॥ ତୃତୀୟମୁଂଡକେ ଦ୍ଵିତୀୟଃ ଖଂଡଃ ॥
ସ ଵେଦୈତତ୍ ପରମଂ ବ୍ରହ୍ମ ଧାମ
ୟତ୍ର ଵିଶ୍ଵଂ ନିହିତଂ ଭାତି ଶୁଭ୍ରମ୍ ।
ଉପାସତେ ପୁରୁଷଂ-ୟେଁ ହ୍ୟକାମାସ୍ତେ
ଶୁକ୍ରମେତଦତିଵର୍ତଂତି ଧୀରାଃ ॥ 1॥
କାମାନ୍ ୟଃ କାମୟତେ ମନ୍ୟମାନଃ
ସ କାମଭିର୍ଜାୟତେ ତତ୍ର ତତ୍ର ।
ପର୍ୟାପ୍ତକାମସ୍ୟ କୃତାତ୍ମନସ୍ତୁ
ଇହୈଵ ସର୍ଵେ ପ୍ରଵିଲୀୟଂତି କାମାଃ ॥ 2॥
ନାୟମାତ୍ମା ପ୍ରଵଚନେନ ଲଭ୍ୟୋ
ନ ମେଧୟା ନ ବହୁନା ଶ୍ରୁତେନ ।
ୟମେଵୈଷ ଵୃଣୁତେ ତେନ ଲଭ୍ୟ-
ସ୍ତସ୍ୟୈଷ ଆତ୍ମା ଵିଵୃଣୁତେ ତନୂଂ ସ୍ଵାମ୍ ॥ 3॥
ନାୟମାତ୍ମା ବଲହୀନେନ ଲଭ୍ୟୋ
ନ ଚ ପ୍ରମାଦାତ୍ ତପସୋ ଵାପ୍ୟଲିଂଗାତ୍ ।
ଏତୈରୁପାୟୈର୍ୟତତେ ୟସ୍ତୁ ଵିଦ୍ଵାଂ-
ସ୍ତସ୍ୟୈଷ ଆତ୍ମା ଵିଶତେ ବ୍ରହ୍ମଧାମ ॥ 4॥
ସଂପ୍ରାପ୍ୟୈନମୃଷୟୋ ଜ୍ଞାନତୃପ୍ତାଃ
କୃତାତ୍ମାନୋ ଵୀତରାଗାଃ ପ୍ରଶାଂତାଃ
ତେ ସର୍ଵଗଂ ସର୍ଵତଃ ପ୍ରାପ୍ୟ ଧୀରା
ୟୁକ୍ତାତ୍ମାନଃ ସର୍ଵମେଵାଵିଶଂତି ॥ 5॥
ଵେଦାଂତଵିଜ୍ଞାନସୁନିଶ୍ଚିତାର୍ଥାଃ
ସଂନ୍ୟାସୟୋଗାଦ୍ ୟତୟଃ ଶୁଦ୍ଧସତ୍ତ୍ଵାଃ ।
ତେ ବ୍ରହ୍ମଲୋକେଷୁ ପରାଂତକାଲେ
ପରାମୃତାଃ ପରିମୁଚ୍ୟଂତି ସର୍ଵେ ॥ 6॥
ଗତାଃ କଲାଃ ପଂଚଦଶ ପ୍ରତିଷ୍ଠା
ଦେଵାଶ୍ଚ ସର୍ଵେ ପ୍ରତିଦେଵତାସୁ ।
କର୍ମାଣି ଵିଜ୍ଞାନମୟଶ୍ଚ ଆତ୍ମା
ପରେଽଵ୍ୟୟେ ସର୍ଵେ ଏକୀଭଵଂତି ॥ 7॥
ୟଥା ନଦ୍ୟଃ ସ୍ୟଂଦମାନାଃ ସମୁଦ୍ରେଽ
ସ୍ତଂ ଗଚ୍ଛଂତି ନାମରୂପେ ଵିହାୟ ।
ତଥା ଵିଦ୍ଵାନ୍ ନାମରୂପାଦ୍ଵିମୁକ୍ତଃ
ପରାତ୍ପରଂ ପୁରୁଷମୁପୈତି ଦିଵ୍ୟମ୍ ॥ 8॥
ସ ୟୋ ହ ଵୈ ତତ୍ ପରମଂ ବ୍ରହ୍ମ ଵେଦ
ବ୍ରହ୍ମୈଵ ଭଵତି ନାସ୍ୟାବ୍ରହ୍ମଵିତ୍କୁଲେ ଭଵତି ।
ତରତି ଶୋକଂ ତରତି ପାପ୍ମାନଂ ଗୁହାଗ୍ରଂଥିଭ୍ୟୋ
ଵିମୁକ୍ତୋଽମୃତୋ ଭଵତି ॥ 9॥
ତଦେତଦୃଚାଽଭ୍ୟୁକ୍ତମ୍ ।
କ୍ରିୟାଵଂତଃ ଶ୍ରୋତ୍ରିୟା ବ୍ରହ୍ମନିଷ୍ଠାଃ
ସ୍ଵୟଂ ଜୁହ୍ଵତ ଏକର୍ଷିଂ ଶ୍ରଦ୍ଧୟଂତଃ ।
ତେଷାମେଵୈତାଂ ବ୍ରହ୍ମଵିଦ୍ୟାଂ-ଵଁଦେତ
ଶିରୋଵ୍ରତଂ-ଵିଁଧିଵଦ୍ ୟୈସ୍ତୁ ଚୀର୍ଣମ୍ ॥ 10॥
ତଦେତତ୍ ସତ୍ୟମୃଷିରଂଗିରାଃ
ପୁରୋଵାଚ ନୈତଦଚୀର୍ଣଵ୍ରତୋଽଧୀତେ ।
ନମଃ ପରମୃଷିଭ୍ୟୋ ନମଃ ପରମୃଷିଭ୍ୟଃ ॥ 11॥
॥ ଇତି ମୁଂଡକୋପନିଷଦି ତୃତୀୟମୁଂଡକେ ଦ୍ଵିତୀୟଃ ଖଂଡଃ ॥
॥ ଇତ୍ୟଥର୍ଵଵେଦୀୟ ମୁଂଡକୋପନିଷତ୍ସମାପ୍ତା ॥
ଓଂ ଭ॒ଦ୍ରଂ କର୍ଣେ॑ଭିଃ ଶୃଣୁ॒ୟାମ॑ ଦେଵାଃ । ଭ॒ଦ୍ରଂ ପ॑ଶ୍ୟେମା॒କ୍ଷଭି॒-ର୍ୟଜ॑ତ୍ରାଃ । ସ୍ଥି॒ରୈରଂଗୈ᳚ସ୍ତୁଷ୍ଟୁ॒ଵାଗ୍ମ୍ ସ॑ସ୍ତ॒ନୂଭିଃ॑ । ଵ୍ୟଶେ॑ମ ଦେ॒ଵହି॑ତଂ॒-ୟଁଦାୟୁଃ॑ । ସ୍ଵ॒ସ୍ତି ନ॒ ଇଂଦ୍ରୋ॑ ଵୃ॒ଦ୍ଧଶ୍ର॑ଵାଃ । ସ୍ଵ॒ସ୍ତି ନଃ॑ ପୂ॒ଷା ଵି॒ଶ୍ଵଵେ॑ଦାଃ । ସ୍ଵ॒ସ୍ତି ନ॒ସ୍ତାର୍କ୍ଷ୍ୟୋ॒ ଅରି॑ଷ୍ଟନେମିଃ । ସ୍ଵ॒ସ୍ତି ନୋ॒ ବୃହ॒ସ୍ପତି॑-ର୍ଦଧାତୁ ॥
ଓଂ ଶାଂତିଃ॒ ଶାଂତିଃ॒ ଶାଂତିଃ॑ ॥
॥ ଓଂ ଶାଂତିଃ ଶାଂତିଃ ଶାଂତିଃ ॥