ୟଃ ଶ୍ରୀଗୋଵର୍ଧନାଦ୍ରିଂ ସକଲସୁରପତୀଂସ୍ତତ୍ରଗୋଗୋପବୃଂଦଂ
ସ୍ଵୀୟଂ ସଂରକ୍ଷିତୁଂ ଚେତ୍ୟମରସୁଖକରଂ ମୋହୟନ୍ ସଂଦଧାର ।
ତନ୍ମାନଂ ଖଂଡୟିତ୍ଵା ଵିଜିତରିପୁକୁଲୋ ନୀଲଧାରାଧରାଭଃ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 1 ॥
ୟଂ ଦୃଷ୍ଟ୍ଵା କଂସଭୂପଃ ସ୍ଵକୃତକୃତିମହୋ ସଂସ୍ମରନ୍ମଂତ୍ରିଵର୍ୟାନ୍
କିଂ ଵା ପୂର୍ଵଂ ମୟେଦଂ କୃତମିତି ଵଚନଂ ଦୁଃଖିତଃ ପ୍ରତ୍ୟୁଵାଚ ।
ଆଜ୍ଞପ୍ତୋ ନାରଦେନ ସ୍ମିତୟୁତଵଦନଃ ପୂରୟନ୍ସର୍ଵକାମାନ୍
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 2 ॥
ୟେନ ପ୍ରୋଦ୍ୟତ୍ପ୍ରତାପା ନୃପତିକୁଲଭଵାଃ ପାଂଡଵାଃ କୌରଵାବ୍ଧିଂ
ତୀର୍ତ୍ଵା ପାରଂ ତଦୀୟଂ ଜଗଦଖିଲନୃଣାଂ ଦୁସ୍ତରଂଚେତି ଜଗ୍ମୁଃ ।
ତତ୍ପତ୍ନୀଚୀରଵୃଦ୍ଧିପ୍ରଵିଦିତମହିମା ଭୂତଲେ ଭୂପତୀଶଃ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 3 ॥
ୟସ୍ମୈ ଚୋଦ୍ଧୃତ୍ୟ ପାତ୍ରାଦ୍ଦଧିୟୁତନଵନୀତଂ କରୈର୍ଗୋପିକାଭି-
ର୍ଦତ୍ତଂ ତଦ୍ଭାଵପୂର୍ତୌ ଵିନିହିତହୃଦୟସ୍ସତ୍ୟମେଵଂ ତିରୋଧାତ୍ ।
ମୁକ୍ତାଗୁଂଜାଵଳୀଭିଃ ପ୍ରଚୁରତମରୁଚିଃ କୁଂଡଲାକ୍ରାଂତଗଂଡଃ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 4 ॥
ୟସ୍ମାଦ୍ଵିଶ୍ଵାଭିରାମାଦିହ ଜନନଵିଧୌ ସର୍ଵନଂଦାଦିଗୋପାଃ
ସଂସାରାର୍ତେର୍ଵିମୁକ୍ତାଃ ସକଲସୁଖକରାଃ ସଂପଦଃ ପ୍ରାପୁରେଵ ।
ଇତ୍ଥଂ ପୂର୍ଣେଂଦୁଵକ୍ତ୍ରଃ କଲକମଲଦୃଶଃ ସ୍ଵୀୟଜନ୍ମ ସ୍ତୁଵଂତଃ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 5 ॥
ୟସ୍ୟ ଶ୍ରୀନଂଦସୂନୋଃ ଵ୍ରଜୟୁଵତିଜନାଶ୍ଚାଗତା ଭର୍ତୃପୁତ୍ରାଂ-
ସ୍ତ୍ୟକ୍ତ୍ଵା ଶ୍ରୁତ୍ଵା ସମୀପେ ଵିଚକିତନୟନାଃ ସପ୍ରମୋଦାଃ ସ୍ଵଗେହେ ।
ରଂତୁଂ ରାସାଦିଲୀଲା ମନସିଜଦଲିତା ଵେଣୁନାଦଂ ଚ ରମ୍ୟଂ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 6 ॥
ୟସ୍ମିନ୍ ଦୃଷ୍ଟେ ସମସ୍ତେ ଜଗତି ୟୁଵତୟଃ ପ୍ରାଣନାଥଵ୍ରତାୟା-
ସ୍ତା ଅପ୍ୟେଵଂ ହି ନୂନଂ କିମପି ଚ ହୃଦୟେ କାମଭାଵଂ ଦଧତ୍ୟଃ ।
ତତ୍ସ୍ନେହାବ୍ଧିଂ ଵପୁଶ୍ଚେଦଵିଦିତଧରଣୌ ସୂର୍ୟବିଂବସ୍ଵରୂପାଃ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 7 ॥
ୟଃ ସ୍ଵୀୟେ ଗୋକୁଲେଽସ୍ମିନ୍ଵିଦିତନିଜକୁଲୋଦ୍ଭୂତବାଲୈଃ ସମେତୋ
ମାତର୍ୟେଵଂ ଚକାର ପ୍ରସୃତତମଗୁଣାନ୍ବାଲଲୀଲାଵିଲାସାନ୍ ।
ହତ୍ଵା ଵତ୍ସପ୍ରଲଂବଦ୍ଵିଵିଦବକଖରାନ୍ଗୋପବୃଂଦଂ ଜୁଗୋପ
କୃଷ୍ଣୋ ରାଧାସମେତୋ ଵିଲସତୁ ହୃଦୟେ ସୋଽସ୍ମଦୀୟେ ସଦୈଵ ॥ 8 ॥
କୃଷ୍ଣାରାଧାଷ୍ଟକଂ ପ୍ରାତରୁତ୍ଥାୟ ପ୍ରପଠେନ୍ନରଃ ।
ୟ ଏଵଂ ସର୍ଵଦା ନୂନଂ ସ ପ୍ରାପ୍ନୋତି ପରାଂ ଗତିମ୍ ॥ 9 ॥
ଇତି ଶ୍ରୀରଘୁନାଥଚାର୍ୟ ଵିରଚିତଂ ଶ୍ରୀରାଧାକୃଷ୍ଣାଷ୍ଟକମ୍ ।