අතීත්ය බාල්යං ජගතාං පතේ ත්වමුපේත්ය පෞගංඩවයෝ මනෝජ්ඤම් ।
උපේක්ෂ්ය වත්සාවනමුත්සවේන ප්රාවර්තථා ගෝගණපාලනායාම් ॥1॥
උපක්රමස්යානුගුණෛව සේයං මරුත්පුරාධීශ තව ප්රවෘත්තිඃ ।
ගෝත්රාපරිත්රාණකෘතේऽවතීර්ණස්තදේව දේවාऽऽරභථාස්තදා යත් ॥2॥
කදාපි රාමේණ සමං වනාංතේ වනශ්රියං වීක්ෂ්ය චරන් සුඛේන ।
ශ්රීදාමනාම්නඃ ස්වසඛස්ය වාචා මෝදාදගා ධේනුකකානනං ත්වම් ॥3॥
උත්තාලතාලීනිවහේ ත්වදුක්ත්යා බලේන ධූතේऽථ බලේන දෝර්භ්යාම් ।
මෘදුඃ ඛරශ්චාභ්යපතත්පුරස්තාත් ඵලෝත්කරෝ ධේනුකදානවෝऽපි ॥4॥
සමුද්යතෝ ධෛනුකපාලනේऽහං කථං වධං ධෛනුකමද්ය කුර්වේ ।
ඉතීව මත්වා ධ්රුවමග්රජේන සුරෞඝයෝද්ධාරමජීඝනස්ත්වම් ॥5॥
තදීයභෘත්යානපි ජංබුකත්වේනෝපාගතානග්රජසංයුතස්ත්වම් ।
ජංබූඵලානීව තදා නිරාස්ථස්තාලේෂු ඛේලන් භගවන් නිරාස්ථඃ ॥6॥
විනිඝ්නති ත්වය්යථ ජංබුකෞඝං සනාමකත්වාද්වරුණස්තදානීම් ।
භයාකුලෝ ජංබුකනාමධේයං ශ්රුතිප්රසිද්ධං ව්යධිතේති මන්යේ ॥7॥
තවාවතාරස්ය ඵලං මුරාරේ සංජාතමද්යේති සුරෛර්නුතස්ත්වම් ।
සත්යං ඵලං ජාතමිහේති හාසී බාලෛඃ සමං තාලඵලාන්යභුංක්ථාඃ ॥8॥
මධුද්රවස්රුංති බෘහංති තානි ඵලානි මේදෝභරභෘංති භුක්ත්වා ।
තෘප්තෛශ්ච දෘප්තෛර්භවනං ඵලෞඝං වහද්භිරාගාඃ ඛලු බාලකෛස්ත්වම් ॥9॥
හතෝ හතෝ ධේනුක ඉත්යුපේත්ය ඵලාන්යදද්භිර්මධුරාණි ලෝකෛඃ ।
ජයේති ජීවේති නුතෝ විභෝ ත්වං මරුත්පුරාධීශ්වර පාහි රෝගාත් ॥10॥