කදාපි ජන්මර්ක්ෂදිනේ තව ප්රභෝ නිමංත්රිතජ්ඤාතිවධූමහීසුරා ।
මහානසස්ත්වාං සවිධේ නිධාය සා මහානසාදෞ වවෘතේ ව්රජේශ්වරී ॥1॥
තතෝ භවත්ත්රාණනියුක්තබාලකප්රභීතිසංක්රංදනසංකුලාරවෛඃ ।
විමිශ්රමශ්රාවි භවත්සමීපතඃ පරිස්ඵුටද්දාරුචටච්චටාරවඃ ॥2॥
තතස්තදාකර්ණනසංභ්රමශ්රමප්රකංපිවක්ෂෝජභරා ව්රජාංගනාඃ ।
භවංතමංතර්දදෘශුස්සමංතතෝ විනිෂ්පතද්දාරුණදාරුමධ්යගම් ॥3॥
ශිශෝරහෝ කිං කිමභූදිති ද්රුතං ප්රධාව්ය නංදඃ පශුපාශ්ච භූසුරාඃ ।
භවංතමාලෝක්ය යශෝදයා ධෘතං සමාශ්වසන්නශ්රුජලාර්ද්රලෝචනාඃ ॥4॥
කස්කෝ නු කෞතස්කුත ඒෂ විස්මයෝ විශංකටං යච්ඡකටං විපාටිතම් ।
න කාරණං කිංචිදිහේති තේ ස්ථිතාඃ ස්වනාසිකාදත්තකරාස්ත්වදීක්ෂකාඃ ॥5॥
කුමාරකස්යාස්ය පයෝධරාර්ථිනඃ ප්රරෝදනේ ලෝලපදාංබුජාහතම් ।
මයා මයා දෘෂ්ටමනෝ විපර්යගාදිතීශ තේ පාලකබාලකා ජගුඃ ॥6॥
භියා තදා කිංචිදජානතාමිදං කුමාරකාණාමතිදුර්ඝටං වචඃ ।
භවත්ප්රභාවාවිදුරෛරිතීරිතං මනාගිවාශංක්යත දෘෂ්ටපූතනෛඃ ॥7॥
ප්රවාලතාම්රං කිමිදං පදං ක්ෂතං සරෝජරම්යෞ නු කරෞ විරෝජිතෞ।
ඉති ප්රසර්පත්කරුණාතරංගිතාස්ත්වදංගමාපස්පෘශුරංගනාජනාඃ ॥8॥
අයේ සුතං දේහි ජගත්පතේඃ කෘපාතරංගපාතාත්පරිපාතමද්ය මේ ।
ඉති ස්ම සංගෘහ්ය පිතා ත්වදංගකං මුහුර්මුහුඃ ශ්ලිෂ්යති ජාතකංටකඃ ॥9॥
අනෝනිලීනඃ කිල හංතුමාගතඃ සුරාරිරේවං භවතා විහිංසිතඃ ।
රජෝऽපි නෝ දෘෂ්ටමමුෂ්ය තත්කථං ස ශුද්ධසත්ත්වේ ත්වයි ලීනවාන් ධ්රුවම් ॥10॥
ප්රපූජිතෛස්තත්ර තතෝ ද්විජාතිභිර්විශේෂතෝ ලංභිතමංගලාශිෂඃ ।
ව්රජං නිජෛර්බාල්යරසෛර්විමෝහයන් මරුත්පුරාධීශ රුජාං ජහීහි මේ ॥11॥