සාංද්රානංදතනෝ හරේ නනු පුරා දෛවාසුරේ සංගරේ
ත්වත්කෘත්තා අපි කර්මශේෂවශතෝ යේ තේ න යාතා ගතිම් ।
තේෂාං භූතලජන්මනාං දිතිභුවාං භාරේණ දූරාර්දිතා
භූමිඃ ප්රාප විරිංචමාශ්රිතපදං දේවෛඃ පුරෛවාගතෛඃ ॥1॥
හා හා දුර්ජනභූරිභාරමථිතාං පාථෝනිධෞ පාතුකා-
මේතාං පාලය හංත මේ විවශතාං සංපෘච්ඡ දේවානිමාන් ।
ඉත්යාදිප්රචුරප්රලාපවිවශාමාලෝක්ය ධාතා මහීං
දේවානාං වදනානි වීක්ෂ්ය පරිතෝ දධ්යෞ භවංතං හරේ ॥2॥
ඌචේ චාංබුජභූරමූනයි සුරාඃ සත්යං ධරිත්ර්යා වචෝ
නන්වස්යා භවතාං ච රක්ෂණවිධෞ දක්ෂෝ හි ලක්ෂ්මීපතිඃ ।
සර්වේ ශර්වපුරස්සරා වයමිතෝ ගත්වා පයෝවාරිධිං
නත්වා තං ස්තුමහේ ජවාදිති යයුඃ සාකං තවාකේතනම් ॥3॥
තේ මුග්ධානිලශාලිදුග්ධජලධේස්තීරං ගතාඃ සංගතා
යාවත්ත්වත්පදචිංතනෛකමනසස්තාවත් ස පාථෝජභූඃ ।
ත්වද්වාචං හෘදයේ නිශම්ය සකලානානංදයන්නූචිවා-
නාඛ්යාතඃ පරමාත්මනා ස්වයමහං වාක්යං තදාකර්ණ්යතාම් ॥4॥
ජානේ දීනදශාමහං දිවිෂදාං භූමේශ්ච භීමෛර්නෘපෛ-
ස්තත්ක්ෂේපාය භවාමි යාදවකුලේ සෝऽහං සමග්රාත්මනා ।
දේවා වෘෂ්ණිකුලේ භවංතු කලයා දේවාංගනාශ්චාවනෞ
මත්සේවාර්ථමිති ත්වදීයවචනං පාථෝජභූරූචිවාන් ॥5॥
ශ්රුත්වා කර්ණරසායනං තව වචඃ සර්වේෂු නිර්වාපිත-
ස්වාංතේෂ්වීශ ගතේෂු තාවකකෘපාපීයූෂතෘප්තාත්මසු ।
විඛ්යාතේ මධුරාපුරේ කිල භවත්සාන්නිධ්යපුණ්යෝත්තරේ
ධන්යාං දේවකනංදනාමුදවහද්රාජා ස ශූරාත්මජඃ ॥6॥
උද්වාහාවසිතෞ තදීයසහජඃ කංසෝऽථ සම්මානය-
න්නේතෞ සූතතයා ගතඃ පථි රථේ ව්යෝමෝත්ථයා ත්වද්ගිරා ।
අස්යාස්ත්වාමතිදුෂ්ටමෂ්ටමසුතෝ හංතේති හංතේරිතඃ
සංත්රාසාත් ස තු හංතුමංතිකගතාං තන්වීං කෘපාණීමධාත් ॥7॥
ගෘහ්ණානශ්චිකුරේෂු තාං ඛලමතිඃ ශෞරේශ්චිරං සාංත්වනෛ-
ර්නෝ මුංචන් පුනරාත්මජාර්පණගිරා ප්රීතෝऽථ යාතෝ ගෘහාන් ।
ආද්යං ත්වත්සහජං තථාऽර්පිතමපි ස්නේහේන නාහන්නසෞ
දුෂ්ටානාමපි දේව පුෂ්ටකරුණා දෘෂ්ටා හි ධීරේකදා ॥8॥
තාවත්ත්වන්මනසෛව නාරදමුනිඃ ප්රෝචේ ස භෝජේශ්වරං
යූයං නන්වසුරාඃ සුරාශ්ච යදවෝ ජානාසි කිං න ප්රභෝ ।
මායාවී ස හරිර්භවද්වධකෘතේ භාවී සුරප්රාර්ථනා-
දිත්යාකර්ණ්ය යදූනදූධුනදසෞ ශෞරේශ්ච සූනූනහන් ॥9॥
ප්රාප්තේ සප්තමගර්භතාමහිපතෞ ත්වත්ප්රේරණාන්මායයා
නීතේ මාධව රෝහිණීං ත්වමපි භෝඃසච්චිත්සුඛෛකාත්මකඃ ।
දේවක්යා ජඨරං විවේශිථ විභෝ සංස්තූයමානඃ සුරෛඃ
ස ත්වං කෘෂ්ණ විධූය රෝගපටලීං භක්තිං පරාං දේහි මේ ॥10॥