ආලෝක්ය ශෛලෝද්ධරණාදිරූපං ප්රභාවමුච්චෛස්තව ගෝපලෝකාඃ ।
විශ්වේශ්වරං ත්වාමභිමත්ය විශ්වේ නංදං භවජ්ජාතකමන්වපෘච්ඡන් ॥1॥
ගර්ගෝදිතෝ නිර්ගදිතෝ නිජාය වර්ගාය තාතේන තව ප්රභාවඃ ।
පූර්වාධිකස්ත්වය්යනුරාග ඒෂාමෛධිෂ්ට තාවත් බහුමානභාරඃ ॥2॥
තතෝऽවමානෝදිතතත්ත්වබෝධඃ සුරාධිරාජඃ සහ දිව්යගව්යා।
උපේත්ය තුෂ්ටාව ස නෂ්ටගර්වඃ ස්පෘෂ්ට්වා පදාබ්ජං මණිමෞලිනා තේ ॥3॥
ස්නේහස්නුතෛස්ත්වාං සුරභිඃ පයෝභිර්ගෝවිංදනාමාංකිතමභ්යෂිංචත් ।
ඓරාවතෝපාහෘතදිව්යගංගාපාථෝභිරිංද්රෝऽපි ච ජාතහර්ෂඃ ॥4॥
ජගත්ත්රයේශේ ත්වයි ගෝකුලේශේ තථාऽභිෂික්තේ සති ගෝපවාටඃ ।
නාකේऽපි වෛකුංඨපදේऽප්යලභ්යාං ශ්රියං ප්රපේදේ භවතඃ ප්රභාවාත් ॥5॥
කදාචිදංතර්යමුනං ප්රභාතේ ස්නායන් පිතා වාරුණපූරුෂේණ ।
නීතස්තමානේතුමගාඃ පුරීං ත්වං තාං වාරුණීං කාරණමර්ත්යරූපඃ ॥6॥
සසංභ්රමං තේන ජලාධිපේන ප්රපූජිතස්ත්වං ප්රතිගෘහ්ය තාතම් ।
උපාගතස්තත්ක්ෂණමාත්මගේහං පිතාऽවදත්තච්චරිතං නිජේභ්යඃ ॥7॥
හරිං විනිශ්චිත්ය භවංතමේතාන් භවත්පදාලෝකනබද්ධතෘෂ්ණාන් ॥
නිරීක්ෂ්ය විෂ්ණෝ පරමං පදං තද්දුරාපමන්යෛස්ත්වමදීදෘශස්තාන් ॥8॥
ස්ඵුරත්පරානංදරසප්රවාහප්රපූර්ණකෛවල්යමහාපයෝධෞ ।
චිරං නිමග්නාඃ ඛලු ගෝපසංඝාස්ත්වයෛව භූමන් පුනරුද්ධෘතාස්තේ ॥9॥
කරබදරවදේවං දේව කුත්රාවතාරේ
නිජපදමනවාප්යං දර්ශිතං භක්තිභාජාම් ।
තදිහ පශුපරූපී ත්වං හි සාක්ෂාත් පරාත්මා
පවනපුරනිවාසින් පාහි මාමාමයේභ්යඃ ॥10॥