ଜଗଜ୍ଜାଲପାଲଂ କନତ୍କଂଠମାଲଂ
ଶରଚ୍ଚଂଦ୍ରଫାଲଂ ମହାଦୈତ୍ୟକାଲମ୍ ।
ନଭୋନୀଲକାୟଂ ଦୁରାଵାରମାୟଂ
ସୁପଦ୍ମାସହାୟଂ ଭଜେଽହଂ ଭଜେଽହମ୍ ॥ 1 ॥
ସଦାଂଭୋଧିଵାସଂ ଗଲତ୍ପୁଷ୍ପହାସଂ
ଜଗତ୍ସନ୍ନିଵାସଂ ଶତାଦିତ୍ୟଭାସମ୍ ।
ଗଦାଚକ୍ରଶସ୍ତ୍ରଂ ଲସତ୍ପୀତଵସ୍ତ୍ରଂ
ହସଚ୍ଚାରୁଵକ୍ତ୍ରଂ ଭଜେଽହଂ ଭଜେଽହମ୍ ॥ 2 ॥
ରମାକଂଠହାରଂ ଶ୍ରୁତିଵ୍ରାତସାରଂ
ଜଲାଂତର୍ଵିହାରଂ ଧରାଭାରହାରମ୍ ।
ଚିଦାନଂଦରୂପଂ ମନୋଜ୍ଞସ୍ଵରୂପଂ
ଧୃତାନେକରୂପଂ ଭଜେଽହଂ ଭଜେଽହମ୍ ॥ 3 ॥
ଜରାଜନ୍ମହୀନଂ ପରାନଂଦପୀନଂ
ସମାଧାନଲୀନଂ ସଦୈଵାନଵୀନମ୍ ।
ଜଗଜ୍ଜନ୍ମହେତୁଂ ସୁରାନୀକକେତୁଂ
ତ୍ରିଲୋକୈକସେତୁଂ ଭଜେଽହଂ ଭଜେଽହମ୍ ॥ 4 ॥
କୃତାମ୍ନାୟଗାନଂ ଖଗାଧୀଶୟାନଂ
ଵିମୁକ୍ତେର୍ନିଦାନଂ ହରାରାତିମାନମ୍ ।
ସ୍ଵଭକ୍ତାନୁକୂଲଂ ଜଗଦ୍ଵୃକ୍ଷମୂଲଂ
ନିରସ୍ତାର୍ତଶୂଲଂ ଭଜେଽହଂ ଭଜେଽହମ୍ ॥ 5 ॥
ସମସ୍ତାମରେଶଂ ଦ୍ଵିରେଫାଭକେଶଂ
ଜଗଦ୍ବିଂବଲେଶଂ ହୃଦାକାଶଵେଶମ୍ ।
ସଦା ଦିଵ୍ୟଦେହଂ ଵିମୁକ୍ତାଖିଲେହଂ
ସୁଵୈକୁଂଠଗେହଂ ଭଜେଽହଂ ଭଜେଽହମ୍ ॥ 6 ॥
ସୁରାଲୀବଲିଷ୍ଠଂ ତ୍ରିଲୋକୀଵରିଷ୍ଠଂ
ଗୁରୂଣାଂ ଗରିଷ୍ଠଂ ସ୍ଵରୂପୈକନିଷ୍ଠମ୍ ।
ସଦା ୟୁଦ୍ଧଧୀରଂ ମହାଵୀରଵୀରଂ
ଭଵାଂଭୋଧିତୀରଂ ଭଜେଽହଂ ଭଜେଽହମ୍ ॥ 7 ॥
ରମାଵାମଭାଗଂ ତଲାଲଗ୍ନନାଗଂ
କୃତାଧୀନୟାଗଂ ଗତାରାଗରାଗମ୍ ।
ମୁନୀଂଦ୍ରୈସ୍ସୁଗୀତଂ ସୁରୈସ୍ସଂପରୀତଂ
ଗୁଣୌଘୈରତୀତଂ ଭଜେଽହଂ ଭଜେଽହମ୍ ॥ 8 ॥
ଫଲଶ୍ରୁତି ।
ଇଦଂ ୟସ୍ତୁ ନିତ୍ୟଂ ସମାଧାୟ ଚିତ୍ତଂ
ପଠେଦଷ୍ଟକଂ କଂଠହାରଂ ମୁରାରେଃ ।
ସ ଵିଷ୍ଣୋର୍ଵିଶୋକଂ ଧ୍ରୁଵଂ ୟାତି ଲୋକଂ
ଜରାଜନ୍ମଶୋକଂ ପୁନର୍ଵିଂଦତେ ନୋ ॥ 9 ॥
ଇତି ଶ୍ରୀ ପରମହଂସସ୍ଵାମି ବ୍ରହ୍ମାନଂଦଵିରଚିତଂ ଶ୍ରୀହରିସ୍ତୋତ୍ରମ୍ ॥