ව්රජේශ්වරෛඃ ශෞරිවචෝ නිශම්ය සමාව්රජන්නධ්වනි භීතචේතාඃ ।
නිෂ්පිෂ්ටනිශ්ශේෂතරුං නිරීක්ෂ්ය කංචිත්පදාර්ථං ශරණං ගතස්වාම් ॥1॥
නිශම්ය ගෝපීවචනාදුදංතං සර්වේऽපි ගෝපා භයවිස්මයාංධාඃ ।
ත්වත්පාතිතං ඝෝරපිශාචදේහං දේහුර්විදූරේऽථ කුඨාරකෘත්තම් ॥2॥
ත්වත්පීතපූතස්තනතච්ඡරීරාත් සමුච්චලන්නුච්චතරෝ හි ධූමඃ ।
ශංකාමධාදාගරවඃ කිමේෂ කිං චාංදනෝ ගෞල්ගුලවෝऽථවේති ॥3॥
මදංගසංගස්ය ඵලං න දූරේ ක්ෂණේන තාවත් භවතාමපි ස්යාත් ।
ඉත්යුල්ලපන් වල්ලවතල්ලජේභ්යඃ ත්වං පූතනාමාතනුථාඃ සුගංධිම් ॥4॥
චිත්රං පිශාච්යා න හතඃ කුමාරඃ චිත්රං පුරෛවාකථි ශෞරිණේදම් ।
ඉති ප්රශංසන් කිල ගෝපලෝකෝ භවන්මුඛාලෝකරසේ න්යමාංක්ෂීත් ॥5॥
දිනේදිනේऽථ ප්රතිවෘද්ධලක්ෂ්මීරක්ෂීණමාංගල්යශතෝ ව්රජෝऽයම් ।
භවන්නිවාසාදයි වාසුදේව ප්රමෝදසාංද්රඃ පරිතෝ විරේජේ ॥6॥
ගෘහේෂු තේ කෝමලරූපහාසමිථඃකථාසංකුලිතාඃ කමන්යඃ ।
වෘත්තේෂු කෘත්යේෂු භවන්නිරීක්ෂාසමාගතාඃ ප්රත්යහමත්යනංදන් ॥7॥
අහෝ කුමාරෝ මයි දත්තදෘෂ්ටිඃ ස්මිතං කෘතං මාං ප්රති වත්සකේන ।
ඒහ්යේහි මාමිත්යුපසාර්ය පාණී ත්වයීශ කිං කිං න කෘතං වධූභිඃ ॥8॥
භවද්වපුඃස්පර්ශනකෞතුකේන කරාත්කරං ගෝපවධූජනේන ।
නීතස්ත්වමාතාම්රසරෝජමාලාව්යාලංබිලෝලංබතුලාමලාසීඃ ॥9॥
නිපායයංතී ස්තනමංකගං ත්වාං විලෝකයංතී වදනං හසංතී ।
දශාං යශෝදා කතමාං න භේජේ ස තාදෘශඃ පාහි හරේ ගදාන්මාම් ॥10॥