රක්තබීජවධෝ නාම අෂ්ටමෝධ්යාය ॥
ධ්යානං
අරුණාං කරුණා තරංගිතාක්ෂීං ධෘතපාශාංකුශ පුෂ්පබාණචාපාම් ।
අණිමාධිභිරාවෘතාං මයූඛෛ රහමිත්යේව විභාවයේ භවානීම් ॥
ඍෂිරුවාච ॥1॥
චංඩේ ච නිහතේ දෛත්යේ මුංඩේ ච විනිපාතිතේ ।
බහුළේෂු ච සෛන්යේෂු ක්ෂයිතේෂ්වසුරේශ්වරඃ ॥ 2 ॥
තතඃ කෝපපරාධීනචේතාඃ ශුංභඃ ප්රතාපවාන් ।
උද්යෝගං සර්ව සෛන්යානාං දෛත්යානාමාදිදේශ හ ॥3॥
අද්ය සර්ව බලෛර්දෛත්යාඃ ෂඩශීතිරුදායුධාඃ ।
කංබූනාං චතුරශීතිර්නිර්යාංතු ස්වබලෛර්වෘතාඃ ॥4॥
කෝටිවීර්යාණි පංචාශදසුරාණාං කුලානි වෛ ।
ශතං කුලානි ධෞම්රාණාං නිර්ගච්ඡංතු මමාජ්ඤයා ॥5॥
කාලකා දෞර්හෘදා මෞර්වාඃ කාළිකේයාස්තථාසුරාඃ ।
යුද්ධාය සජ්ජා නිර්යාංතු ආජ්ඤයා ත්වරිතා මම ॥6॥
ඉත්යාජ්ඤාප්යාසුරාපතිඃ ශුංභෝ භෛරවශාසනඃ ।
නිර්ජගාම මහාසෛන්යසහස්ත්රෛර්භහුභිර්වෘතඃ ॥7॥
ආයාංතං චංඩිකා දෘෂ්ට්වා තත්සෛන්යමතිභීෂණම් ।
ජ්යාස්වනෛඃ පූරයාමාස ධරණීගගනාංතරම් ॥8॥
තතඃසිංහො මහානාදමතීව කෘතවාන්නෘප ।
ඝංටාස්වනේන තාන්නාදානංබිකා චෝපබෘංහයත් ॥9॥
ධනුර්ජ්යාසිංහඝංටානාං නාදාපූරිතදිඞ්මුඛා ।
නිනාදෛර්භීෂණෛඃ කාළී ජිග්යේ විස්තාරිතානනා ॥10॥
තං නිනාදමුපශ්රුත්ය දෛත්ය සෛන්යෛශ්චතුර්දිශම් ।
දේවී සිංහස්තථා කාළී සරෝෂෛඃ පරිවාරිතාඃ॥11॥
ඒතස්මින්නංතරේ භූප විනාශාය සුරද්විෂාම් ।
භවායාමරසිංහනාමතිවීර්යබලාන්විතාඃ ॥12॥
බ්රහ්මේශගුහවිෂ්ණූනාං තථේංද්රස්ය ච ශක්තයඃ ।
ශරීරේභ්යෝවිනිෂ්ක්රම්ය තද්රූපෛශ්චංඩිකාං යයුඃ ॥13॥
යස්ය දේවස්ය යද්රූපං යථා භූෂණවාහනම් ।
තද්වදේව හි තච්චක්තිරසුරාන්යෝද්ධුමායමෞ ॥14॥
හංසයුක්තවිමානාග්රේ සාක්ෂසූත්රක මංඩලුඃ ।
ආයාතා බ්රහ්මණඃ ශක්තිබ්රහ්මාණී ත්යභිධීයතේ ॥15॥
මහේශ්වරී වෘෂාරූඪා ත්රිශූලවරධාරිණී ।
මහාහිවලයා ප්රාප්තාචංද්රරේඛාවිභූෂණා ॥16॥
කෞමාරී ශක්තිහස්තා ච මයූරවරවාහනා ।
යෝද්ධුමභ්යායයෞ දෛත්යානංබිකා ගුහරූපිණී ॥17॥
තථෛව වෛෂ්ණවී ශක්තිර්ගරුඩෝපරි සංස්ථිතා ।
ශංඛචක්රගධාශාංඛර් ඛඩ්ගහස්තාභ්යුපායයෞ ॥18॥
යජ්ඤවාරාහමතුලං රූපං යා භිභ්රතෝ හරේඃ ।
ශක්තිඃ සාප්යායයෞ තත්ර වාරාහීං බිභ්රතී තනුම් ॥19॥
නාරසිංහී නෘසිංහස්ය බිභ්රතී සදෘශං වපුඃ ।
ප්රාප්තා තත්ර සටාක්ෂේපක්ෂිප්තනක්ෂත්ර සංහතිඃ ॥20॥
වජ්ර හස්තා තථෛවෛංද්රී ගජරාජෝ පරිස්ථිතා ।
ප්රාප්තා සහස්ර නයනා යථා ශක්රස්තථෛව සා ॥21॥
තතඃ පරිවෘත්තස්තාභිරීශානෝ දේව ශක්තිභිඃ ।
හන්යංතාමසුරාඃ ශීඝ්රං මම ප්රීත්යාහ චංඩිකාං ॥22॥
තතෝ දේවී ශරීරාත්තු විනිෂ්ක්රාංතාතිභීෂණා ।
චංඩිකා ශක්තිරත්යුග්රා ශිවාශතනිනාදිනී ॥23॥
සා චාහ ධූම්රජටිලං ඊශානමපරාජිතා ।
දූතත්වං ගච්ඡ භගවන් පාර්ශ්වං ශුංභනිශුංභයෝඃ ॥24॥
බ්රූහි ශුංභං නිශුංභං ච දානවාවතිගර්විතෞ ।
යේ චාන්යේ දානවාස්තත්ර යුද්ධාය සමුපස්ථිතාඃ ॥25॥
ත්රෛලෝක්යමිංද්රෝ ලභතාං දේවාඃ සංතු හවිර්භුජඃ ।
යූයං ප්රයාත පාතාළං යදි ජීවිතුමිච්ඡථ ॥26॥
බලාවලේපාදථ චේද්භවංතෝ යුද්ධකාංක්ෂිණඃ ।
තදා ගච්ඡත තෘප්යංතු මච්ඡිවාඃ පිශිතේන වඃ ॥27॥
යතෝ නියුක්තෝ දෞත්යේන තයා දේව්යා ශිවඃ ස්වයම් ।
ශිවදූතීති ලෝකේऽස්මිංස්තතඃ සා ඛ්යාති මාගතා ॥28॥
තේऽපි ශ්රුත්වා වචෝ දේව්යාඃ ශර්වාඛ්යාතං මහාසුරාඃ ।
අමර්ෂාපූරිතා ජග්මුර්යත්ර කාත්යායනී ස්ථිතා ॥29॥
තතඃ ප්රථමමේවාග්රේ ශරශක්ත්යෘෂ්ටිවෘෂ්ටිභිඃ ।
වවර්ෂුරුද්ධතාමර්ෂාඃ ස්තාං දේවීමමරාරයඃ ॥30॥
සා ච තාන් ප්රහිතාන් බාණාන් ංඡූලශක්තිපරශ්වධාන් ।
චිච්ඡේද ලීලයාධ්මාතධනුර්මුක්තෛර්මහේෂුභිඃ ॥31॥
තස්යාග්රතස්තථා කාළී ශූලපාතවිදාරිතාන් ।
ඛට්වාංගපෝථිතාංශ්චාරීන්කුර්වංතී ව්යචරත්තදා ॥32॥
කමංඩලුජලාක්ෂේපහතවීර්යාන් හතෞජසඃ ।
බ්රහ්මාණී චාකරෝච්ඡත්රූන්යේන යේන ස්ම ධාවති ॥33॥
මාහේශ්වරී ත්රිශූලේන තථා චක්රේණ වෛෂ්ණවී ।
දෛත්යාඞ්ජඝාන කෞමාරී තථා ශත්යාති කෝපනා ॥34॥
ඓංද්රී කුලිශපාතේන ශතශෝ දෛත්යදානවාඃ ।
පේතුර්විදාරිතාඃ පෘථ්ව්යාං රුධිරෞඝප්රවර්ෂිණඃ ॥35॥
තුංඩප්රහාරවිධ්වස්තා දංෂ්ට්රා ග්රක්ෂත වක්ෂසඃ ।
වාරාහමූර්ත්යා න්යපතංශ්චක්රේණ ච විදාරිතාඃ ॥36॥
නඛෛර්විදාරිතාංශ්චාන්යාන් භක්ෂයංතී මහාසුරාන් ।
නාරසිංහී චචාරාජෞ නාදා පූර්ණදිගංබරා ॥37॥
චංඩාට්ටහාසෛරසුරාඃ ශිවදූත්යභිදූෂිතාඃ ।
පේතුඃ පෘථිව්යාං පතිතාංස්තාංශ්චඛාදාථ සා තදා ॥38॥
ඉති මාතෘ ගණං ක්රුද්ධං මර්ද යංතං මහාසුරාන් ।
දෘෂ්ට්වාභ්යුපායෛර්විවිධෛර්නේශුර්දේවාරිසෛනිකාඃ ॥39॥
පලායනපරාංදෘෂ්ට්වා දෛත්යාන්මාතෘගණාර්දිතාන් ।
යෝද්ධුමභ්යායයෞ ක්රුද්ධෝ රක්තබීජෝ මහාසුරඃ ॥40॥
රක්තබිංදුර්යදා භූමෞ පතත්යස්ය ශරීරතඃ ।
සමුත්පතති මේදින්යාං තත්ප්රමාණෝ මහාසුරඃ ॥41॥
යුයුධේ ස ගදාපාණිරිංද්රශක්ත්යා මහාසුරඃ ।
තතශ්චෛංද්රී ස්වවජ්රේණ රක්තබීජමතාඩයත් ॥42॥
කුලිශේනාහතස්යාශු බහු සුස්රාව ශෝණිතම් ।
සමුත්තස්ථුස්තතෝ යෝධාස්තද්රපාස්තත්පරාක්රමාඃ ॥43॥
යාවංතඃ පතිතාස්තස්ය ශරීරාද්රක්තබිංදවඃ ।
තාවංතඃ පුරුෂා ජාතාඃ ස්තද්වීර්යබලවික්රමාඃ ॥44॥
තේ චාපි යුයුධුස්තත්ර පුරුෂා රක්ත සංභවාඃ ।
සමං මාතෘභිරත්යුග්රශස්ත්රපාතාතිභීෂණං ॥45॥
පුනශ්ච වජ්ර පාතේන ක්ෂත මශ්ය ශිරෝ යදා ।
වවාහ රක්තං පුරුෂාස්තතෝ ජාතාඃ සහස්රශඃ ॥46॥
වෛෂ්ණවී සමරේ චෛනං චක්රේණාභිජඝාන හ ।
ගදයා තාඩයාමාස ඓංද්රී තමසුරේශ්වරම්॥47॥
වෛෂ්ණවී චක්රභින්නස්ය රුධිරස්රාව සංභවෛඃ ।
සහස්රශෝ ජගද්ව්යාප්තං තත්ප්රමාණෛර්මහාසුරෛඃ ॥48॥
ශක්ත්යා ජඝාන කෞමාරී වාරාහී ච තථාසිනා ।
මාහේශ්වරී ත්රිශූලේන රක්තබීජං මහාසුරම් ॥49॥
ස චාපි ගදයා දෛත්යඃ සර්වා ඒවාහනත් පෘථක් ।
මාතॄඃ කෝපසමාවිෂ්ටෝ රක්තබීජෝ මහාසුරඃ ॥50॥
තස්යාහතස්ය බහුධා ශක්තිශූලාදි භිර්භුවිඃ ।
පපාත යෝ වෛ රක්තෞඝස්තේනාසංචතශෝऽසුරාඃ ॥51॥
තෛශ්චාසුරාසෘක්සංභූතෛරසුරෛඃ සකලං ජගත් ।
ව්යාප්තමාසීත්තතෝ දේවා භයමාජග්මුරුත්තමම් ॥52॥
තාන් විෂණ්ණා න් සුරාන් දෘෂ්ට්වා චංඩිකා ප්රාහසත්වරම් ।
උවාච කාළීං චාමුංඩේ විස්තීර්ණං වදනං කුරු ॥53॥
මච්ඡස්ත්රපාතසංභූතාන් රක්තබිංදූන් මහාසුරාන් ।
රක්තබිංදෝඃ ප්රතීච්ඡ ත්වං වක්ත්රේණානේන වේගිනා ॥54॥
භක්ෂයංතී චර රණෝ තදුත්පන්නාන්මහාසුරාන් ।
ඒවමේෂ ක්ෂයං දෛත්යඃ ක්ෂේණ රක්තෝ ගමිෂ්යති ॥55॥
භක්ෂ්ය මාණා ස්ත්වයා චෝග්රා න චෝත්පත්ස්යංති චාපරේ ।
ඉත්යුක්ත්වා තාං තතෝ දේවී ශූලේනාභිජඝාන තම් ॥56॥
මුඛේන කාළී ජගෘහේ රක්තබීජස්ය ශෝණිතම් ।
තතෝऽසාවාජඝානාථ ගදයා තත්ර චංඩිකාං ॥57॥
න චාස්යා වේදනාං චක්රේ ගදාපාතෝऽල්පිකාමපි ।
තස්යාහතස්ය දේහාත්තු බහු සුස්රාව ශෝණිතම් ॥58॥
යතස්තතස්තද්වක්ත්රේණ චාමුංඩා සංප්රතීච්ඡති ।
මුඛේ සමුද්ගතා යේऽස්යා රක්තපාතාන්මහාසුරාඃ ॥59॥
තාංශ්චඛාදාථ චාමුංඩා පපෞ තස්ය ච ශෝණිතම් ॥60॥
දේවී ශූලේන වජ්රේණ බාණෛරසිභිර් ඍෂ්ටිභිඃ ।
ජඝාන රක්තබීජං තං චාමුංඩා පීත ශෝණිතම් ॥61॥
ස පපාත මහීපෘෂ්ඨේ ශස්ත්රසංඝසමාහතඃ ।
නීරක්තශ්ච මහීපාල රක්තබීජෝ මහාසුරඃ ॥62॥
තතස්තේ හර්ෂ මතුලං අවාපුස්ත්රිදශා නෘප ।
තේෂාං මාතෘගණෝ ජාතෝ නනර්තාසෘංංගමදෝද්ධතඃ ॥63॥
॥ ස්වස්ති ශ්රී මාර්කංඩේය පුරාණේ සාවර්නිකේ මන්වංතරේ දේවි මහත්ම්යේ රක්තබීජවධෝනාම අෂ්ටමෝධ්යාය සමාප්තම් ॥
ආහුති
ඕං ජයංතී සාංගායෛ සශක්තිකායෛ සපරිවාරායෛ සවාහනායෛ රක්තාක්ෂ්යෛ අෂ්ටමාතෘ සහිතායෛ මහාහුතිං සමර්පයාමි නමඃ ස්වාහා ॥