ත්වයි විහරණලෝලේ බාලජාලෛඃ ප්රලංබ-
ප්රමථනසවිලංබේ ධේනවඃ ස්වෛරචාරාඃ ।
තෘණකුතුකනිවිෂ්ටා දූරදූරං චරංත්යඃ
කිමපි විපිනමෛෂීකාඛ්යමීෂාංබභූවුඃ ॥1॥
අනධිගතනිදාඝක්රෞර්යවෘංදාවනාංතාත්
බහිරිදමුපයාතාඃ කානනං ධේනවස්තාඃ ।
තව විරහවිෂණ්ණා ඌෂ්මලග්රීෂ්මතාප-
ප්රසරවිසරදංභස්යාකුලාඃ ස්තංභමාපුඃ ॥2॥
තදනු සහ සහායෛර්දූරමන්විෂ්ය ශෞරේ
ගලිතසරණිමුංජාරණ්යසංජාතඛේදම් ।
පශුකුලමභිවීක්ෂ්ය ක්ෂිප්රමානේතුමාරා-
ත්ත්වයි ගතවති හී හී සර්වතෝऽග්නිර්ජජෘංභේ ॥3॥
සකලහරිති දීප්තේ ඝෝරභාංකාරභීමේ
ශිඛිනි විහතමාර්ගා අර්ධදග්ධා ඉවාර්තාඃ ।
අහහ භුවනබංධෝ පාහි පාහීති සර්වේ
ශරණමුපගතාස්ත්වාං තාපහර්තාරමේකම් ॥4॥
අලමලමතිභීත්යා සර්වතෝ මීලයධ්වං
දෘශමිති තව වාචා මීලිතාක්ෂේෂු තේෂු ।
ක්ව නු දවදහනෝऽසෞ කුත්ර මුංජාටවී සා
සපදි වවෘතිරේ තේ හංත භාංඩීරදේශේ ॥5॥
ජය ජය තව මායා කේයමීශේති තේෂාං
නුතිභිරුදිතහාසෝ බද්ධනානාවිලාසඃ ।
පුනරපි විපිනාංතේ ප්රාචරඃ පාටලාදි-
ප්රසවනිකරමාත්රග්රාහ්යඝර්මානුභාවේ ॥6॥
ත්වයි විමුඛමිවෝච්චෛස්තාපභාරං වහංතං
තව භජනවදංතඃ පංකමුච්ඡෝෂයංතම් ।
තව භුජවදුදංචද්භූරිතේජඃප්රවාහං
තපසමයමනෛෂීර්යාමුනේෂු ස්ථලේෂු ॥7॥
තදනු ජලදජාලෛස්ත්වද්වපුස්තුල්යභාභි-
ර්විකසදමලවිද්යුත්පීතවාසෝවිලාසෛඃ ।
සකලභුවනභාජාං හර්ෂදාං වර්ෂවේලාං
ක්ෂිතිධරකුහරේෂු ස්වෛරවාසී ව්යනෛෂීඃ ॥8॥
කුහරතලනිවිෂ්ටං ත්වාං ගරිෂ්ඨං ගිරීංද්රඃ
ශිඛිකුලනවකේකාකාකුභිඃ ස්තෝත්රකාරී ।
ස්ඵුටකුටජකදංබස්තෝමපුෂ්පාංජලිං ච
ප්රවිදධදනුභේජේ දේව ගෝවර්ධනෝऽසෞ ॥9॥
අථ ශරදමුපේතාං තාං භවද්භක්තචේතෝ-
විමලසලිලපූරාං මානයන් කානනේෂු ।
තෘණමමලවනාංතේ චාරු සංචාරයන් ගාඃ
පවනපුරපතේ ත්වං දේහි මේ දේහසෞඛ්යම් ॥10॥