ත්වත්සේවෝත්කස්සෞභරිර්නාම පූර්වං
කාලිංද්යංතර්ද්වාදශාබ්දං තපස්යන් ।
මීනව්රාතේ ස්නේහවාන් භෝගලෝලේ
තාර්ක්ෂ්යං සාක්ෂාදෛක්ෂතාග්රේ කදාචිත් ॥1॥
ත්වද්වාහං තං සක්ෂුධං තෘක්ෂසූනුං
මීනං කංචිජ්ජක්ෂතං ලක්ෂයන් සඃ ।
තප්තශ්චිත්තේ ශප්තවානත්ර චේත්ත්වං
ජංතූන් භෝක්තා ජීවිතං චාපි මෝක්තා ॥2॥
තස්මින් කාලේ කාලියඃ ක්ෂ්වේලදර්පාත්
සර්පාරාතේඃ කල්පිතං භාගමශ්නන් ।
තේන ක්රෝධාත්ත්වත්පදාංභෝජභාජා
පක්ෂක්ෂිප්තස්තද්දුරාපං පයෝऽගාත් ॥3॥
ඝෝරේ තස්මින් සූරජානීරවාසේ
තීරේ වෘක්ෂා වික්ෂතාඃ ක්ෂ්වේලවේගාත් ।
පක්ෂිව්රාතාඃ පේතුරභ්රේ පතංතඃ
කාරුණ්යාර්ද්රං ත්වන්මනස්තේන ජාතම් ॥4॥
කාලේ තස්මින්නේකදා සීරපාණිං
මුක්ත්වා යාතේ යාමුනං කානනාංතම් ।
ත්වය්යුද්දාමග්රීෂ්මභීෂ්මෝෂ්මතප්තා
ගෝගෝපාලා ව්යාපිබන් ක්ෂ්වේලතෝයම් ॥5॥
නශ්යජ්ජීවාන් විච්යුතාන් ක්ෂ්මාතලේ තාන්
විශ්වාන් පශ්යන්නච්යුත ත්වං දයාර්ද්රඃ ।
ප්රාප්යෝපාංතං ජීවයාමාසිථ ද්රාක්
පීයූෂාංභෝවර්ෂිභිඃ ශ්රීකටක්ෂෛඃ ॥6॥
කිං කිං ජාතෝ හර්ෂවර්ෂාතිරේකඃ
සර්වාංගේෂ්විත්යුත්ථිතා ගෝපසංඝාඃ ।
දෘෂ්ට්වාऽග්රේ ත්වාං ත්වත්කෘතං තද්විදංත-
ස්ත්වාමාලිංගන් දෘෂ්ටනානාප්රභාවාඃ ॥7॥
ගාවශ්චෛවං ලබ්ධජීවාඃ ක්ෂණේන
ස්ඵීතානංදාස්ත්වාං ච දෘෂ්ට්වා පුරස්තාත් ।
ද්රාගාවව්රුඃ සර්වතෝ හර්ෂබාෂ්පං
ව්යාමුංචංත්යෝ මංදමුද්යන්නිනාදාඃ ॥8॥
රෝමාංචෝऽයං සර්වතෝ නඃ ශරීරේ
භූයස්යංතඃ කාචිදානංදමූර්ඡා ।
ආශ්චර්යෝऽයං ක්ෂ්වේලවේගෝ මුකුංදේ-
ත්යුක්තෝ ගෝපෛර්නංදිතෝ වංදිතෝऽභූඃ ॥9॥
ඒවං භක්තාන් මුක්තජීවානපි ත්වං
මුග්ධාපාංගෛරස්තරෝගාංස්තනෝෂි ।
තාදෘග්භූතස්ඵීතකාරුණ්යභූමා
රෝගාත් පායා වායුගේහාධිවාස ॥10॥