අයි සබල මුරාරේ පාණිජානුප්රචාරෛඃ
කිමපි භවනභාගාන් භූෂයංතෞ භවංතෞ ।
චලිතචරණකංජෞ මංජුමංජීරශිංජා-
ශ්රවණකුතුකභාජෞ චේරතුශ්චාරුවේගාත් ॥1॥
මෘදු මෘදු විහසංතාවුන්මිෂද්දංතවංතෞ
වදනපතිතකේශෞ දෘශ්යපාදාබ්ජදේශෞ ।
භුජගලිතකරාංතව්යාලගත්කංකණාංකෞ
මතිමහරතමුච්චෛඃ පශ්යතාං විශ්වනෘණාම් ॥2॥
අනුසරති ජනෞඝේ කෞතුකව්යාකුලාක්ෂේ
කිමපි කෘතනිනාදං ව්යාහසංතෞ ද්රවංතෞ ।
වලිතවදනපද්මං පෘෂ්ඨතෝ දත්තදෘෂ්ටී
කිමිව න විදධාථේ කෞතුකං වාසුදේව ॥3॥
ද්රුතගතිෂු පතංතාවුත්ථිතෞ ලිප්තපංකෞ
දිවි මුනිභිරපංකෛඃ සස්මිතං වංද්යමානෞ ।
ද්රුතමථ ජනනීභ්යාං සානුකංපං ගෘහීතෞ
මුහුරපි පරිරබ්ධෞ ද්රාග්යුවාං චුංබිතෞ ච ॥4॥
ස්නුතකුචභරමංකේ ධාරයංතී භවංතං
තරලමති යශෝදා ස්තන්යදා ධන්යධන්යා ।
කපටපශුප මධ්යේ මුග්ධහාසාංකුරං තේ
දශනමුකුලහෘද්යං වීක්ෂ්ය වක්ත්රං ජහර්ෂ ॥5॥
තදනුචරණචාරී දාරකෛස්සාකමාරා-
න්නිලයතතිෂු ඛේලන් බාලචාපල්යශාලී ।
භවනශුකවිඩාලාන් වත්සකාංශ්චානුධාවන්
කථමපි කෘතහාසෛර්ගෝපකෛර්වාරිතෝऽභූඃ ॥6॥
හලධරසහිතස්ත්වං යත්ර යත්රෝපයාතෝ
විවශපතිතනේත්රාස්තත්ර තත්රෛව ගෝප්යඃ ।
විගලිතගෘහකෘත්යා විස්මෘතාපත්යභෘත්යා
මුරහර මුහුරත්යංතාකුලා නිත්යමාසන් ॥7॥
ප්රතිනවනවනීතං ගෝපිකාදත්තමිච්ඡන්
කලපදමුපගායන් කෝමලං ක්වාපි නෘත්යන් ।
සදයයුවතිලෝකෛරර්පිතං සර්පිරශ්නන්
ක්වචන නවවිපක්වං දුග්ධමප්යාපිබස්ත්වම් ॥8॥
මම ඛලු බලිගේහේ යාචනං ජාතමාස්තා-
මිහ පුනරබලානාමග්රතෝ නෛව කුර්වේ ।
ඉති විහිතමතිඃ කිං දේව සංත්යජ්ය යාච්ඤාං
දධිඝෘතමහරස්ත්වං චාරුණා චෝරණේන ॥9॥
තව දධිඝෘතමෝෂේ ඝෝෂයෝෂාජනානා-
මභජත හෘදි රෝෂෝ නාවකාශං න ශෝකඃ ।
හෘදයමපි මුෂිත්වා හර්ෂසිංධෞ න්යධාස්ත්වං
ස මම ශමය රෝගාන් වාතගේහාධිනාථ ॥10॥
ශාඛාග්රේ විධුං විලෝක්ය ඵලමිත්යංබාං ච තාතං මුහුඃ
සංප්රාර්ථ්යාථ තදා තදීයවචසා ප්රෝත්ක්ෂිප්තබාහෞ ත්වයි।
චිත්රං දේව ශශී ස තේ කර්මගාත් කිං බ්රූමහේ සංපතඃ
ජ්යෝතිර්මංඩලපූරිතාඛිලවපුඃ ප්රාගා විරාඩ්රූපතාම් ॥ 11॥
කිං කිං බතේදමිති සංභ්රම භාජමේනං
බ්රහ්මාර්ණවේ ක්ෂණමමුං පරිමජ්ජ්ය තාතම් ।
මායාං පුනස්තනය-මෝහමයීං විතන්වන්
ආනංදචින්මය ජගන්මය පාහි රෝගාත් ॥12॥