ପ୍ରାତସ୍ସ୍ମରାମି ଗଣନାଥମନାଥବଂଧୁଂ
ସିଂଦୂରପୂରପରିଶୋଭିତଗଂଡୟୁଗ୍ମମ୍ ।
ଉଦ୍ଦଂଡଵିଘ୍ନପରିଖଂଡନଚଂଡଦଂଡ-
ମାଖଂଡଲାଦିସୁରନାୟକଵୃଂଦଵଂଦ୍ୟମ୍ ॥ 1॥
କଲାଭ୍ୟାଂ ଚୂଡାଲଂକୃତଶଶିକଲାଭ୍ୟାଂ ନିଜତପଃ
ଫଲାଭ୍ୟାଂ ଭକ୍ତେଷୁ ପ୍ରକଟିତଫଲାଭ୍ୟାଂ ଭଵତୁ ମେ ।
ଶିଵାଭ୍ୟାମାସ୍ତୀକତ୍ରିଭୁଵନଶିଵାଭ୍ୟାଂ ହୃଦି ପୁନ-
ର୍ଭଵାଭ୍ୟାମାନଂଦସ୍ଫୁରଦନୁଭଵାଭ୍ୟାଂ ନତିରିୟମ୍ ॥ 2॥
ନମସ୍ତେ ନମସ୍ତେ ମହାଦେଵ! ଶଂଭୋ!
ନମସ୍ତେ ନମସ୍ତେ ଦୟାପୂର୍ଣସିଂଧୋ!
ନମସ୍ତେ ନମସ୍ତେ ପ୍ରପନ୍ନାତ୍ମବଂଧୋ!
ନମସ୍ତେ ନମସ୍ତେ ନମସ୍ତେ ମହେଶ ॥ 3॥
ଶଶ୍ଵଚ୍ଛ୍ରୀଗିରିମୂର୍ଧନି ତ୍ରିଜଗତାଂ ରକ୍ଷାକୃତୌ ଲକ୍ଷିତାଂ
ସାକ୍ଷାଦକ୍ଷତସତ୍କଟାକ୍ଷସରଣିଶ୍ରୀମତ୍ସୁଧାଵର୍ଷିଣୀମ୍ ।
ସୋମାର୍ଧାଂକିତମସ୍ତକାଂ ପ୍ରଣମତାଂ ନିସ୍ସୀମସଂପତ୍ପ୍ରଦାଂ
ସୁଶ୍ଲୋକାଂ ଭ୍ରମରାଂବିକାଂ ସ୍ମିତମୁଖୀଂ ଶଂଭୋସ୍ସଖୀଂ ତ୍ଵାଂ ସ୍ତୁମଃ ॥ 4॥
ମାତଃ! ପ୍ରସୀଦ, ସଦୟା ଭଵ, ଭଵ୍ୟଶୀଲେ !
ଲୀଲାଲଵାକୁଲିତଦୈତ୍ୟକୁଲାପହାରେ !
ଶ୍ରୀଚକ୍ରରାଜନିଲୟେ ! ଶ୍ରୁତିଗୀତକୀର୍ତେ !
ଶ୍ରୀଶୈଲନାଥଦୟିତେ ! ତଵ ସୁପ୍ରଭାତମ୍ ॥ 5॥
ଶଂଭୋ ! ସୁରେଂଦ୍ରନୁତ ! ଶଂକର ! ଶୂଲପାଣେ !
ଚଂଦ୍ରାଵତଂସ ! ଶିଵ ! ଶର୍ଵ ! ପିନାକପାଣେ !
ଗଂଗାଧର ! କ୍ରତୁପତେ ! ଗରୁଡଧ୍ଵଜାପ୍ତ !
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 6॥
ଵିଶ୍ଵେଶ ! ଵିଶ୍ଵଜନସେଵିତ ! ଵିଶ୍ଵମୂର୍ତେ !
ଵିଶ୍ଵଂଭର ! ତ୍ରିପୁରଭେଦନ ! ଵିଶ୍ଵୟୋନେ !
ଫାଲାକ୍ଷ ! ଭଵ୍ୟଗୁଣ ! ଭୋଗିଵିଭୂଷଣେଶ !
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 7॥
କଲ୍ୟାଣରୂପ ! କରୁଣାକର ! କାଲକଂଠ !
କଲ୍ପଦ୍ରୁମପ୍ରସଵପୂଜିତ ! କାମଦାୟିନ୍ !
ଦୁର୍ନୀତିଦୈତ୍ୟଦଲନୋଦ୍ୟତ ! ଦେଵ ଦେଵ !
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 8॥
ଗୌରୀମନୋହର ! ଗଣେଶ୍ଵରସେଵିତାଂଘ୍ରେ !
ଗଂଧର୍ଵୟକ୍ଷସୁରକିନ୍ନରଗୀତକୀର୍ତେ !
ଗଂଡାଵଲଂବିଫଣିକୁଂଡଲମଂଡିତାସ୍ୟ !
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 9॥
ନାଗେଂଦ୍ରଭୂଷଣ ! ନିରୀହିତ ! ନିର୍ଵିକାର !
ନିର୍ମାୟ ! ନିଶ୍ଚଲ ! ନିରର୍ଗଲ ! ନାଗଭେଦିନ୍ ।
ନାରାୟଣୀପ୍ରିୟ ! ନତେଷ୍ଟଦ ! ନିର୍ମଲାତ୍ମନ୍ !
ଶ୍ରୀପର୍ଵତାଧିପ ! ଵିଭୋ ! ତଵ ସୁପ୍ରଭାତମ୍ ॥ 10॥
ସୃଷ୍ଟଂ ତ୍ଵୟୈଵ ଜଗଦେତଦଶେଷମୀଶ !
ରକ୍ଷାଵିଧିଶ୍ଚ ଵିଧିଗୋଚର ! ତାଵକୀନଃ ।
ସଂହାରଶକ୍ତିରପି ଶଂକର ! କିଂକରୀ ତେ
ଶ୍ରୀଶୈଲଶେଖର ଵିଭୋ ! ତଵ ସୁପ୍ରଭାତମ୍ ॥ 11॥
ଏକସ୍ତ୍ଵମେଵ ବହୁଧା ଭଵ ! ଭାସି ଲୋକେ
ନିଶ୍ଶଂକଧୀର୍ଵୃଷଭକେତନ ! ମଲ୍ଲିନାଥ !
ଶ୍ରୀଭ୍ରାମରୀପ୍ରୟ ! ସୁଖାଶ୍ରୟ ! ଲୋକନାଥ !
ଶ୍ରୀଶୈଲଶେଖର ଵିଭୋ ! ତଵ ସୁପ୍ରଭାତମ୍ ॥ 12॥
ପାତାଲଗାଂଗଜଲମଜ୍ଜନନିର୍ମଲାଂଗାଃ
ଭସ୍ମତ୍ରିପୁଂଡ୍ରସମଲଂକୃତଫାଲଭାଗାଃ ।
ଗାୟଂତି ଦେଵମୁନିଭକ୍ତଜନା ଭଵଂତଂ
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 13॥
ସାରସ୍ଵତାଂବୁୟୁତଭୋଗଵତୀଶ୍ରିତାୟାଃ
ବ୍ରହ୍ମେଶଵିଷ୍ଣୁଗିରିଚୁଂବିତକୃଷ୍ଣଵେଣ୍ୟାଃ ।
ସୋପାନମାର୍ଗମଧିରୁହ୍ୟ ଭଜଂତି ଭକ୍ତାଃ
ଶ୍ରୀମଲ୍ଲିକାର୍ଜୁନ ଵିଭୋ ! ତଵ ସୁପ୍ରଭାତମ୍ ॥ 14॥
ଶ୍ରୀମଲ୍ଲିକାର୍ଜୁନମହେଶ୍ଵରସୁପ୍ରଭାତ-
ସ୍ତୋତ୍ରଂ ପଠଂତି ଭୁଵି ୟେ ମନୁଜାଃ ପ୍ରଭାତେ ।
ତେ ସର୍ଵ ସୌଖ୍ୟମନୁଭୂୟ ପରାନଵାପ୍ୟଂ
ଶ୍ରୀଶାଂଭଵଂ ପଦମଵାପ୍ୟ ମୁଦଂ ଲଭଂତେ ॥ 15॥
ଇତି ଶ୍ରୀମଲ୍ଲିକାର୍ଜୁନସୁପ୍ରଭାତଂ ସଂପୂର୍ଣମ୍ ।