ଶ୍ରୀରଘୁରାଜପଦାବ୍ଜନିକେତନ ପଂକଜଲୋଚନ ମଂଗଳରାଶେ
ଚଂଡମହାଭୁଜଦଂଡ ସୁରାରିଵିଖଂଡନପଂଡିତ ପାହି ଦୟାଳୋ ।
ପାତକିନଂ ଚ ସମୁଦ୍ଧର ମାଂ ମହତାଂ ହି ସତାମପି ମାନମୁଦାରଂ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 1 ॥
ସଂସୃତିତାପମହାନଲଦଗ୍ଧତନୂରୁହମର୍ମତନୋରତିଵେଲଂ
ପୁତ୍ରଧନସ୍ଵଜନାତ୍ମଗୃହାଦିଷୁ ସକ୍ତମତେରତିକିଲ୍ବିଷମୂର୍ତେଃ ।
କେନଚିଦପ୍ୟମଲେନ ପୁରାକୃତପୁଣ୍ୟସୁପୁଂଜଲଵେନ ଵିଭୋ ଵୈ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 2 ॥
ସଂସୃତିକୂପମନଲ୍ପମଘୋରନିଦାଘନିଦାନମଜସ୍ରମଶେଷଂ
ପ୍ରାପ୍ୟ ସୁଦୁଃଖସହସ୍ରଭୁଜଂଗଵିଷୈକସମାକୁଲସର୍ଵତନୋର୍ମେ ।
ଘୋରମହାକୃପଣାପଦମେଵ ଗତସ୍ୟ ହରେ ପତିତସ୍ୟ ଭଵାବ୍ଧୌ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 3 ॥
ସଂସୃତିସିଂଧୁଵିଶାଲକରାଲମହାବଲକାଲଝଷଗ୍ରସନାର୍ତଂ
ଵ୍ୟଗ୍ରସମଗ୍ରଧିୟଂ କୃପଣଂ ଚ ମହାମଦନକ୍ରସୁଚକ୍ରହୃତାସୁମ୍ ।
କାଲମହାରସନୋର୍ମିନିପୀଡିତମୁଦ୍ଧର ଦୀନମନନ୍ୟଗତିଂ ମାଂ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 4 ॥
ସଂସୃତିଘୋରମହାଗହନେ ଚରତୋ ମଣିରଂଜିତପୁଣ୍ୟସୁମୂର୍ତେଃ
ମନ୍ମଥଭୀକରଘୋରମହୋଗ୍ରମୃଗପ୍ରଵରାର୍ଦିତଗାତ୍ରସୁସଂଧେଃ ।
ମତ୍ସରତାପଵିଶେଷନିପୀଡିତବାହ୍ୟମତେଶ୍ଚ କଥଂ ଚିଦମେୟଂ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 5 ॥
ସଂସୃତିଵୃକ୍ଷମନେକଶତାଘନିଦାନମନଂତଵିକର୍ମସୁଶାଖଂ
ଦୁଃଖଫଲଂ କରଣାଦିପଲାଶମନଂଗସୁପୁଷ୍ପମଚିଂତ୍ୟସୁମୂଲମ୍ ।
ତଂ ହ୍ୟଧିରୁହ୍ୟ ହରେ ପତିତଂ ଶରଣାଗତମେଵ ଵିମୋଚୟ ମୂଢଂ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 6 ॥
ସଂସୃତିପନ୍ନଗଵକ୍ତ୍ରଭୟଂକରଦଂଷ୍ଟ୍ରମହାଵିଷଦଗ୍ଧଶରୀରଂ
ପ୍ରାଣଵିନିର୍ଗମଭୀତିସମାକୁଲମଂଦମନାଥମତୀଵ ଵିଷଣ୍ଣମ୍ ।
ମୋହମହାକୁହରେ ପତିତଂ ଦୟୟୋଦ୍ଧର ମାମଜିତେଂଦ୍ରିୟକାମଂ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 7 ॥
ଇଂଦ୍ରିୟନାମକଚୋରଗଣୈର୍ହୃତତତ୍ତ୍ଵଵିଵେକମହାଧନରାଶିଂ
ସଂସୃତିଜାଲନିପାତିତମେଵ ମହାବଲିଭିଶ୍ଚ ଵିଖଂଡିତକାୟମ୍ ।
ତ୍ଵତ୍ପଦପଦ୍ମମନୁତ୍ତମମାଶ୍ରିତମାଶୁ କପୀଶ୍ଵର ପାହି କୃପାଳୋ
ତ୍ଵାଂ ଭଜତୋ ମମ ଦେହି ଦୟାଘନ ହେ ହନୁମନ୍ ସ୍ଵପଦାଂବୁଜଦାସ୍ୟମ୍ ॥ 8 ॥
ବ୍ରହ୍ମମରୁଦ୍ଗଣରୁଦ୍ରମହେଂଦ୍ରକିରୀଟସୁକୋଟିଲସତ୍ପଦପୀଠଂ
ଦାଶରଥିଂ ଜପତି କ୍ଷିତିମଂଡଲ ଏଷ ନିଧାୟ ସଦୈଵ ହୃଦବ୍ଜେ ।
ତସ୍ୟ ହନୂମତ ଏଵ ଶିଵଂକରମଷ୍ଟକମେତଦନିଷ୍ଟହରଂ ଵୈ
ୟଃ ସତତଂ ହି ପଠେତ୍ସ ନରୋ ଲଭତେଽଚ୍ୟୁତରାମପଦାବ୍ଜନିଵାସମ୍ ॥ 9 ॥
ଇତି ଶ୍ରୀ ମଧୁସୂଦନାଶ୍ରମ ଶିଷ୍ୟାଽଚ୍ୟୁତଵିରଚିତଂ ଶ୍ରୀମଦ୍ଦନୁମଦଷ୍ଟକମ୍ ।