃଂଗାରମଂଡପଶ୍ଚୈକୋ ମୁକ୍ତିମଂଡପ ଏଵ ଚ ।
ଜ୍ଞାନମଂଡପ ସଂଜ୍ଞସ୍ତୁ ତୃତୀୟଃ ପରିକୀର୍ତିତଃ ॥ 2 ॥
ଏକାଂତମଂଡପଶ୍ଚୈଵ ଚତୁର୍ଥଃ ପରିକୀର୍ତିତଃ ।
ନାନା ଵିତାନସଂୟୁକ୍ତା ନାନା ଧୂପୈସ୍ତୁ ଧୂପିତାଃ ॥ 3 ॥
କୋଟିସୂର୍ୟସମାଃ କାଂତ୍ୟା ଭ୍ରାଂଜଂତେ ମଂଡପାଃ ଶୁଭାଃ ।
ତନ୍ମଂଡପାନାଂ ପରିତଃ କାଶ୍ମୀରଵନିକା ସ୍ମୃତା ॥ 4 ॥
ମଲ୍ଲିକାକୁଂଦଵନିକା ୟତ୍ର ପୁଷ୍କଲକାଃ ସ୍ଥିତାଃ ।
ଅସଂଖ୍ୟାତା ମୃଗମଦୈଃ ପୂରିତାସ୍ତତ୍ସ୍ରଵା ନୃପ ॥ 5 ॥
ମହାପଦ୍ମାଟଵୀ ତଦ୍ଵଦ୍ରତ୍ନସୋପାନନିର୍ମିତା ।
ସୁଧାରସେନସଂପୂର୍ଣା ଗୁଂଜନ୍ମତ୍ତମଧୁଵ୍ରତା ॥ 6 ॥
ହଂସକାରଂଡଵାକୀର୍ଣା ଗଂଧପୂରିତ ଦିକ୍ତଟା ।
ଵନିକାନାଂ ସୁଗଂଧୈସ୍ତୁ ମଣିଦ୍ଵୀପଂ ସୁଵାସିତମ୍ ॥ 7 ॥
ଶୃଂଗାରମଂଡପେ ଦେଵ୍ୟୋ ଗାୟଂତି ଵିଵିଧୈଃ ସ୍ଵରୈଃ ।
ସଭାସଦୋ ଦେଵଵଶା ମଧ୍ୟେ ଶ୍ରୀଜଗଦଂବିକା ॥ 8 ॥
ମୁକ୍ତିମଂଡପମଧ୍ୟେ ତୁ ମୋଚୟତ୍ୟନିଶଂ ଶିଵା ।
ଜ୍ଞାନୋପଦେଶଂ କୁରୁତେ ତୃତୀୟେ ନୃପ ମଂଡପେ ॥ 9 ॥
ଚତୁର୍ଥମଂଡପେ ଚୈଵ ଜଗଦ୍ରକ୍ଷା ଵିଚିଂତନମ୍ ।
ମଂତ୍ରିଣୀ ସହିତା ନିତ୍ୟଂ କରୋତି ଜଗଦଂବିକା ॥ 10 ॥
ଚିଂତାମଣିଗୃହେ ରାଜଂଛକ୍ତି ତତ୍ତ୍ଵାତ୍ମକୈଃ ପରୈଃ ।
ସୋପାନୈର୍ଦଶଭିର୍ୟୁକ୍ତୋ ମଂଚକୋପ୍ୟଧିରାଜତେ ॥ 11 ॥
ବ୍ରହ୍ମା ଵିଷ୍ଣୁଶ୍ଚ ରୁଦ୍ରଶ୍ଚ ଈଶ୍ଵରଶ୍ଚ ସଦାଶିଵଃ ।
ଏତେ ମଂଚଖୁରାଃ ପ୍ରୋକ୍ତାଃ ଫଲକସ୍ତୁ ସଦାଶିଵଃ ॥ 12 ॥
ତସ୍ୟୋପରି ମହାଦେଵୋ ଭୁଵନେଶୋ ଵିରାଜତେ ।
ୟା ଦେଵୀ ନିଜଲୀଲାର୍ଥଂ ଦ୍ଵିଧାଭୂତା ବଭୂଵହ ॥ 13 ॥
ସୃଷ୍ଟ୍ୟାଦୌ ତୁ ସ ଏଵାୟଂ ତଦର୍ଧାଂଗୋ ମହେଶ୍ଵରଃ ।
କଂଦର୍ପ ଦର୍ପନାଶୋଦ୍ୟତ୍କୋଟି କଂଦର୍ପସୁଂଦରଃ ॥ 14 ॥
ପଂଚଵକ୍ତ୍ରସ୍ତ୍ରିନେତ୍ରଶ୍ଚ ମଣିଭୂଷଣ ଭୂଷିତଃ ।
ହରିଣାଭୀତିପରଶୂନ୍ଵରଂ ଚ ନିଜବାହୁଭିଃ ॥ 15 ॥
ଦଧାନଃ ଷୋଡଶାବ୍ଦୋଽସୌ ଦେଵଃ ସର୍ଵେଶ୍ଵରୋ ମହାନ୍ ।
କୋଟିସୂର୍ୟ ପ୍ରତୀକାଶଶ୍ଚଂଦ୍ରକୋଟି ସୁଶୀତଲଃ ॥ 16 ॥
ଶୁଦ୍ଧସ୍ଫଟିକ ସଂକାଶସ୍ତ୍ରିନେତ୍ରଃ ଶୀତଲ ଦ୍ୟୁତିଃ ।
ଵାମାଂକେ ସନ୍ନିଷଣ୍ଣାଽସ୍ୟ ଦେଵୀ ଶ୍ରୀଭୁଵନେଶ୍ଵରୀ ॥ 17 ॥
ନଵରତ୍ନଗଣାକୀର୍ଣ କାଂଚୀଦାମ ଵିରାଜିତା ।
ତପ୍ତକାଂଚନସନ୍ନଦ୍ଧ ଵୈଦୂର୍ୟାଂଗଦଭୂଷଣା ॥ 18 ॥
କନଚ୍ଛ୍ରୀଚକ୍ରତାଟଂକ ଵିଟଂକ ଵଦନାଂବୁଜା ।
ଲଲାଟକାଂତି ଵିଭଵ ଵିଜିତାର୍ଧସୁଧାକରା ॥ 19 ॥
ବିଂବକାଂତି ତିରସ୍କାରିରଦଚ୍ଛଦ ଵିରାଜିତା ।
ଲସତ୍କୁଂକୁମକସ୍ତୂରୀତିଲକୋଦ୍ଭାସିତାନନା ॥ 20 ॥
ଦିଵ୍ୟ ଚୂଡାମଣି ସ୍ଫାର ଚଂଚଚ୍ଚଂଦ୍ରକସୂର୍ୟକା ।
ଉଦ୍ୟତ୍କଵିସମସ୍ଵଚ୍ଛ ନାସାଭରଣ ଭାସୁରା ॥ 21 ॥
ଚିଂତାକଲଂବିତସ୍ଵଚ୍ଛ ମୁକ୍ତାଗୁଚ୍ଛ ଵିରାଜିତା ।
ପାଟୀର ପଂକ କର୍ପୂର କୁଂକୁମାଲଂକୃତ ସ୍ତନୀ ॥ 22 ॥
ଵିଚିତ୍ର ଵିଵିଧା କଲ୍ପା କଂବୁସଂକାଶ କଂଧରା ।
ଦାଡିମୀଫଲବୀଜାଭ ଦଂତପଂକ୍ତି ଵିରାଜିତା ॥ 23 ॥
ଅନର୍ଘ୍ୟ ରତ୍ନଘଟିତ ମୁକୁଟାଂଚିତ ମସ୍ତକା ।
ମତ୍ତାଲିମାଲାଵିଲସଦଲକାଢ୍ୟ ମୁଖାଂବୁଜା ॥ 24 ॥
କଳଂକକାର୍ଶ୍ୟନିର୍ମୁକ୍ତ ଶରଚ୍ଚଂଦ୍ରନିଭାନନା ।
ଜାହ୍ନଵୀସଲିଲାଵର୍ତ ଶୋଭିନାଭିଵିଭୂଷିତା ॥ 25 ॥
ମାଣିକ୍ୟ ଶକଲାବଦ୍ଧ ମୁଦ୍ରିକାଂଗୁଳିଭୂଷିତା ।
ପୁଂଡରୀକଦଲାକାର ନୟନତ୍ରୟସୁଂଦରୀ ॥ 26 ॥
କଲ୍ପିତାଚ୍ଛ ମହାରାଗ ପଦ୍ମରାଗୋଜ୍ଜ୍ଵଲପ୍ରଭା ।
ରତ୍ନକିଂକିଣିକାୟୁକ୍ତ ରତ୍ନକଂକଣଶୋଭିତା ॥ 27 ॥
ମଣିମୁକ୍ତାସରାପାର ଲସତ୍ପଦକସଂତତିଃ ।
ରତ୍ନାଂଗୁଳିପ୍ରଵିତତ ପ୍ରଭାଜାଲଲସତ୍କରା ॥ 28 ॥
କଂଚୁକୀଗୁଂଫିତାପାର ନାନା ରତ୍ନତତିଦ୍ୟୁତିଃ ।
ମଲ୍ଲିକାମୋଦି ଧମ୍ମିଲ୍ଲ ମଲ୍ଲିକାଲିସରାଵୃତା ॥ 29 ॥
ସୁଵୃତ୍ତନିବିଡୋତ୍ତୁଂଗ କୁଚଭାରାଲସା ଶିଵା ।
ଵରପାଶାଂକୁଶାଭୀତି ଲସଦ୍ବାହୁ ଚତୁଷ୍ଟୟା ॥ 30 ॥
ସର୍ଵଶୃଂଗାରଵେଷାଢ୍ୟା ସୁକୁମାରାଂଗଵଲ୍ଲରୀ ।
ସୌଂଦର୍ୟଧାରାସର୍ଵସ୍ଵା ନିର୍ଵ୍ୟାଜକରୁଣାମୟୀ ॥ 31 ॥
ନିଜସଂଲାପମାଧୁର୍ୟ ଵିନିର୍ଭର୍ତ୍ସିତକଚ୍ଛପୀ ।
କୋଟିକୋଟିରଵୀଂଦୂନାଂ କାଂତିଂ ୟା ବିଭ୍ରତୀ ପରା ॥ 32 ॥
ନାନା ସଖୀଭିର୍ଦାସୀଭିସ୍ତଥା ଦେଵାଂଗନାଦିଭିଃ ।
ସର୍ଵାଭିର୍ଦେଵତାଭିସ୍ତୁ ସମଂତାତ୍ପରିଵେଷ୍ଟିତା ॥ 33 ॥
ଇଚ୍ଛାଶକ୍ତ୍ୟା ଜ୍ଞାନଶକ୍ତ୍ୟା କ୍ରିୟାଶକ୍ତ୍ୟା ସମନ୍ଵିତା ।
ଲଜ୍ଜା ତୁଷ୍ଟିସ୍ତଥା ପୁଷ୍ଟିଃ କୀର୍ତିଃ କାଂତିଃ କ୍ଷମା ଦୟା ॥ 34 ॥
ବୁଦ୍ଧିର୍ମେଧାସ୍ମୃତିର୍ଲକ୍ଷ୍ମୀର୍ମୂର୍ତିମତ୍ୟୋଂଗନାଃ ସ୍ମୃତାଃ ।
ଜୟା ଚ ଵିଜୟା ଚୈଵାପ୍ୟଜିତା ଚାପରାଜିତା ॥ 35 ॥
ନିତ୍ୟା ଵିଲାସିନୀ ଦୋଗ୍ଧ୍ରୀ ତ୍ଵଘୋରା ମଂଗଳା ନଵା ।
ପୀଠଶକ୍ତୟ ଏତାସ୍ତୁ ସେଵଂତେ ୟାଂ ପରାଂବିକାମ୍ ॥ 36 ॥
ୟସ୍ୟାସ୍ତୁ ପାର୍ଶ୍ଵଭାଗେସ୍ତୋନିଧୀତୌ ଶଂଖପଦ୍ମକୌ ।
ନଵରତ୍ନ ଵହାନଦ୍ୟସ୍ତଥା ଵୈ କାଂଚନସ୍ରଵାଃ ॥ 37 ॥
ସପ୍ତଧାତୁଵହାନଦ୍ୟୋ ନିଧିଭ୍ୟାଂ ତୁ ଵିନିର୍ଗତାଃ ।
ସୁଧାସିଂଧ୍ଵଂତଗାମିନ୍ୟସ୍ତାଃ ସର୍ଵା ନୃପସତ୍ତମ ॥ 38 ॥
ସା ଦେଵୀ ଭୁଵନେଶାନୀ ତଦ୍ଵାମାଂକେ ଵିରାଜତେ ।
ସର୍ଵେଶ ତ୍ଵଂ ମହେଶସ୍ୟ ୟତ୍ସଂଗା ଦେଵ ନାନ୍ୟଥା ॥ 39 ॥
ଚିଂତାମଣି ଗୃହସ୍ୟାଽସ୍ୟ ପ୍ରମାଣଂ ଶୃଣୁ ଭୂମିପ ।
ସହସ୍ରୟୋଜନାୟାମଂ ମହାଂତସ୍ତତ୍ପ୍ରଚକ୍ଷତେ ॥ 40 ॥
ତଦୁତ୍ତରେ ମହାଶାଲାଃ ପୂର୍ଵସ୍ମାଦ୍ ଦ୍ଵିଗୁଣାଃ ସ୍ମୃତାଃ ।
ଅଂତରିକ୍ଷଗତଂ ତ୍ଵେତନ୍ନିରାଧାରଂ ଵିରାଜତେ ॥ 41 ॥
ସଂକୋଚଶ୍ଚ ଵିକାଶଶ୍ଚ ଜାୟତେଽସ୍ୟ ନିରଂତରମ୍ ।
ପଟଵତ୍କାର୍ୟଵଶତଃ ପ୍ରଳୟେ ସର୍ଜନେ ତଥା ॥ 42 ॥
ଶାଲାନାଂ ଚୈଵ ସର୍ଵେଷାଂ ସର୍ଵକାଂତିପରାଵଧି ।
ଚିଂତାମଣିଗୃହଂ ପ୍ରୋକ୍ତଂ ୟତ୍ର ଦେଵୀ ମହୋମୟୀ ॥ 43 ॥
ୟେୟେ ଉପାସକାଃ ସଂତି ପ୍ରତିବ୍ରହ୍ମାଂଡଵର୍ତିନଃ ।
ଦେଵେଷୁ ନାଗଲୋକେଷୁ ମନୁଷ୍ୟେଷ୍ଵିତରେଷୁ ଚ ॥ 44 ॥
ଶ୍ରୀଦେଵ୍ୟାସ୍ତେ ଚ ସର୍ଵେପି ଵ୍ରଜଂତ୍ୟତ୍ରୈଵ ଭୂମିପ ।
ଦେଵୀକ୍ଷେତ୍ରେ ୟେ ତ୍ୟଜଂତି ପ୍ରାଣାଂଦେଵ୍ୟର୍ଚନେ ରତାଃ ॥ 45 ॥
ତେ ସର୍ଵେ ୟାଂତି ତତ୍ରୈଵ ୟତ୍ର ଦେଵୀ ମହୋତ୍ସଵା ।
ଘୃତକୁଲ୍ୟା ଦୁଗ୍ଧକୁଲ୍ୟା ଦଧିକୁଲ୍ୟା ମଧୁସ୍ରଵାଃ ॥ 46 ॥
ସ୍ୟଂଦଂତି ସରିତଃ ସର୍ଵାସ୍ତଥାମୃତଵହାଃ ପରାଃ ।
ଦ୍ରାକ୍ଷାରସଵହାଃ କାଶ୍ଚିଜ୍ଜଂବୂରସଵହାଃ ପରାଃ ॥ 47 ॥
ଆମ୍ରେକ୍ଷୁରସଵାହିନ୍ୟୋ ନଦ୍ୟସ୍ତାସ୍ତୁ ସହସ୍ରଶଃ ।
ମନୋରଥଫଲାଵୃକ୍ଷାଵାପ୍ୟଃ କୂପାସ୍ତଥୈଵ ଚ ॥ 48 ॥
ୟଥେଷ୍ଟପାନଫଲଦାନ ନ୍ୟୂନଂ କିଂଚିଦସ୍ତି ହି ।
ନ ରୋଗପଲିତଂ ଵାପି ଜରା ଵାପି କଦାଚନ ॥ 49 ॥
ନ ଚିଂତା ନ ଚ ମାତ୍ସର୍ୟଂ କାମକ୍ରୋଧାଦିକଂ ତଥା ।
ସର୍ଵେ ୟୁଵାନଃ ସସ୍ତ୍ରୀକାଃ ସହସ୍ରାଦିତ୍ୟଵର୍ଚସଃ ॥ 50 ॥
ଭଜଂତି ସତତଂ ଦେଵୀଂ ତତ୍ର ଶ୍ରୀଭୁଵନେଶ୍ଵରୀମ୍ ।
କେଚିତ୍ସଲୋକତାପନ୍ନାଃ କେଚିତ୍ସାମୀପ୍ୟତାଂ ଗତାଃ ॥ 51 ॥
ସରୂପତାଂ ଗତାଃ କେଚିତ୍ସାର୍ଷ୍ଟିତାଂ ଚ ପରେଗତାଃ ।
ୟାୟାସ୍ତୁ ଦେଵତାସ୍ତତ୍ର ପ୍ରତିବ୍ରହ୍ମାଂଡଵର୍ତିନାମ୍ ॥ 52 ॥
ସମଷ୍ଟୟଃ ସ୍ଥିତାସ୍ତାସ୍ତୁ ସେଵଂତେ ଜଗଦୀଶ୍ଵରୀମ୍ ।
ସପ୍ତକୋଟିମହାମଂତ୍ରା ମୂର୍ତିମଂତ ଉପାସତେ ॥ 53 ॥
ମହାଵିଦ୍ୟାଶ୍ଚ ସକଲାଃ ସାମ୍ୟାଵସ୍ଥାତ୍ମିକାଂ ଶିଵାମ୍ ।
କାରଣବ୍ରହ୍ମରୂପାଂ ତାଂ ମାୟା ଶବଲଵିଗ୍ରହାମ୍ ॥ 54 ॥
ଇତ୍ଥଂ ରାଜନ୍ମୟା ପ୍ରୋକ୍ତଂ ମଣିଦ୍ଵୀପଂ ମହତ୍ତରମ୍ ।
ନ ସୂର୍ୟଚଂଦ୍ରୌ ନୋ ଵିଦ୍ୟୁତ୍କୋଟୟୋଗ୍ନିସ୍ତଥୈଵ ଚ ॥ 55 ॥
ଏତସ୍ୟ ଭାସା କୋଟ୍ୟଂଶ କୋଟ୍ୟଂଶୋ ନାପି ତେ ସମାଃ ।
କ୍ଵଚିଦ୍ଵିଦ୍ରୁମସଂକାଶଂ କ୍ଵଚିନ୍ମରକତଚ୍ଛଵି ॥ 56 ॥
ଵିଦ୍ୟୁଦ୍ଭାନୁସମଚ୍ଛାୟଂ ମଧ୍ୟସୂର୍ୟସମଂ କ୍ଵଚିତ୍ ।
ଵିଦ୍ୟୁତ୍କୋଟିମହାଧାରା ସାରକାଂତିତତଂ କ୍ଵଚିତ୍ ॥ 57 ॥
କ୍ଵଚିତ୍ସିଂଦୂର ନୀଲେଂଦ୍ରଂ ମାଣିକ୍ୟ ସଦୃଶଚ୍ଛଵି ।
ହୀରସାର ମହାଗର୍ଭ ଧଗଦ୍ଧଗିତ ଦିକ୍ତଟମ୍ ॥ 58 ॥
କାଂତ୍ୟା ଦାଵାନଲସମଂ ତପ୍ତକାଂଚନ ସନ୍ନିଭମ୍ ।
କ୍ଵଚିଚ୍ଚଂଦ୍ରୋପଲୋଦ୍ଗାରଂ ସୂର୍ୟୋଦ୍ଗାରଂ ଚ କୁତ୍ର ଚିତ୍ ॥ 59 ॥
ରତ୍ନଶୃଂଗି ସମାୟୁକ୍ତଂ ରତ୍ନପ୍ରାକାର ଗୋପୁରମ୍ ।
ରତ୍ନପତ୍ରୈ ରତ୍ନଫଲୈର୍ଵୃକ୍ଷୈଶ୍ଚ ପରିମଂଡିତମ୍ ॥ 60 ॥
ନୃତ୍ୟନ୍ମୟୂରସଂଘୈଶ୍ଚ କପୋତରଣିତୋଜ୍ଜ୍ଵଲମ୍ ।
କୋକିଲାକାକଲୀଲାପୈଃ ଶୁକଲାପୈଶ୍ଚ ଶୋଭିତମ୍ ॥ 61 ॥
ସୁରମ୍ୟ ରମଣୀୟାଂବୁ ଲକ୍ଷାଵଧି ସରୋଵୃତମ୍ ।
ତନ୍ମଧ୍ୟଭାଗ ଵିଲସଦ୍ଵିକଚଦ୍ରତ୍ନ ପଂକଜୈଃ ॥ 62 ॥
ସୁଗଂଧିଭିଃ ସମଂତାତ୍ତୁ ଵାସିତଂ ଶତୟୋଜନମ୍ ।
ମଂଦମାରୁତ ସଂଭିନ୍ନ ଚଲଦ୍ଦ୍ରୁମ ସମାକୁଲମ୍ ॥ 63 ॥
ଚିଂତାମଣି ସମୂହାନାଂ ଜ୍ୟୋତିଷା ଵିତତାଂବରମ୍ ।
ରତ୍ନପ୍ରଭାଭିରଭିତୋ ଧଗଦ୍ଧଗିତ ଦିକ୍ତଟମ୍ ॥ 64 ॥
ଵୃକ୍ଷଵ୍ରାତ ମହାଗଂଧଵାତଵ୍ରାତ ସୁପୂରିତମ୍ ।
ଧୂପଧୂପାୟିତଂ ରାଜନ୍ମଣିଦୀପାୟୁତୋଜ୍ଜ୍ଵଲମ୍ ॥ 65 ॥
ମଣିଜାଲକ ସଚ୍ଛିଦ୍ର ତରଲୋଦରକାଂତିଭିଃ ।
ଦିଙ୍ମୋହଜନକଂ ଚୈତଦ୍ଦର୍ପଣୋଦର ସଂୟୁତମ୍ ॥ 66 ॥
ଐଶ୍ଵର୍ୟସ୍ୟ ସମଗ୍ରସ୍ୟ ଶୃଂଗାରସ୍ୟାଖିଲସ୍ୟ ଚ ।
ସର୍ଵଜ୍ଞତାୟାଃ ସର୍ଵାୟାସ୍ତେଜସଶ୍ଚାଖିଲସ୍ୟ ଚ ॥ 67 ॥
ପରାକ୍ରମସ୍ୟ ସର୍ଵସ୍ୟ ସର୍ଵୋତ୍ତମଗୁଣସ୍ୟ ଚ ।
ସକଲା ୟା ଦୟାୟାଶ୍ଚ ସମାପ୍ତିରିହ ଭୂପତେ ॥ 68 ॥
ରାଜ୍ଞ ଆନଂଦମାରଭ୍ୟ ବ୍ରହ୍ମଲୋକାଂତ ଭୂମିଷୁ ।
ଆନଂଦା ୟେ ସ୍ଥିତାଃ ସର୍ଵେ ତେଽତ୍ରୈଵାଂତର୍ଭଵଂତି ହି ॥ 69 ॥
ଇତି ତେ ଵର୍ଣିତଂ ରାଜନ୍ମଣିଦ୍ଵୀପଂ ମହତ୍ତରମ୍ ।
ମହାଦେଵ୍ୟାଃ ପରଂସ୍ଥାନଂ ସର୍ଵଲୋକୋତ୍ତମୋତ୍ତମମ୍ ॥ 70 ॥
ଏତସ୍ୟ ସ୍ମରଣାତ୍ସଦ୍ୟଃ ସର୍ଵପାପଂ ଵିନଶ୍ୟତି ।
ପ୍ରାଣୋତ୍କ୍ରମଣସଂଧୌ ତୁ ସ୍ମୃତ୍ଵା ତତ୍ରୈଵ ଗଚ୍ଛତି ॥ 71 ॥
ଅଧ୍ୟାୟ ପଂଚକଂ ତ୍ଵେତତ୍ପଠେନ୍ନିତ୍ୟଂ ସମାହିତଃ ।
ଭୂତପ୍ରେତପିଶାଚାଦି ବାଧା ତତ୍ର ଭଵେନ୍ନ ହି ॥ 72 ॥
ନଵୀନ ଗୃହ ନିର୍ମାଣେ ଵାସ୍ତୁୟାଗେ ତଥୈଵ ଚ ।
ପଠିତଵ୍ୟଂ ପ୍ରୟତ୍ନେନ କଲ୍ୟାଣଂ ତେନ ଜାୟତେ ॥ 73 ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ଦ୍ଵାଦଶୋଧ୍ୟାୟଃ ॥