හිරණ්යාක්ෂේ පෝත්රිප්රවරවපුෂා දේව භවතා
හතේ ශෝකක්රෝධග්ලපිතධෘතිරේතස්ය සහජඃ ।
හිරණ්යප්රාරංභඃ කශිපුරමරාරාතිසදසි
ප්රතිජ්ඤමාතේනේ තව කිල වධාර්ථං මධුරිපෝ ॥1॥
විධාතාරං ඝෝරං ස ඛලු තපසිත්වා නචිරතඃ
පුරඃ සාක්ෂාත්කුර්වන් සුරනරමෘගාද්යෛරනිධනම් ।
වරං ලබ්ධ්වා දෘප්තෝ ජගදිහ භවන්නායකමිදං
පරික්ෂුංදන්නිංද්රාදහරත දිවං ත්වාමගණයන් ॥2॥
නිහංතුං ත්වාං භූයස්තව පදමවාප්තස්ය ච රිපෝ-
ර්බහිර්දෘෂ්ටේරංතර්දධිථ හෘදයේ සූක්ෂ්මවපුෂා ।
නදන්නුච්චෛස්තත්රාප්යඛිලභුවනාංතේ ච මෘගයන්
භියා යාතං මත්වා ස ඛලු ජිතකාශී නිවවෘතේ ॥3॥
තතෝऽස්ය ප්රහ්ලාදඃ සමජනි සුතෝ ගර්භවසතෞ
මුනේර්වීණාපාණේරධිගතභවද්භක්තිමහිමා ।
ස වෛ ජාත්යා දෛත්යඃ ශිශුරපි සමේත්ය ත්වයි රතිං
ගතස්ත්වද්භක්තානාං වරද පරමෝදාහරණතාම් ॥4॥
සුරාරීණාං හාස්යං තව චරණදාස්යං නිජසුතේ
ස දෘෂ්ට්වා දුෂ්ටාත්මා ගුරුභිරශිශික්ෂච්චිරමමුම් ।
ගුරුප්රෝක්තං චාසාවිදමිදමභද්රාය දෘඪමි-
ත්යපාකුර්වන් සර්වං තව චරණභක්ත්යෛව වවෘධේ ॥ 5 ॥
අධීතේෂු ශ්රේෂ්ඨං කිමිති පරිපෘෂ්ටේऽථ තනයේ
භවද්භක්තිං වර්යාමභිගදති පර්යාකුලධෘතිඃ ।
ගුරුභ්යෝ රෝෂිත්වා සහජමතිරස්යේත්යභිවිදන්
වධෝපායානස්මින් ව්යතනුත භවත්පාදශරණේ ॥6॥
ස ශූලෛරාවිද්ධඃ සුබහු මථිතෝ දිග්ගජගණෛ-
ර්මහාසර්පෛර්දෂ්ටෝऽප්යනශනගරාහාරවිධුතඃ ।
ගිරීංද්රවක්ෂිප්තෝऽප්යහහ! පරමාත්මන්නයි විභෝ
ත්වයි න්යස්තාත්මත්වාත් කිමපි න නිපීඩාමභජත ॥7॥
තතඃ ශංකාවිෂ්ටඃ ස පුනරතිදුෂ්ටෝऽස්ය ජනකෝ
ගුරූක්ත්යා තද්ගේහේ කිල වරුණපාශෛස්තමරුණත් ।
ගුරෝශ්චාසාන්නිධ්යේ ස පුනරනුගාන් දෛත්යතනයාන්
භවද්භක්තේස්තත්ත්වං පරමමපි විජ්ඤානමශිෂත් ॥8॥
පිතා ශෘණ්වන් බාලප්රකරමඛිලං ත්වත්ස්තුතිපරං
රුෂාංධඃ ප්රාහෛනං කුලහතක කස්තේ බලමිති ।
බලං මේ වෛකුංඨස්තව ච ජගතාං චාපි ස බලං
ස ඒව ත්රෛලෝක්යං සකලමිති ධීරෝऽයමගදීත් ॥9॥
අරේ ක්වාසෞ ක්වාසෞ සකලජගදාත්මා හරිරිති
ප්රභිංතේ ස්ම ස්තංභං චලිතකරවාලෝ දිතිසුතඃ ।
අතඃ පශ්චාද්විෂ්ණෝ න හි වදිතුමීශෝऽස්මි සහසා
කෘපාත්මන් විශ්වාත්මන් පවනපුරවාසින් මෘඩය මාම් ॥10॥