ଓଂ ଶ୍ରୀ ପରମାତ୍ମନେ ନମଃ
ଅଥ ଅଷ୍ଟମୋଽଧ୍ୟାୟଃ
ଅକ୍ଷରପରବ୍ରହ୍ମୟୋଗଃ
ଅର୍ଜୁନ ଉଵାଚ
କିଂ ତଦ୍ବ୍ରହ୍ମ କିମଧ୍ୟାତ୍ମଂ କିଂ କର୍ମ ପୁରୁଷୋତ୍ତମ ।
ଅଧିଭୂତଂ ଚ କିଂ ପ୍ରୋକ୍ତମ୍ ଅଧିଦୈଵଂ କିମୁଚ୍ୟତେ ॥1॥
ଅଧିୟଜ୍ଞଃ କଥଂ କୋଽତ୍ର ଦେହେଽସ୍ମିନ୍ମଧୁସୂଦନ ।
ପ୍ରୟାଣକାଲେ ଚ କଥଂ ଜ୍ଞେୟୋଽସି ନିୟତାତ୍ମଭିଃ ॥2॥
ଶ୍ରୀ ଭଗଵାନୁଵାଚ
ଅକ୍ଷରଂ ବ୍ରହ୍ମ ପରମଂ ସ୍ଵଭାଵୋଽଧ୍ୟାତ୍ମମୁଚ୍ୟତେ ।
ଭୂତଭାଵୋଦ୍ଭଵକରଃ ଵିସର୍ଗଃ କର୍ମସଂଜ୍ଞିତଃ ॥3॥
ଅଧିଭୂତଂ କ୍ଷରୋ ଭାଵଃ ପୁରୁଷଶ୍ଚାଧିଦୈଵତମ୍ ।
ଅଧିୟଜ୍ଞୋଽହମେଵାତ୍ର ଦେହେ ଦେହଭୃତାଂ ଵର ॥4॥
ଅଂତକାଲେ ଚ ମାମେଵ ସ୍ମରନ୍ମୁକ୍ତ୍ଵା କଲେଵରମ୍ ।
ୟଃ ପ୍ରୟାତି ସ ମଦ୍ଭାଵଂ ୟାତି ନାସ୍ତ୍ୟତ୍ର ସଂଶୟଃ ॥5॥
ୟଂ ୟଂ ଵାପି ସ୍ମରନ୍ଭାଵଂ ତ୍ୟଜତ୍ୟଂତେ କଲେଵରମ୍ ।
ତଂ ତମେଵୈତି କୌଂତେୟ ସଦା ତଦ୍ଭାଵଭାଵିତଃ ॥6॥
ତସ୍ମାତ୍ସର୍ଵେଷୁ କାଲେଷୁ ମାମନୁସ୍ମର ୟୁଧ୍ୟ ଚ ।
ମୟ୍ୟର୍ପିତମନୋବୁଦ୍ଧିଃ ମାମେଵୈଷ୍ୟସ୍ୟସଂଶୟମ୍ ॥7॥
ଅଭ୍ୟାସୟୋଗୟୁକ୍ତେନ ଚେତସା ନାନ୍ୟଗାମିନା ।
ପରମଂ ପୁରୁଷଂ ଦିଵ୍ୟଂ ୟାତି ପାର୍ଥାନୁଚିଂତୟନ୍ ॥8॥
କଵିଂ ପୁରାଣମନୁଶାସିତାରମ୍ ଅଣୋରଣୀୟାଂସମନୁସ୍ମରେଦ୍ୟଃ ।
ସର୍ଵସ୍ୟ ଧାତାରମଚିଂତ୍ୟରୂପଂ ଆଦିତ୍ୟଵର୍ଣଂ ତମସଃ ପରସ୍ତାତ୍ ॥9॥
ପ୍ରୟାଣକାଲେ ମନସାଽଚଲେନ ଭକ୍ତ୍ୟା ୟୁକ୍ତୋ ୟୋଗବଲେନ ଚୈଵ ।
ଭ୍ରୁଵୋର୍ମଧ୍ୟେ ପ୍ରାଣମାଵେଶ୍ୟ ସମ୍ୟକ୍ ସ ତଂ ପରଂ ପୁରୁଷମୁପୈତି ଦିଵ୍ୟମ୍ ॥10॥
ୟଦକ୍ଷରଂ ଵେଦଵିଦୋ ଵଦଂତି ଵିଶଂତି ୟଦ୍ୟତୟୋ ଵୀତରାଗାଃ ।
ୟଦିଚ୍ଛଂତୋ ବ୍ରହ୍ମଚର୍ୟଂ ଚରଂତି ତତ୍ତେ ପଦଂ ସଂଗ୍ରହେଣ ପ୍ରଵକ୍ଷ୍ୟେ ॥11॥
ସର୍ଵଦ୍ଵାରାଣି ସଂୟମ୍ୟ ମନୋ ହୃଦି ନିରୁଧ୍ୟ ଚ ।
ମୂର୍ଧ୍ନ୍ୟାଧାୟାତ୍ମନଃ ପ୍ରାଣମ୍ ଆସ୍ଥିତୋ ୟୋଗଧାରଣାମ୍ ॥12॥
ଓମିତ୍ୟେକାକ୍ଷରଂ ବ୍ରହ୍ମ ଵ୍ୟାହରନ୍ମାମନୁସ୍ମରନ୍ ।
ୟଃ ପ୍ରୟାତି ତ୍ୟଜଂଦେହଂ ସ ୟାତି ପରମାଂ ଗତିମ୍ ॥13॥
ଅନନ୍ୟଚେତାଃ ସତତଂ ୟୋ ମାଂ ସ୍ମରତି ନିତ୍ୟଶଃ ।
ତସ୍ୟାହଂ ସୁଲଭଃ ପାର୍ଥ ନିତ୍ୟୟୁକ୍ତସ୍ୟ ୟୋଗିନଃ ॥14॥
ମାମୁପେତ୍ୟ ପୁନର୍ଜନ୍ମ ଦୁଃଖାଲୟମଶାଶ୍ଵତମ୍ ।
ନାପ୍ନୁଵଂତି ମହାତ୍ମାନଃ ସଂସିଦ୍ଧିଂ ପରମାଂ ଗତାଃ ॥15॥
ଆବ୍ରହ୍ମଭୁଵନାଲ୍ଲୋକାଃ ପୁନରାଵର୍ତିନୋଽର୍ଜୁନ ।
ମାମୁପେତ୍ୟ ତୁ କୌଂତେୟ ପୁନର୍ଜନ୍ମ ନ ଵିଦ୍ୟତେ ॥16॥
ସହସ୍ରୟୁଗପର୍ୟଂତମ୍ ଅହର୍ୟଦ୍ବ୍ରହ୍ମଣୋ ଵିଦୁଃ ।
ରାତ୍ରିଂ ୟୁଗସହସ୍ରାଂତାଂ ତେଽହୋରାତ୍ରଵିଦୋ ଜନାଃ ॥17॥
ଅଵ୍ୟକ୍ତାଦ୍ଵ୍ୟକ୍ତୟଃ ସର୍ଵାଃ ପ୍ରଭଵଂତ୍ୟହରାଗମେ ।
ରାତ୍ର୍ୟାଗମେ ପ୍ରଲୀୟଂତେ ତତ୍ରୈଵାଵ୍ୟକ୍ତସଂଜ୍ଞକେ ॥18॥
ଭୂତଗ୍ରାମଃ ସ ଏଵାୟଂ ଭୂତ୍ଵା ଭୂତ୍ଵା ପ୍ରଲୀୟତେ ।
ରାତ୍ର୍ୟାଗମେଽଵଶଃ ପାର୍ଥ ପ୍ରଭଵତ୍ୟହରାଗମେ ॥19॥
ପରସ୍ତସ୍ମାତ୍ତୁ ଭାଵୋଽନ୍ୟଃ ଅଵ୍ୟକ୍ତୋଽଵ୍ୟକ୍ତାତ୍ସନାତନଃ ।
ୟଃ ସ ସର୍ଵେଷୁ ଭୂତେଷୁ ନଶ୍ୟତ୍ସୁ ନ ଵିନଶ୍ୟତି ॥20॥
ଅଵ୍ୟକ୍ତୋଽକ୍ଷର ଇତ୍ୟୁକ୍ତଃ ତମାହୁଃ ପରମାଂ ଗତିମ୍ ।
ୟଂ ପ୍ରାପ୍ୟ ନ ନିଵର୍ତଂତେ ତଦ୍ଧାମ ପରମଂ ମମ ॥21॥
ପୁରୁଷଃ ସ ପରଃ ପାର୍ଥ ଭକ୍ତ୍ୟା ଲଭ୍ୟସ୍ତ୍ଵନନ୍ୟୟା ।
ୟସ୍ୟାଂତଃ ସ୍ଥାନି ଭୂତାନି ୟେନ ସର୍ଵମିଦଂ ତତମ୍ ॥22॥
ୟତ୍ର କାଲେ ତ୍ଵନାଵୃତ୍ତିମ୍ ଆଵୃତ୍ତିଂ ଚୈଵ ୟୋଗିନଃ ।
ପ୍ରୟାତା ୟାଂତି ତଂ କାଲଂ ଵକ୍ଷ୍ୟାମି ଭରତର୍ଷଭ ॥23॥
ଅଗ୍ନିର୍ଜ୍ୟୋତିରହଃ ଶୁକ୍ଲଃ ଷଣ୍ମାସା ଉତ୍ତରାୟଣମ୍ ।
ତତ୍ର ପ୍ରୟାତା ଗଚ୍ଛଂତି ବ୍ରହ୍ମ ବ୍ରହ୍ମଵିଦୋ ଜନାଃ ॥24॥
ଧୂମୋ ରାତ୍ରିସ୍ତଥା କୃଷ୍ଣଃ ଷଣ୍ମାସା ଦକ୍ଷିଣାୟନମ୍ ।
ତତ୍ର ଚାଂଦ୍ରମସଂ ଜ୍ୟୋତିଃ ୟୋଗୀ ପ୍ରାପ୍ୟ ନିଵର୍ତତେ ॥25॥
ଶୁକ୍ଲକୃଷ୍ଣେ ଗତୀ ହ୍ୟେତେ ଜଗତଃ ଶାଶ୍ଵତେ ମତେ ।
ଏକୟା ୟାତ୍ୟନାଵୃତ୍ତିମ୍ ଅନ୍ୟୟାଽଽଵର୍ତତେ ପୁନଃ ॥26॥
ନୈତେ ସୃତୀ ପାର୍ଥ ଜାନନ୍ ୟୋଗୀ ମୁହ୍ୟତି କଶ୍ଚନ ।
ତସ୍ମାତ୍ସର୍ଵେଷୁ କାଲେଷୁ ୟୋଗୟୁକ୍ତୋ ଭଵାର୍ଜୁନ ॥27॥
ଵେଦେଷୁ ୟଜ୍ଞେଷୁ ତପସ୍ସୁ ଚୈଵ ଦାନେଷୁ ୟତ୍ପୁଣ୍ୟଫଲଂ ପ୍ରଦିଷ୍ଟମ୍ ।
ଅତ୍ୟେତି ତତ୍ସର୍ଵମିଦଂ ଵିଦିତ୍ଵା ୟୋଗୀ ପରଂ ସ୍ଥାନମୁପୈତି ଚାଦ୍ୟମ୍ ॥28॥
॥ ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୁ ଉପନିଷତ୍ସୁ ବ୍ରହ୍ମଵିଦ୍ୟାୟାଂ
ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ ଅକ୍ଷରପରବ୍ରହ୍ମୟୋଗୋ ନାମ ଅଷ୍ଟମୋଽଧ୍ୟାୟଃ ॥