ଶ୍ରୀ ଗଣେଶାୟ ନମଃ ।
ଶ୍ରୀ ମହାଦେଵ ଉଵାଚ ।
ତତୋ ରାମଃ ସ୍ଵୟଂ ପ୍ରାହ ହନୁମଂତମୁପସ୍ଥିତମ୍ ।
ଶଋଣୁ ୟତ୍ଵଂ ପ୍ରଵକ୍ଷ୍ୟାମି ହ୍ୟାତ୍ମାନାତ୍ମପରାତ୍ମନାମ୍ ॥ 1॥
ଆକାଶସ୍ୟ ୟଥା ଭେଦସ୍ତ୍ରିଵିଧୋ ଦୃଶ୍ୟତେ ମହାନ୍ ।
ଜଲାଶୟେ ମହାକାଶସ୍ତଦଵଚ୍ଛିନ୍ନ ଏଵ ହି ।
ପ୍ରତିବିଂବାଖ୍ୟମପରଂ ଦୃଶ୍ୟତେ ତ୍ରିଵିଧଂ ନଭଃ ॥ 2॥
ବୁଦ୍ଧ୍ୟଵଚ୍ଛିନ୍ନଚୈତନ୍ୟମେକଂ ପୂର୍ଣମଥାପରମ୍ ।
ଆଭାସସ୍ତ୍ଵପରଂ ବିଂବଭୂତମେଵଂ ତ୍ରିଧା ଚିତିଃ ॥ 3॥
ସାଭାସବୁଦ୍ଧେଃ କର୍ତୃତ୍ଵମଵିଚ୍ଛିନ୍ନେଽଵିକାରିଣି ।
ସାକ୍ଷିଣ୍ୟାରୋପ୍ୟତେ ଭ୍ରାଂତ୍ୟା ଜୀଵତ୍ଵଂ ଚ ତଥାଽବୁଧୈଃ ॥ 4॥
ଆଭାସସ୍ତୁ ମୃଷାବୁଦ୍ଧିରଵିଦ୍ୟାକାର୍ୟମୁଚ୍ୟତେ ।
ଅଵିଚ୍ଛିନ୍ନଂ ତୁ ତଦ୍ବ୍ରହ୍ମ ଵିଚ୍ଛେଦସ୍ତୁ ଵିକଲ୍ପିତଃ ॥ 5॥
ଅଵିଚ୍ଛିନ୍ନସ୍ୟ ପୂର୍ଣେନ ଏକତ୍ଵଂ ପ୍ରତିପଦ୍ୟତେ ।
ତତ୍ତ୍ଵମସ୍ୟାଦିଵାକ୍ୟୈଶ୍ଚ ସାଭାସସ୍ୟାହମସ୍ତଥା ॥ 6॥
ଐକ୍ୟଜ୍ଞାନଂ ୟଦୋତ୍ପନ୍ନଂ ମହାଵାକ୍ୟେନ ଚାତ୍ମନୋଃ ।
ତଦାଽଵିଦ୍ୟା ସ୍ଵକାର୍ୟୈଶ୍ଚ ନଶ୍ୟତ୍ୟେଵ ନ ସଂଶୟଃ ॥ 7॥
ଏତଦ୍ଵିଜ୍ଞାୟ ମଦ୍ଭକ୍ତୋ ମଦ୍ଭାଵାୟୋପପଦ୍ୟତେ
ମଦ୍ଭକ୍ତିଵିମୁଖାନାଂ ହି ଶାସ୍ତ୍ରଗର୍ତେଷୁ ମୁହ୍ୟତାମ୍ ।
ନ ଜ୍ଞାନଂ ନ ଚ ମୋକ୍ଷଃ ସ୍ୟାତ୍ତେଷାଂ ଜନ୍ମଶତୈରପି ॥ 8॥
ଇଦଂ ରହସ୍ୟଂ ହୃଦୟଂ ମମାତ୍ମନୋ ମୟୈଵ ସାକ୍ଷାତ୍କଥିତଂ ତଵାନଘ ।
ମଦ୍ଭକ୍ତିହୀନାୟ ଶଠାୟ ନ ତ୍ଵୟା ଦାତଵ୍ୟମୈଂଦ୍ରାଦପି ରାଜ୍ୟତୋଽଧିକମ୍ ॥ 9॥
॥ ଶ୍ରୀମଦଧ୍ୟାତ୍ମରାମାୟଣେ ବାଲକାଂଡେ ଶ୍ରୀରାମହୃଦୟଂ ସଂପୂର୍ଣମ୍ ॥