භගවති තව තීරේ නීරමාත්රාශනෝऽහම්
විගතවිෂයතෘෂ්ණඃ කෘෂ්ණමාරාධයාමි ।
සකල කලුෂභංගේ ස්වර්ගසෝපානසංගේ
තරලතරතරංගේ දේවි ගංගේ ප්රසීද ॥ 1 ॥
භගවති භවලීලා මෞළිමාලේ තවාංභඃ
කණමණුපරිමාණං ප්රාණිනෝ යේ ස්පෘශංති ।
අමරනගරනාරී චාමර ග්රාහිණීනාං
විගත කලිකලංකාතංකමංකේ ලුඨංති ॥ 2 ॥
බ්රහ්මාංඩං ඛංඩයංතී හරශිරසි ජටාවල්ලිමුල්ලාසයංතී
ස්වර්ලෝකාදාපතංතී කනකගිරිගුහාගංඩශෛලාත් ස්ඛලංතී ।
ක්ෂෝණීපෘෂ්ඨේ ලුඨංතී දුරිතචයචමූර්නිර්භරං භර්ත්සයංතී
පාථෝධිං පූරයංතී සුරනගරසරිත්පාවනී නඃ පුනාතු ॥ 3 ॥
මජ්ජන්මාතංග කුංභච්යුත මදමදිරාමෝදමත්තාලිජාලං
ස්නානෛඃ සිද්ධාංගනානාං කුචයුග විලසත්කුංකුමාසංගපිංගම් ।
සායං ප්රාතර්මුනීනාං කුශකුසුමචයෛශ්ඡින්නතීරස්ථනීරං
පායාන්නෝ ගාංගමංභඃ කරිකලභ කරාක්රාංත රංගස්තරංගම් ॥ 4 ॥
ආදාවාදි පිතාමහස්ය නියම ව්යාපාර පාත්රේ ජලං
පශ්චාත්පන්නගශායිනෝ භගවතඃ පාදෝදකං පාවනම් ।
භූයඃ ශංභුජටාවිභූෂණ මණිර්ජහ්නෝර්මහර්ෂේරියං
කන්යා කල්මෂනාශිනී භගවතී භාගීරථී දෘශ්යතේ ॥ 5 ॥
ශෛලේංද්රාදවතාරිණී නිජජලේ මජ්ජජ්ජනෝත්තාරිණී
පාරාවාරවිහාරිණී භවභයශ්රේණී සමුත්සාරිණී ।
ශේෂාංගෛරනුකාරිණී හරශිරෝවල්ලීදළාකාරිණී
කාශීප්රාංතවිහාරිණී විජයතේ ගංගා මනෝහාරිණී ॥ 6 ॥
කුතෝ වීචිර්වීචිස්තව යදි ගතා ලෝචනපථං
ත්වමාපීතා පීතාංබරපුරවාසං විතරසි ।
ත්වදුත්සංගේ ගංගේ පතති යදි කායස්තනුභෘතාං
තදා මාතඃ ශාංතක්රතවපදලාභෝऽප්යතිලඝුඃ ॥ 7 ॥
ගංගේ ත්රෛලෝක්යසාරේ සකලසුරවධූධෞතවිස්තීර්ණතෝයේ
පූර්ණබ්රහ්මස්වරූපේ හරිචරණරජෝහාරිණි ස්වර්ගමාර්ගේ ।
ප්රායශ්චිතං යදි ස්යාත්තව ජලකණිකා බ්රහ්මහත්යාදි පාපේ
කස්ත්වාං ස්තෝතුං සමර්ථඃ ත්රිජගදඝහරේ දේවි ගංගේ ප්රසීද ॥ 8 ॥
මාතර්ජාහ්නවී ශංභුසංගමිලිතේ මෞළෞ නිධායාංජලිං
ත්වත්තීරේ වපුෂෝऽවසානසමයේ නාරායණාංඝ්රිද්වයම් ।
සානංදං ස්මරතෝ භවිෂ්යති මම ප්රාණප්රයාණෝත්සවේ
භූයාද්භක්තිරවිච්යුතා හරිහරාද්වෛතාත්මිකා ශාශ්වතී ॥ 9 ॥
ගංගාෂ්ටකමිදං පුණ්යං යඃ පඨේත්ප්රයතෝ නරඃ ।
සර්වපාපවිනිර්මුක්තෝ විෂ්ණුලෝකං ස ගච්ඡති ॥ 10 ॥