පඨංතෝ නාමානි ප්රමදභරසිංධෞ නිපතිතාඃ
ස්මරංතෝ රූපං තේ වරද කථයංතෝ ගුණකථාඃ ।
චරංතෝ යේ භක්තාස්ත්වයි ඛලු රමංතේ පරමමූ-
නහං ධන්යාන් මන්යේ සමධිගතසර්වාභිලෂිතාන් ॥1॥
ගදක්ලිෂ්ටං කෂ්ටං තව චරණසේවාරසභරේऽ-
ප්යනාසක්තං චිත්තං භවති බත විෂ්ණෝ කුරු දයාම් ।
භවත්පාදාංභෝජස්මරණරසිකෝ නාමනිවහා-
නහං ගායං ගායං කුහචන විවත්ස්යාමි විජනේ ॥2॥
කෘපා තේ ජාතා චේත්කිමිව න හි ලභ්යං තනුභෘතාං
මදීයක්ලේශෞඝප්රශමනදශා නාම කියතී ।
න කේ කේ ලෝකේऽස්මින්නනිශමයි ශෝකාභිරහිතා
භවද්භක්තා මුක්තාඃ සුඛගතිමසක්තා විදධතේ ॥3॥
මුනිප්රෞඪා රූඪා ජගති ඛලු ගූඪාත්මගතයෝ
භවත්පාදාංභෝජස්මරණවිරුජෝ නාරදමුඛාඃ ।
චරංතීශ ස්වෛරං සතතපරිනිර්භාතපරචි –
ත්සදානංදාද්වෛතප්රසරපරිමග්නාඃ කිමපරම් ॥4॥
භවද්භක්තිඃ ස්ඵීතා භවතු මම සෛව ප්රශමයේ-
දශේෂක්ලේශෞඝං න ඛලු හෘදි සංදේහකණිකා ।
න චේද්ව්යාසස්යෝක්තිස්තව ච වචනං නෛගමවචෝ
භවේන්මිථ්යා රථ්යාපුරුෂවචනප්රායමඛිලම් ॥5॥
භවද්භක්තිස්තාවත් ප්රමුඛමධුරා ත්වත් ගුණරසාත්
කිමප්යාරූඪා චේදඛිලපරිතාපප්රශමනී ।
පුනශ්චාංතේ ස්වාංතේ විමලපරිබෝධෝදයමිල-
න්මහානංදාද්වෛතං දිශති කිමතඃ ප්රාර්ථ්යමපරම් ॥6॥
විධූය ක්ලේශාන්මේ කුරු චරණයුග්මං ධෘතරසං
භවත්ක්ෂේත්රප්රාප්තෞ කරමපි ච තේ පූජනවිධෞ ।
භවන්මූර්ත්යාලෝකේ නයනමථ තේ පාදතුලසී-
පරිඝ්රාණේ ඝ්රාණං ශ්රවණමපි තේ චාරුචරිතේ ॥7॥
ප්රභූතාධිව්යාධිප්රසභචලිතේ මාමකහෘදි
ත්වදීයං තද්රූපං පරමසුඛචිද්රූපමුදියාත් ।
උදංචද්රෝමාංචෝ ගලිතබහුහර්ෂාශ්රුනිවහෝ
යථා විස්මර්යාසං දුරුපශමපීඩාපරිභවාන් ॥8॥
මරුද්ගේහාධීශ ත්වයි ඛලු පරාංචෝऽපි සුඛිනෝ
භවත්ස්නේහී සෝऽහං සුබහු පරිතප්යේ ච කිමිදම් ।
අකීර්තිස්තේ මා භූද්වරද ගදභාරං ප්රශමයන්
භවත් භක්තෝත්තංසං ඣටිති කුරු මාං කංසදමන ॥9॥
කිමුක්තෛර්භූයෝභිස්තව හි කරුණා යාවදුදියා-
දහං තාවද්දේව ප්රහිතවිවිධාර්තප්රලපිතඃ ।
පුරඃ ක්ලෘප්තේ පාදේ වරද තව නේෂ්යාමි දිවසා-
න්යථාශක්ති ව්යක්තං නතිනුතිනිෂේවා විරචයන් ॥10॥