දදෘශිරේ කිල තත්ක්ෂණමක්ෂත-
ස්තනිතජෘංභිතකංපිතදික්තටාඃ ।
සුෂමයා භවදංගතුලාං ගතා
ව්රජපදෝපරි වාරිධරාස්ත්වයා ॥1॥
විපුලකරකමිශ්රෛස්තෝයධාරානිපාතෛ-
ර්දිශිදිශි පශුපානාං මංඩලේ දංඩ්යමානේ ।
කුපිතහරිකෘතාන්නඃ පාහි පාහීති තේෂාං
වචනමජිත ශ්රෘණ්වන් මා බිභීතේත්යභාණීඃ ॥2॥
කුල ඉහ ඛලු ගෝත්රෝ දෛවතං ගෝත්රශත්රෝ-
ර්විහතිමිහ ස රුංධ්යාත් කෝ නු වඃ සංශයෝऽස්මින් ।
ඉති සහසිතවාදී දේව ගෝවර්ද්ධනාද්රිං
ත්වරිතමුදමුමූලෝ මූලතෝ බාලදෝර්භ්යාම් ॥3॥
තදනු ගිරිවරස්ය ප්රෝද්ධෘතස්යාස්ය තාවත්
සිකතිලමෘදුදේශේ දූරතෝ වාරිතාපේ ।
පරිකරපරිමිශ්රාන් ධේනුගෝපානධස්තා-
දුපනිදධදධත්ථා හස්තපද්මේන ශෛලම් ॥4॥
භවති විධෘතශෛලේ බාලිකාභිර්වයස්යෛ-
රපි විහිතවිලාසං කේලිලාපාදිලෝලේ ।
සවිධමිලිතධේනූරේකහස්තේන කංඩූ-
යති සති පශුපාලාස්තෝෂමෛෂංත සර්වේ ॥5॥
අතිමහාන් ගිරිරේෂ තු වාමකේ
කරසරෝරුහි තං ධරතේ චිරම් ।
කිමිදමද්භුතමද්රිබලං න්විති
ත්වදවලෝකිභිරාකථි ගෝපකෛඃ ॥6॥
අහහ ධාර්ෂ්ට්යමමුෂ්ය වටෝර්ගිරිං
ව්යථිතබාහුරසාවවරෝපයේත් ।
ඉති හරිස්ත්වයි බද්ධවිගර්හණෝ
දිවසසප්තකමුග්රමවර්ෂයත් ॥7॥
අචලති ත්වයි දේව පදාත් පදං
ගලිතසර්වජලේ ච ඝනෝත්කරේ ।
අපහෘතේ මරුතා මරුතාං පති-
ස්ත්වදභිශංකිතධීඃ සමුපාද්රවත් ॥8॥
ශමමුපේයුෂි වර්ෂභරේ තදා
පශුපධේනුකුලේ ච විනිර්ගතේ ।
භුවි විභෝ සමුපාහිතභූධරඃ
ප්රමුදිතෛඃ පශුපෛඃ පරිරේභිෂේ ॥9॥
ධරණිමේව පුරා ධෘතවානසි
ක්ෂිතිධරෝද්ධරණේ තව කඃ ශ්රමඃ ।
ඉති නුතස්ත්රිදශෛඃ කමලාපතේ
ගුරුපුරාලය පාලය මාං ගදාත් ॥10॥