අථ වාරිණි ඝෝරතරං ඵණිනං
ප්රතිවාරයිතුං කෘතධීර්භගවන් ।
ද්රුතමාරිථ තීරගනීපතරුං
විෂමාරුතශෝෂිතපර්ණචයම් ॥1॥
අධිරුහ්ය පදාංබුරුහේණ ච තං
නවපල්ලවතුල්යමනෝජ්ඤරුචා ।
හ්රදවාරිණි දූරතරං න්යපතඃ
පරිඝූර්ණිතඝෝරතරංග්ගණේ ॥2॥
භුවනත්රයභාරභෘතෝ භවතෝ
ගුරුභාරවිකංපිවිජෘංභිජලා ।
පරිමජ්ජයති ස්ම ධනුශ්ශතකං
තටිනී ඣටිති ස්ඵුටඝෝෂවතී ॥3॥
අථ දික්ෂු විදික්ෂු පරික්ෂුභිත-
භ්රමිතෝදරවාරිනිනාදභරෛඃ ।
උදකාදුදගාදුරගාධිපති-
ස්ත්වදුපාංතමශාංතරුෂාऽංධමනාඃ ॥4॥
ඵණශෘංගසහස්රවිනිස්සෘමර-
ජ්වලදග්නිකණෝග්රවිෂාංබුධරම් ।
පුරතඃ ඵණිනං සමලෝකයථා
බහුශෘංගිණමංජනශෛලමිව ॥5॥
ජ්වලදක්ෂි පරික්ෂරදුග්රවිෂ-
ශ්වසනෝෂ්මභරඃ ස මහාභුජගඃ ।
පරිදශ්ය භවංතමනංතබලං
සමවේෂ්ටයදස්ඵුටචේෂ්ටමහෝ ॥6॥
අවිලෝක්ය භවංතමථාකුලිතේ
තටගාමිනි බාලකධේනුගණේ ।
ව්රජගේහතලේऽප්යනිමිත්තශතං
සමුදීක්ෂ්ය ගතා යමුනාං පශුපාඃ ॥7॥
අඛිලේෂු විභෝ භවදීය දශා-
මවලෝක්ය ජිහාසුෂු ජීවභරම් ।
ඵණිබංධනමාශු විමුච්ය ජවා-
දුදගම්යත හාසජුෂා භවතා ॥8॥
අධිරුහ්ය තතඃ ඵණිරාජඵණාන්
නනෘතේ භවතා මෘදුපාදරුචා ।
කලශිංජිතනූපුරමංජුමිල-
ත්කරකංකණසංකුලසංක්වණිතම් ॥9॥
ජහෘෂුඃ පශුපාස්තුතුෂුර්මුනයෝ
වවෘෂුඃ කුසුමානි සුරේංද්රගණාඃ ।
ත්වයි නෘත්යති මාරුතගේහපතේ
පරිපාහි ස මාං ත්වමදාංතගදාත් ॥10॥