ඒකදා දධිවිමාථකාරිණීං මාතරං සමුපසේදිවාන් භවාන් ।
ස්තන්යලෝලුපතයා නිවාරයන්නංකමේත්ය පපිවාන් පයෝධරෞ ॥1॥
අර්ධපීතකුචකුඩ්මලේ ත්වයි ස්නිග්ධහාසමධුරානනාංබුජේ ।
දුග්ධමීශ දහනේ පරිස්රුතං ධර්තුමාශු ජනනී ජගාම තේ ॥2॥
සාමිපීතරසභංගසංගතක්රෝධභාරපරිභූතචේතසා।
මංථදංඩමුපගෘහ්ය පාටිතං හංත දේව දධිභාජනං ත්වයා ॥3॥
උච්චලද්ධ්වනිතමුච්චකෛස්තදා සන්නිශම්ය ජනනී සමාද්රුතා ।
ත්වද්යශෝවිසරවද්දදර්ශ සා සද්ය ඒව දධි විස්තෘතං ක්ෂිතෞ ॥4॥
වේදමාර්ගපරිමාර්ගිතං රුෂා ත්වමවීක්ෂ්ය පරිමාර්ගයංත්යසෞ ।
සංදදර්ශ සුකෘතින්යුලූඛලේ දීයමානනවනීතමෝතවේ ॥5॥
ත්වාං ප්රගෘහ්ය බත භීතිභාවනාභාසුරානනසරෝජමාශු සා ।
රෝෂරූෂිතමුඛී සඛීපුරෝ බංධනාය රශනාමුපාදදේ ॥6॥
බංධුමිච්ඡති යමේව සජ්ජනස්තං භවංතමයි බංධුමිච්ඡතී ।
සා නියුජ්ය රශනාගුණාන් බහූන් ද්ව්යංගුලෝනමඛිලං කිලෛක්ෂත ॥7॥
විස්මිතෝත්ස්මිතසඛීජනේක්ෂිතාං ස්වින්නසන්නවපුෂං නිරීක්ෂ්ය තාම් ।
නිත්යමුක්තවපුරප්යහෝ හරේ බංධමේව කෘපයාऽන්වමන්යථාඃ ॥8॥
ස්ථීයතාං චිරමුලූඛලේ ඛලේත්යාගතා භවනමේව සා යදා।
ප්රාගුලූඛලබිලාංතරේ තදා සර්පිරර්පිතමදන්නවාස්ථිථාඃ ॥9॥
යද්යපාශසුගමෝ විභෝ භවාන් සංයතඃ කිමු සපාශයාऽනයා ।
ඒවමාදි දිවිජෛරභිෂ්ටුතෝ වාතනාථ පරිපාහි මාං ගදාත් ॥10॥