ଶ୍ରୀପାର୍ଵତୀପୁତ୍ର, ମାଂ ପାହି ଵଲ୍ଲୀଶ, ତ୍ଵତ୍ପାଦପଂକେଜ ସେଵାରତୋଽହଂ, ତ୍ଵଦୀୟାଂ ନୁତିଂ ଦେଵଭାଷାଗତାଂ କର୍ତୁମାରବ୍ଧଵାନସ୍ମି, ସଂକଲ୍ପସିଦ୍ଧିଂ କୃତାର୍ଥଂ କୁରୁ ତ୍ଵମ୍ ।
ଭଜେ ତ୍ଵାଂ ସଦାନଂଦରୂପଂ, ମହାନଂଦଦାତାରମାଦ୍ୟଂ, ପରେଶଂ, କଲତ୍ରୋଲ୍ଲସତ୍ପାର୍ଶ୍ଵୟୁଗ୍ମଂ, ଵରେଣ୍ୟଂ, ଵିରୂପାକ୍ଷପୁତ୍ରଂ, ସୁରାରାଧ୍ୟମୀଶଂ, ରଵୀଂଦ୍ଵଗ୍ନିନେତ୍ରଂ, ଦ୍ଵିଷଡ୍ବାହୁ ସଂଶୋଭିତଂ, ନାରଦାଗସ୍ତ୍ୟକଣ୍ଵାତ୍ରିଜାବାଲିଵାଲ୍ମୀକିଵ୍ୟାସାଦି ସଂକୀର୍ତିତଂ, ଦେଵରାଟ୍ପୁତ୍ରିକାଲିଂଗିତାଂଗଂ, ଵିୟଦ୍ଵାହିନୀନଂଦନଂ, ଵିଷ୍ଣୁରୂପଂ, ମହୋଗ୍ରଂ, ଉଦଗ୍ରଂ, ସୁତୀକ୍ଷଂ, ମହାଦେଵଵକ୍ତ୍ରାବ୍ଜଭାନୁଂ, ପଦାଂଭୋଜସେଵା ସମାୟାତ ଭକ୍ତାଳି ସଂରକ୍ଷଣାୟତ୍ତ ଚିତ୍ତଂ, ଉମା ଶର୍ଵ ଗଂଗାଗ୍ନି ଷଟ୍କୃତ୍ତିକା ଵିଷ୍ଣୁ ବ୍ରହ୍ମେଂଦ୍ର ଦିକ୍ପାଲ ସଂପୂତସଦ୍ୟତ୍ନ ନିର୍ଵର୍ତିତୋତ୍କୃଷ୍ଟ ସୁଶ୍ରୀତପୋୟଜ୍ଞ ସଂଲବ୍ଧରୂପଂ, ମୟୂରାଧିରୂଢଂ, ଭଵାଂଭୋଧିପୋତଂ, ଗୁହଂ ଵାରିଜାକ୍ଷଂ, ଗୁରୁଂ ସର୍ଵରୂପଂ, ନତାନାଂ ଶରଣ୍ୟଂ, ବୁଧାନାଂ ଵରେଣ୍ୟଂ, ସୁଵିଜ୍ଞାନଵେଦ୍ୟଂ, ପରଂ, ପାରହୀନଂ, ପରାଶକ୍ତିପୁତ୍ରଂ, ଜଗଜ୍ଜାଲ ନିର୍ମାଣ ସଂପାଲନାହାର୍ୟକାରଂ, ସୁରାଣାଂ ଵରଂ, ସୁସ୍ଥିରଂ, ସୁଂଦରାଂଗଂ, ସ୍ଵଭାକ୍ତାଂତରଂଗାବ୍ଜ ସଂଚାରଶୀଲଂ, ସୁସୌଂଦର୍ୟଗାଂଭୀର୍ୟ ସୁସ୍ଥୈର୍ୟୟୁକ୍ତଂ, ଦ୍ଵିଷଡ୍ବାହୁ ସଂଖ୍ୟାୟୁଧ ଶ୍ରେଣିରମ୍ୟଂ, ମହାଂତଂ, ମହାପାପଦାଵାଗ୍ନି ମେଘଂ, ଅମୋଘଂ, ପ୍ରସନ୍ନଂ, ଅଚିଂତ୍ୟ ପ୍ରଭାଵଂ, ସୁପୂଜା ସୁତୃପ୍ତଂ, ନମଲ୍ଲୋକ କଲ୍ପଂ, ଅଖଂଡ ସ୍ଵରୂପଂ, ସୁତେଜୋମୟଂ, ଦିଵ୍ୟଦେହଂ, ଭଵଧ୍ଵାଂତନାଶାୟସୂର୍ୟଂ, ଦରୋନ୍ମୀଲିତାଂଭୋଜନେତ୍ରଂ, ସୁରାନୀକ ସଂପୂଜିତଂ, ଲୋକଶସ୍ତଂ, ସୁହସ୍ତାଧୃତାନେକଶସ୍ତ୍ରଂ, ନିରାଲଂବମାଭାସମାତ୍ରଂ ଶିଖାମଧ୍ୟଵାସଂ, ପରଂ ଧାମମାଦ୍ୟଂତହୀନଂ, ସମସ୍ତାଘହାରଂ, ସଦାନଂଦଦଂ, ସର୍ଵସଂପତ୍ପ୍ରଦଂ, ସର୍ଵରୋଗାପହଂ, ଭକ୍ତକାର୍ୟାର୍ଥସଂପାଦକଂ, ଶକ୍ତିହସ୍ତଂ, ସୁତାରୁଣ୍ୟଲାଵଣ୍ୟକାରୁଣ୍ୟରୂପଂ, ସହସ୍ରାର୍କ ସଂକାଶ ସୌଵର୍ଣହାରାଳି ସଂଶୋଭିତଂ, ଷଣ୍ମୁଖଂ, କୁଂଡଲାନାଂ ଵିରାଜତ୍ସୁକାଂତ୍ୟଂ ଚିତ୍ତେର୍ଗଂଡଭାଗୈଃ ସୁସଂଶୋଭିତଂ, ଭକ୍ତପାଲଂ, ଭଵାନୀସୁତଂ, ଦେଵମୀଶଂ, କୃପାଵାରିକଲ୍ଲୋଲ ଭାସ୍ଵତ୍କଟାକ୍ଷଂ, ଭଜେ ଶର୍ଵପୁତ୍ରଂ, ଭଜେ କାର୍ତିକେୟଂ, ଭଜେ ପାର୍ଵତେୟଂ, ଭଜେ ପାପନାଶଂ, ଭଜେ ବାହୁଲେୟଂ, ଭଜେ ସାଧୁପାଲଂ, ଭଜେ ସର୍ପରୂପଂ, ଭଜେ ଭକ୍ତିଲଭ୍ୟଂ, ଭଜେ ରତ୍ନଭୂଷଂ, ଭଜେ ତାରକାରିଂ, ଦରସ୍ମେରଵକ୍ତ୍ରଂ, ଶିଖିସ୍ଥଂ, ସୁରୂପଂ, କଟିନ୍ୟସ୍ତ ହସ୍ତଂ, କୁମାରଂ, ଭଜେଽହଂ ମହାଦେଵ, ସଂସାରପଂକାବ୍ଧି ସମ୍ମଗ୍ନମଜ୍ଞାନିନଂ ପାପଭୂୟିଷ୍ଠମାର୍ଗେ ଚରଂ ପାପଶୀଲଂ, ପଵିତ୍ରଂ କୁରୁ ତ୍ଵଂ ପ୍ରଭୋ, ତ୍ଵତ୍କୃପାଵୀକ୍ଷଣୈର୍ମାଂ ପ୍ରସୀଦ, ପ୍ରସୀଦ ପ୍ରପନ୍ନାର୍ତିହାରାୟ ସଂସିଦ୍ଧ, ମାଂ ପାହି ଵଲ୍ଲୀଶ, ଶ୍ରୀଦେଵସେନେଶ, ତୁଭ୍ୟଂ ନମୋ ଦେଵ, ଦେଵେଶ, ସର୍ଵେଶ, ସର୍ଵାତ୍ମକଂ, ସର୍ଵରୂପଂ, ପରଂ ତ୍ଵାଂ ଭଜେଽହଂ ଭଜେଽହଂ ଭଜେଽହମ୍ ।
ଇତି ଶ୍ରୀ ଷଣ୍ମୁଖ ଦଂଡକମ୍ ॥