භවත්ප්රභාවාවිදුරා හි ගෝපාස්තරුප්රපාතාදිකමත්ර ගෝෂ්ඨේ ।
අහේතුමුත්පාතගණං විශංක්ය ප්රයාතුමන්යත්ර මනෝ විතේනුඃ ॥1॥
තත්රෝපනංදාභිධගෝපවර්යෝ ජගෞ භවත්ප්රේරණයෛව නූනම් ।
ඉතඃ ප්රතීච්යාං විපිනං මනෝජ්ඤං වෘංදාවනං නාම විරාජතීති ॥2॥
බෘහද්වනං තත් ඛලු නංදමුඛ්යා විධාය ගෞෂ්ඨීනමථ ක්ෂණේන ।
ත්වදන්විතත්වජ්ජනනීනිවිෂ්ටගරිෂ්ඨයානානුගතා විචේලුඃ ॥3॥
අනෝමනෝජ්ඤධ්වනිධේනුපාලීඛුරප්රණාදාංතරතෝ වධූභිඃ ।
භවද්විනෝදාලපිතාක්ෂරාණි ප්රපීය නාජ්ඤායත මාර්ගදෛර්ඝ්යම් ॥4॥
නිරීක්ෂ්ය වෘංදාවනමීශ නංදත්ප්රසූනකුංදප්රමුඛද්රුමෞඝම් ।
අමෝදථාඃ ශාද්වලසාංද්රලක්ෂ්ම්යා හරින්මණීකුට්ටිමපුෂ්ටශෝභම් ॥5॥
නවාකනිර්ව්යූඪනිවාසභේදේෂ්වශේෂගෝපේෂු සුඛාසිතේෂු ।
වනශ්රියං ගෝපකිශෝරපාලීවිමිශ්රිතඃ පර්යගලෝකථාස්ත්වම් ॥6॥
අරාලමාර්ගාගතනිර්මලාපාං මරාලකූජාකෘතනර්මලාපාම් ।
නිරංතරස්මේරසරෝජවක්ත්රාං කලිංදකන්යාං සමලෝකයස්ත්වම් ॥7॥
මයූරකේකාශතලෝභනීයං මයූඛමාලාශබලං මණීනාම් ।
විරිංචලෝකස්පෘශමුච්චශෘංගෛර්ගිරිං ච ගෝවර්ධනමෛක්ෂථාස්ත්වම් ॥8॥
සමං තතෝ ගෝපකුමාරකෛස්ත්වං සමංතතෝ යත්ර වනාංතමාගාඃ ।
තතස්තතස්තාං කුටිලාමපශ්යඃ කලිංදජාං රාගවතීමිවෛකාම් ॥9॥
තථාවිධේऽස්මින් විපිනේ පශව්යේ සමුත්සුකෝ වත්සගණප්රචාරේ ।
චරන් සරාමෝऽථ කුමාරකෛස්ත්වං සමීරගේහාධිප පාහි රෝගාත් ॥10॥