අයි දේව පුරා කිල ත්වයි ස්වයමුත්තානශයේ ස්තනංධයේ ।
පරිජෘංභණතෝ ව්යපාවෘතේ වදනේ විශ්වමචෂ්ට වල්ලවී ॥1॥
පුනරප්යථ බාලකෛඃ සමං ත්වයි ලීලානිරතේ ජගත්පතේ ।
ඵලසංචයවංචනක්රුධා තව මෘද්භෝජනමූචුරර්භකාඃ ॥2॥
අයි තේ ප්රලයාවධෞ විභෝ ක්ෂිතිතෝයාදිසමස්තභක්ෂිණඃ ।
මෘදුපාශනතෝ රුජා භවේදිති භීතා ජනනී චුකෝප සා ॥3॥
අයි දුර්විනයාත්මක ත්වයා කිමු මෘත්සා බත වත්ස භක්ෂිතා ।
ඉති මාතෘගිරං චිරං විභෝ විතථාං ත්වං ප්රතිජජ්ඤිෂේ හසන් ॥4॥
අයි තේ සකලෛර්විනිශ්චිතේ විමතිශ්චේද්වදනං විදාර්යතාම් ।
ඉති මාතෘවිභර්ත්සිතෝ මුඛං විකසත්පද්මනිභං ව්යදාරයඃ ॥5॥
අපි මෘල්ලවදර්ශනෝත්සුකාං ජනනීං තාං බහු තර්පයන්නිව ।
පෘථිවීං නිඛිලාං න කේවලං භුවනාන්යප්යඛිලාන්යදීදෘශඃ ॥6॥
කුහචිද්වනමංබුධිඃ ක්වචිත් ක්වචිදභ්රං කුහචිද්රසාතලම් ।
මනුජා දනුජාඃ ක්වචිත් සුරා දදෘශේ කිං න තදා ත්වදානනේ ॥7॥
කලශාංබුධිශායිනං පුනඃ පරවෛකුංඨපදාධිවාසිනම් ।
ස්වපුරශ්ච නිජාර්භකාත්මකං කතිධා ත්වාං න දදර්ශ සා මුඛේ ॥8॥
විකසද්භුවනේ මුඛෝදරේ නනු භූයෝऽපි තථාවිධානනඃ ।
අනයා ස්ඵුටමීක්ෂිතෝ භවානනවස්ථාං ජගතාං බතාතනෝත් ॥9॥
ධෘතතත්ත්වධියං තදා ක්ෂණං ජනනීං තාං ප්රණයේන මෝහයන් ।
ස්තනමංබ දිශේත්යුපාසජන් භගවන්නද්භුතබාල පාහි මාම් ॥10॥