අග්රේ කුරූණාමථ පාංඩවානාං
දුඃශාසනේනාහෘතවස්ත්රකේශා ।
කෘෂ්ණා තදාක්රෝශදනන්යනාථා
ගෝවිංද දාමෝදර මාධවේති ॥ 1॥
ශ්රීකෘෂ්ණ විෂ්ණෝ මධුකෛටභාරේ
භක්තානුකංපින් භගවන් මුරාරේ ।
ත්රායස්ව මාං කේශව ලෝකනාථ
ගෝවිංද දාමෝදර මාධවේති ॥ 2॥
වික්රේතුකාමා කිල ගෝපකන්යා
මුරාරිපාදාර්පිතචිත්තවෘත්තිඃ ।
දධ්යාදිකං මෝහවශාදවෝචද්
ගෝවිංද දාමෝදර මාධවේති ॥ 3॥
උලූඛලේ සංභෘතතංඩුලාංශ්ච
සංඝට්ටයංත්යෝ මුසලෛඃ ප්රමුග්ධාඃ ।
ගායංති ගෝප්යෝ ජනිතානුරාගා
ගෝවිංද දාමෝදර මාධවේති ॥ 4॥
කාචිත්කරාංභෝජපුටේ නිෂණ්ණං
ක්රීඩාශුකං කිංශුකරක්තතුංඩම් ।
අධ්යාපයාමාස සරෝරුහාක්ෂී
ගෝවිංද දාමෝදර මාධවේති ॥ 5॥
ගෘහේ ගෘහේ ගෝපවධූසමූහඃ
ප්රතික්ෂණං පිංජරසාරිකාණාම් ।
ස්ඛලද්ගිරාං වාචයිතුං ප්රවෘත්තෝ
ගෝවිංද දාමෝදර මාධවේති ॥ 6॥
පර්ය්යංකිකාභාජමලං කුමාරං
ප්රස්වාපයංත්යෝऽඛිලගෝපකන්යාඃ ।
ජගුඃ ප්රබංධං ස්වරතාලබංධං
ගෝවිංද දාමෝදර මාධවේති ॥ 7॥
රාමානුජං වීක්ෂණකේලිලෝලං
ගෝපී ගෘහීත්වා නවනීතගෝලම් ।
ආබාලකං බාලකමාජුහාව
ගෝවිංද දාමෝදර මාධවේති ॥ 8॥
විචිත්රවර්ණාභරණාභිරාමේ-
ऽභිධේහි වක්ත්රාංබුජරාජහංසි ।
සදා මදීයේ රසනේऽග්රරංගේ
ගෝවිංද දාමෝදර මාධවේති ॥ 9॥
අංකාධිරූඪං ශිශුගෝපගූඪං
ස්තනං ධයංතං කමලෛකකාංතම් ।
සංබෝධයාමාස මුදා යශෝදා
ගෝවිංද දාමෝදර මාධවේති ॥ 10॥
ක්රීඩංතමංතර්ව්රජමාත්මජං ස්වං
සමං වයස්යෛඃ පශුපාලබාලෛඃ ।
ප්රේම්ණා යශෝදා ප්රජුහාව කෘෂ්ණං
ගෝවිංද දාමෝදර මාධවේති ॥ 11॥
යශෝදයා ගාඪමුලූඛලේන
ගෝකංඨපාශේන නිබධ්යමානඃ ।
රුරෝද මංදං නවනීතභෝජී
ගෝවිංද දාමෝදර මාධවේති ॥ 12॥
නිජාංගණේ කංකණකේලිලෝලං
ගෝපී ගෘහීත්වා නවනීතගෝලම් ।
ආමර්දයත්පාණිතලේන නේත්රේ
ගෝවිංද දාමෝදර මාධවේති ॥ 13॥
ගෘහේ ගෘහේ ගෝපවධූකදංබාඃ
සර්වේ මිලිත්වා සමවායයෝගේ ।
පුණ්යානි නාමානි පඨංති නිත්යං
ගෝවිංද දාමෝදර මාධවේති ॥ 14॥
මංදාරමූලේ වදනාභිරාමං
බිංබාධරේ පූරිතවේණුනාදම් ।
ගෝගෝපගෝපීජනමධ්යසංස්ථං
ගෝවිංද දාමෝදර මාධවේති ॥ 15॥
උත්ථාය ගෝප්යෝऽපරරාත්රභාගේ
ස්මෘත්වා යශෝදාසුතබාලකේලිම් ।
ගායංති ප්රෝච්චෛර්දධි මංථයංත්යෝ
ගෝවිංද දාමෝදර මාධවේති ॥ 16॥
ජග්ධෝऽථ දත්තෝ නවනීතපිංඩෝ
ගෘහේ යශෝදා විචිකිත්සයංතී ।
උවාච සත්යං වද හේ මුරාරේ
ගෝවිංද දාමෝදර මාධවේති ॥ 17॥
අභ්යර්ච්ය ගේහං යුවතිඃ ප්රවෘද්ධ-
ප්රේමප්රවාහා දධි නිර්මමංථ ।
ගායංති ගෝප්යෝऽථ සඛීසමේතා
ගෝවිංද දාමෝදර මාධවේති ॥ 18॥
ක්වචිත් ප්රභාතේ දධිපූර්ණපාත්රේ
නික්ෂිප්ය මංථං යුවතී මුකුංදම් ।
ආලෝක්ය ගානං විවිධං කරෝති
ගෝවිංද දාමෝදර මාධවේති ॥ 19॥
ක්රීඩාපරං භෝජනමජ්ජනාර්ථං
හිතෛෂිණී ස්ත්රී තනුජං යශෝදා ।
ආජූහවත් ප්රේමපරිප්ලුතාක්ෂී
ගෝවිංද දාමෝදර මාධවේති ॥ 20॥
සුඛං ශයානං නිලයේ ච විෂ්ණුං
දේවර්ෂිමුඛ්යා මුනයඃ ප්රපන්නාඃ ।
තේනාච්යුතේ තන්මයතාං ව්රජංති
ගෝවිංද දාමෝදර මාධවේති ॥ 21॥
විහාය නිද්රාමරුණෝදයේ ච
විධාය කෘත්යානි ච විප්රමුඛ්යාඃ ।
වේදාවසානේ ප්රපඨංති නිත්යං
ගෝවිංද දාමෝදර මාධවේති ॥ 22॥
වෘංදාවනේ ගෝපගණාශ්ච ගෝප්යෝ
විලෝක්ය ගෝවිංදවියෝගඛින්නාම් ।
රාධාං ජගුඃ සාශ්රුවිලෝචනාභ්යාං
ගෝවිංද දාමෝදර මාධවේති ॥ 23॥
ප්රභාතසංචාරගතා නු ගාවස්-
තද්රක්ෂණාර්ථං තනයං යශෝදා ।
ප්රාබෝධයත් පාණිතලේන මංදං
ගෝවිංද දාමෝදර මාධවේති ॥ 24॥
ප්රවාලශෝභා ඉව දීර්ඝකේශා
වාතාංබුපර්ණාශනපූතදේහාඃ ।
මූලේ තරූණාං මුනයඃ පඨංති
ගෝවිංද දාමෝදර මාධවේති ॥ 25॥
ඒවං බ්රුවාණා විරහාතුරා භෘශං
ව්රජස්ත්රියඃ කෘෂ්ණවිෂක්තමානසාඃ ।
විසෘජ්ය ලජ්ජාං රුරුදුඃ ස්ම සුස්වරං
ගෝවිංද දාමෝදර මාධවේති ॥ 26॥
ගෝපී කදාචින්මණිපංජරස්ථං
ශුකං වචෝ වාචයිතුං ප්රවෘත්තා ।
ආනංදකංද ව්රජචංද්ර කෘෂ්ණ
ගෝවිංද දාමෝදර මාධවේති ॥ 27॥
ගෝවත්සබාලෛඃ ශිශුකාකපක්ෂං
බධ්නංතමංභෝජදලායතාක්ෂම් ।
උවාච මාතා චිබුකං ගෘහීත්වා
ගෝවිංද දාමෝදර මාධවේති ॥ 28॥
ප්රභාතකාලේ වරවල්ලවෞඝා
ගෝරක්ෂණාර්ථං ධෘතවේත්රදංඩාඃ ।
ආකාරයාමාසුරනංතමාද්යං
ගෝවිංද දාමෝදර මාධවේති ॥ 29॥
ජලාශයේ කාලියමර්දනාය
යදා කදංබාදපතන්මුරාරිඃ ।
ගෝපාංගනාශ්චුක්රුශුරේත්ය ගෝපා
ගෝවිංද දාමෝදර මාධවේති ॥ 30॥
අක්රූරමාසාද්ය යදා මුකුංදශ්-
චාපෝත්සවාර්ථං මථුරාං ප්රවිෂ්ටඃ ।
තදා ස පෞරෛර්ජයසීත්යභාෂි
ගෝවිංද දාමෝදර මාධවේති ॥ 31॥
කංසස්ය දූතේන යදෛව නීතෞ
වෘංදාවනාංතාද් වසුදේවසූනූ । (සූනෞ)
රුරෝද ගෝපී භවනස්ය මධ්යේ
ගෝවිංද දාමෝදර මාධවේති ॥ 32॥
සරෝවරේ කාලියනාගබද්ධං
ශිශුං යශෝදාතනයං නිශම්ය ।
චක්රුර්ලුඨංත්යඃ පථි ගෝපබාලා
ගෝවිංද දාමෝදර මාධවේති ॥ 33॥
අක්රූරයානේ යදුවංශනාථං
සංගච්ඡමානං මථුරාං නිරීක්ෂ්ය ।
ඌචුර්වියෝගත් කිල ගෝපබාලා
ගෝවිංද දාමෝදර මාධවේති ॥ 34॥
චක්රංද ගෝපී නලිනීවනාංතේ
කෘෂ්ණේන හීනා කුසුමේ ශයානා ।
ප්රඵුල්ලනීලෝත්පලලෝචනාභ්යාං
ගෝවිංද දාමෝදර මාධවේති ॥ 35॥
මාතාපිතෘභ්යාං පරිවාර්යමාණා
ගේහං ප්රවිෂ්ටා විලලාප ගෝපී ।
ආගත්ය මාං පාලය විශ්වනාථ
ගෝවිංද දාමෝදර මාධවේති ॥ 36॥
වෘංදාවනස්ථං හරිමාශු බුද්ධ්වා
ගෝපී ගතා කාපි වනං නිශායාම් ।
තත්රාප්යදෘෂ්ට්වාऽතිභයාදවෝචද්
ගෝවිංද දාමෝදර මාධවේති ॥ 37॥
සුඛං ශයානා නිලයේ නිජේऽපි
නාමානි විෂ්ණෝඃ ප්රවදංති මර්ත්යාඃ ।
තේ නිශ්චිතං තන්මයතාං ව්රජංති
ගෝවිංද දාමෝදර මාධවේති ॥ 38॥
සා නීරජාක්ෂීමවලෝක්ය රාධාං
රුරෝද ගෝවිංදවියෝගඛින්නාම් ।
සඛී ප්රඵුල්ලෝත්පලලෝචනාභ්යාං
ගෝවිංද දාමෝදර මාධවේති ॥ 39॥
ජිහ්වේ රසජ්ඤේ මධුරප්රියා ත්වං
සත්යං හිතං ත්වාං පරමං වදාමි ।
ආවර්ණයේථා මධුරාක්ෂරාණි
ගෝවිංද දාමෝදර මාධවේති ॥ 40॥
ආත්යංතිකව්යාධිහරං ජනානාං
චිකිත්සකං වේදවිදෝ වදංති ।
සංසාරතාපත්රයනාශබීජං
ගෝවිංද දාමෝදර මාධවේති ॥ 41॥
තාතාජ්ඤයා ගච්ඡති රාමචංද්රේ
සලක්ෂ්මණේऽරණ්යචයේ සසීතේ ।
චක්රංද රාමස්ය නිජා ජනිත්රී
ගෝවිංද දාමෝදර මාධවේති ॥ 42॥
ඒකාකිනී දංඩකකානනාංතාත්
සා නීයමානා දශකංධරේණ ।
සීතා තදාක්රංදදනන්යනාථා
ගෝවිංද දාමෝදර මාධවේති ॥ 43॥
රාමාද්වියුක්තා ජනකාත්මජා සා
විචිංතයංතී හෘදි රාමරූපම් ।
රුරෝද සීතා රඝුනාථ පාහි
ගෝවිංද දාමෝදර මාධවේති ॥ 44॥
ප්රසීද විෂ්ණෝ රඝුවංශනාථ
සුරාසුරාණාං සුඛදුඃඛහේතෝ ।
රුරෝද සීතා තු සමුද්රමධ්යේ
ගෝවිංද දාමෝදර මාධවේති ॥ 45॥
අංතර්ජලේ ග්රාහගෘහීතපාදෝ
විසෘෂ්ටවික්ලිෂ්ටසමස්තබංධුඃ ।
තදා ගජේංද්රෝ නිතරාං ජගාද
ගෝවිංද දාමෝදර මාධවේති ॥ 46॥
හංසධ්වජඃ ශංඛයුතෝ දදර්ශ
පුත්රං කටාහේ ප්රතපංතමේනම් ।
පුණ්යානි නාමානි හරේර්ජපංතං
ගෝවිංද දාමෝදර මාධවේති ॥ 47॥
දුර්වාසසෝ වාක්යමුපේත්ය කෘෂ්ණා
සා චාබ්රවීත් කානනවාසිනීශම් ।
අංතඃ ප්රවිෂ්ටං මනසා ජුහාව
ගෝවිංද දාමෝදර මාධවේති ॥ 48॥
ධ්යේයඃ සදා යෝගිභිරප්රමේයඃ
චිංතාහරශ්චිංතිතපාරිජාතඃ ।
කස්තූරිකාකල්පිතනීලවර්ණෝ
ගෝවිංද දාමෝදර මාධවේති ॥ 49॥
සංසාරකූපේ පතිතෝऽත්යගාධේ
මෝහාංධපූර්ණේ විෂයාභිතප්තේ ।
කරාවලංබං මම දේහි විෂ්ණෝ
ගෝවිංද දාමෝදර මාධවේති ॥ 50॥
භජස්ව මංත්රං භවබංධමුක්ත්යෛ
ජිහ්වේ රසජ්ඤේ සුලභං මනෝජ්ඤම් ।
ද්වෛපායනාද්යෛර්මුනිභිඃ ප්රජප්තං
ගෝවිංද දාමෝදර මාධවේති ॥ 51॥
ත්වාමේව යාචේ මම දේහි ජිහ්වේ
සමාගතේ දංඩධරේ කෘතාංතේ ।
වක්තව්යමේවං මධුරං සුභක්ත්යා
ගෝවිංද දාමෝදර මාධවේති ॥ 52॥
ගෝපාල වංශීධර රූපසිංධෝ
ලෝකේශ නාරායණ දීනබංධෝ ।
උච්චස්වරෛස්ත්වං වද සර්වදෛව
ගෝවිංද දාමෝදර මාධවේති ॥ 53॥
ජිහ්වේ සදෛවං භජ සුංදරාණි
නාමානි කෘෂ්ණස්ය මනෝහරාණි ।
සමස්තභක්තාර්තිවිනාශනානි
ගෝවිංද දාමෝදර මාධවේති ॥ 54॥
ගෝවිංද ගෝවිංද හරේ මුරාරේ
ගෝවිංද ගෝවිංද මුකුංද කෘෂ්ණ ।
ගෝවිංද ගෝවිංද රථාංගපාණේ
ගෝවිංද දාමෝදර මාධවේති ॥ 55॥
සුඛාවසානේ ත්විදමේව සාරං
දුඃඛාවසානේ ත්විදමේව ගේයම් ।
දේහාවසානේ ත්විදමේව ජාප්යං
ගෝවිංද දාමෝදර මාධවේති ॥ 56॥
දුර්වාරවාක්යං පරිගෘහ්ය කෘෂ්ණා
මෘගීව භීතා තු කථං කථංචිත් ।
සභාං ප්රවිෂ්ටා මනසා ජුහාව
ගෝවිංද දාමෝදර මාධවේති ॥ 57॥
ශ්රීකෘෂ්ණ රාධාවර ගෝකුලේශ
ගෝපාල ගෝවර්ධන නාථ විෂ්ණෝ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 58॥
ශ්රීනාථ විශ්වේශ්වර විශ්වමූර්තේ
ශ්රීදේවකීනංදන දෛත්යශත්රෝ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 59॥
ගෝපීපතේ කංසරිපෝ මුකුංද
ලක්ෂ්මීපතේ කේශව වාසුදේව ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 60॥
ගෝපීජනාහ්ලාදකර ව්රජේශ
ගෝචාරණාරණ්යකෘතප්රවේශ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 61॥
ප්රාණේශ විශ්වංභර කෛටභාරේ
වෛකුංඨ නාරායණ චක්රපාණේ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 62॥
හරේ මුරාරේ මධුසූදනාද්ය
ශ්රීරාම සීතාවර රාවණාරේ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 63॥
ශ්රීයාදවේංද්රාද්රිධරාංබුජාක්ෂ
ගෝගෝපගෝපීසුඛදානදක්ෂ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 64॥
ධරාභරෝත්තාරණගෝපවේෂ
විහාරලීලාකෘතබංධුශේෂ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 65॥
බකීබකාඝාසුරධේනුකාරේ
කේශීතෘණාවර්තවිඝාතදක්ෂ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 66॥
ශ්රීජානකීජීවන රාමචංද්ර
නිශාචරාරේ භරතාග්රජේශ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 67॥
නාරායණානංත හරේ නෘසිංහ
ප්රහ්ලාදබාධාහර හේ කෘපාලෝ ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 68॥
ලීලාමනුෂ්යාකෘතිරාමරූප
ප්රතාපදාසීකෘතසර්වභූප ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 69॥
ශ්රීකෘෂ්ණ ගෝවිංද හරේ මුරාරේ
හේ නාථ නාරායණ වාසුදේව ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 70॥
වක්තුං සමර්ථෝऽපි න වක්ති කශ්චිද්-
අහෝ ජනානාං ව්යසනාභිමුඛ්යම් ।
ජිහ්වේ පිබස්වාමෘතමේතදේව
ගෝවිංද දාමෝදර මාධවේති ॥ 71॥
ඉති ශ්රීබිල්වමංගලාචාර්යවිරචිතං ශ්රීගෝවිංදදාමෝදරස්තෝත්රං සංපූර්ණම් ।