භවංතමයමුද්වහන් යදුකුලෝද්වහෝ නිස්සරන්
දදර්ශ ගගනෝච්චලජ්ජලභරාං කලිංදාත්මජාම් ।
අහෝ සලිලසංචයඃ ස පුනරෛංද්රජාලෝදිතෝ
ජලෞඝ ඉව තත්ක්ෂණාත් ප්රපදමේයතාමායයෞ ॥1॥
ප්රසුප්තපශුපාලිකාං නිභෘතමාරුදද්බාලිකා-
මපාවෘතකවාටිකාං පශුපවාටිකාමාවිශන් ।
භවංතමයමර්පයන් ප්රසවතල්පකේ තත්පදා-
ද්වහන් කපටකන්යකාං ස්වපුරමාගතෝ වේගතඃ ॥2॥
තතස්ත්වදනුජාරවක්ෂපිතනිද්රවේගද්රවද්-
භටෝත්කරනිවේදිතප්රසවවාර්තයෛවාර්තිමාන් ।
විමුක්තචිකුරෝත්කරස්ත්වරිතමාපතන් භෝජරා-
ඩතුෂ්ට ඉව දෘෂ්ටවාන් භගිනිකාකරේ කන්යකාම් ॥3॥
ධ්රුවං කපටශාලිනෝ මධුහරස්ය මායා භවේ-
දසාවිති කිශෝරිකාං භගිනිකාකරාලිංගිතාම් ।
ද්විපෝ නලිනිකාංතරාදිව මෘණාලිකාමාක්ෂිප-
න්නයං ත්වදනුජාමජාමුපලපට්ටකේ පිෂ්ටවාන් ॥4॥
තතඃ භවදුපාසකෝ ඣටිති මෘත්යුපාශාදිව
ප්රමුච්ය තරසෛව සා සමධිරූඪරූපාංතරා ।
අධස්තලමජග්මුෂී විකසදෂ්ටබාහුස්ඵුර-
න්මහායුධමහෝ ගතා කිල විහායසා දිද්යුතේ ॥5॥
නෘශංසතර කංස තේ කිමු මයා විනිෂ්පිෂ්ටයා
බභූව භවදංතකඃ ක්වචන චිංත්යතාං තේ හිතම් ।
ඉති ත්වදනුජා විභෝ ඛලමුදීර්ය තං ජග්මුෂී
මරුද්ගණපණායිතා භුවි ච මංදිරාණ්යේයුෂී ॥6॥
ප්රගේ පුනරගාත්මජාවචනමීරිතා භූභුජා
ප්රලංබබකපූතනාප්රමුඛදානවා මානිනඃ ।
භවන්නිධනකාම්යයා ජගති බභ්රමුර්නිර්භයාඃ
කුමාරකවිමාරකාඃ කිමිව දුෂ්කරං නිෂ්කෘපෛඃ ॥7॥
තතඃ පශුපමංදිරේ ත්වයි මුකුංද නංදප්රියා-
ප්රසූතිශයනේශයේ රුදති කිංචිදංචත්පදේ ।
විබුධ්ය වනිතාජනෛස්තනයසංභවේ ඝෝෂිතේ
මුදා කිමු වදාම්යහෝ සකලමාකුලං ගෝකුලම් ॥8॥
අහෝ ඛලු යශෝදයා නවකලායචේතෝහරං
භවංතමලමංතිකේ ප්රථමමාපිබංත්යා දෘශා ।
පුනඃ ස්තනභරං නිජං සපදි පායයංත්යා මුදා
මනෝහරතනුස්පෘශා ජගති පුණ්යවංතෝ ජිතාඃ ॥9॥
භවත්කුශලකාම්යයා ස ඛලු නංදගෝපස්තදා
ප්රමෝදභරසංකුලෝ ද්විජකුලාය කින්නාදදාත් ।
තථෛව පශුපාලකාඃ කිමු න මංගලං තේනිරේ
ජගත්ත්රිතයමංගල ත්වමිහ පාහි මාමාමයාත් ॥10॥