රණත්ක්ෂුද්රඝංටානිනාදාභිරාමං
චලත්තාංඩවෝද්දංඩවත්පද්මතාලම් ।
ලසත්තුංදිලාංගෝපරිව්යාලහාරං
ගණාධීශමීශානසූනුං තමීඩේ ॥ 1 ॥
ධ්වනිධ්වංසවීණාලයෝල්ලාසිවක්ත්රං
ස්ඵුරච්ඡුංඩදංඩෝල්ලසද්බීජපූරම් ।
ගලද්දර්පසෞගංධ්යලෝලාලිමාලං
ගණාධීශමීශානසූනුං තමීඩේ ॥ 2 ॥
ප්රකාශජ්ජපාරක්තරත්නප්රසූන-
ප්රවාලප්රභාතාරුණජ්යෝතිරේකම් ।
ප්රලංබෝදරං වක්රතුංඩෛකදංතං
ගණාධීශමීශානසූනුං තමීඩේ ॥ 3 ॥
විචිත්රස්ඵුරද්රත්නමාලාකිරීටං
කිරීටෝල්ලසච්චංද්රරේඛාවිභූෂම් ।
විභූෂෛකභූෂං භවධ්වංසහේතුං
ගණාධීශමීශානසූනුං තමීඩේ ॥ 4 ॥
උදංචද්භුජාවල්ලරීදෘශ්යමූලෝ-
ච්චලද්භ්රූලතාවිභ්රමභ්රාජදක්ෂම් ।
මරුත්සුංදරීචාමරෛඃ සේව්යමානං
ගණාධීශමීශානසූනුං තමීඩේ ॥ 5 ॥
ස්ඵුරන්නිෂ්ඨුරාලෝලපිංගාක්ෂිතාරං
කෘපාකෝමලෝදාරලීලාවතාරම් ।
කලාබිංදුගං ගීයතේ යෝගිවර්යෛ-
ර්ගණාධීශමීශානසූනුං තමීඩේ ॥ 6 ॥
යමේකාක්ෂරං නිර්මලං නිර්විකල්පං
ගුණාතීතමානංදමාකාරශූන්යම් ।
පරං පාරමෝංකාරමාම්නායගර්භං
වදංති ප්රගල්භං පුරාණං තමීඩේ ॥ 7 ॥
චිදානංදසාංද්රාය ශාංතාය තුභ්යං
නමෝ විශ්වකර්ත්රේ ච හර්ත්රේ ච තුභ්යම් ।
නමෝऽනංතලීලාය කෛවල්යභාසේ
නමෝ විශ්වබීජ ප්රසීදේශසූනෝ ॥ 8 ॥
ඉමං සුස්තවං ප්රාතරුත්ථාය භක්ත්යා
පඨේද්යස්තු මර්ත්යෝ ලභේත්සර්වකාමාන් ।
ගණේශප්රසාදේන සිද්ධ්යංති වාචෝ
ගණේශේ විභෞ දුර්ලභං කිං ප්රසන්නේ ॥ 9 ॥