මුදා සුරෞඝෛස්ත්වමුදාරසම්මදෛ-
රුදීර්ය දාමෝදර ඉත්යභිෂ්ටුතඃ ।
මෘදුදරඃ ස්වෛරමුලූඛලේ ලග-
න්නදූරතෝ ද්වෞ කකුභාවුදෛක්ෂථාඃ ॥1॥
කුබේරසූනුර්නලකූබරාභිධඃ
පරෝ මණිග්රීව ඉති ප්රථාං ගතඃ ।
මහේශසේවාධිගතශ්රියෝන්මදෞ
චිරං කිල ත්වද්විමුඛාවඛේලතාම් ॥2॥
සුරාපගායාං කිල තෞ මදෝත්කටෞ
සුරාපගායද්බහුයෞවතාවෘතෞ ।
විවාසසෞ කේලිපරෞ ස නාරදෝ
භවත්පදෛකප්රවණෝ නිරෛක්ෂත ॥3॥
භියා ප්රියාලෝකමුපාත්තවාසසං
පුරෝ නිරීක්ෂ්යාපි මදාංධචේතසෞ ।
ඉමෞ භවද්භක්ත්යුපශාංතිසිද්ධයේ
මුනිර්ජගෞ ශාංතිමෘතේ කුතඃ සුඛම් ॥4॥
යුවාමවාප්තෞ කකුභාත්මතාං චිරං
හරිං නිරීක්ෂ්යාථ පදං ස්වමාප්නුතම් ।
ඉතීරේතෞ තෞ භවදීක්ෂණස්පෘහාං
ගතෞ ව්රජාංතේ කකුභෞ බභූවතුඃ ॥5॥
අතංද්රමිංද්රද්රුයුගං තථාවිධං
සමේයුෂා මංථරගාමිනා ත්වයා ।
තිරායිතෝලූඛලරෝධනිර්ධුතෞ
චිරාය ජීර්ණෞ පරිපාතිතෞ තරූ ॥6॥
අභාජි ශාඛිද්විතයං යදා ත්වයා
තදෛව තද්ගර්භතලාන්නිරේයුෂා ।
මහාත්විෂා යක්ෂයුගේන තත්ක්ෂණා-
දභාජි ගෝවිංද භවානපි ස්තවෛඃ ॥7॥
ඉහාන්යභක්තෝऽපි සමේෂ්යති ක්රමාත්
භවංතමේතෞ ඛලු රුද්රසේවකෞ ।
මුනිප්රසාදාද්භව්දංඝ්රිමාගතෞ
ගතෞ වෘණානෞ ඛලු භක්තිමුත්තමාම් ॥8॥
තතස්තරූද්දාරණදාරුණාරව-
ප්රකංපිසංපාතිනි ගෝපමංඩලේ ।
විලජ්ජිතත්වජ්ජනනීමුඛේක්ෂිණා
ව්යමෝක්ෂි නංදේන භවාන් විමෝක්ෂදඃ ॥9॥
මහීරුහෝර්මධ්යගතෝ බතාර්භකෝ
හරේඃ ප්රභාවාදපරික්ෂතෝऽධුනා ।
ඉති බ්රුවාණෛර්ගමිතෝ ගෘහං භවාන්
මරුත්පුරාධීශ්වර පාහි මාං ගදාත් ॥10॥