කංසෝऽථ නාරදගිරා ව්රජවාසිනං ත්වා-
මාකර්ණ්ය දීර්ණහෘදයඃ ස හි ගාංදිනේයම් ।
ආහූය කාර්මුකමඛච්ඡලතෝ භවංත-
මානේතුමේනමහිනෝදහිනාථශායින් ॥1॥
අක්රූර ඒෂ භවදංඝ්රිපරශ්චිරාය
ත්වද්දර්ශනාක්ෂමමනාඃ ක්ෂිතිපාලභීත්යා ।
තස්යාජ්ඤයෛව පුනරීක්ෂිතුමුද්යතස්ත්වා-
මානංදභාරමතිභූරිතරං බභාර ॥2॥
සෝऽයං රථේන සුකෘතී භවතෝ නිවාසං
ගච්ඡන් මනෝරථගණාංස්ත්වයි ධාර්යමාණාන් ।
ආස්වාදයන් මුහුරපායභයේන දෛවං
සංප්රාර්ථයන් පථි න කිංචිදපි ව්යජානාත් ॥3॥
ද්රක්ෂ්යාමි වේදශතගීතගතිං පුමාංසං
ස්ප්රක්ෂ්යාමි කිංස්විදපි නාම පරිෂ්වජේයම් ।
කිං වක්ෂ්යතේ ස ඛලු මාං ක්වනු වීක්ෂිතඃ ස්යා-
දිත්ථං නිනාය ස භවන්මයමේව මාර්ගම් ॥4॥
භූයඃ ක්රමාදභිවිශන් භවදංඝ්රිපූතං
වෘංදාවනං හරවිරිංචසුරාභිවංද්යම් ।
ආනංදමග්න ඉව ලග්න ඉව ප්රමෝහේ
කිං කිං දශාංතරමවාප න පංකජාක්ෂ ॥5॥
පශ්යන්නවංදත භවද්විහෘතිස්ථලානි
පාංසුෂ්වවේෂ්ටත භවච්චරණාංකිතේෂු ।
කිං බ්රූමහේ බහුජනා හි තදාපි ජාතා
ඒවං තු භක්තිතරලා විරලාඃ පරාත්මන් ॥6॥
සායං ස ගෝපභවනානි භවච්චරිත්ර-
ගීතාමෘතප්රසෘතකර්ණරසායනානි ।
පශ්යන් ප්රමෝදසරිතේව කිලෝහ්යමානෝ
ගච්ඡන් භවද්භවනසන්නිධිමන්වයාසීත් ॥7॥
තාවද්දදර්ශ පශුදෝහවිලෝකලෝලං
භක්තෝත්තමාගතිමිව ප්රතිපාලයංතම් ।
භූමන් භවංතමයමග්රජවංතමංත-
ර්බ්රහ්මානුභූතිරසසිංධුමිවෝද්වමංතම් ॥8॥
සායංතනාප්ලවවිශේෂවිවික්තගාත්රෞ
ද්වෞ පීතනීලරුචිරාංබරලෝභනීයෞ ।
නාතිප්රපංචධෘතභූෂණචාරුවේෂෞ
මංදස්මිතාර්ද්රවදනෞ ස යුවාං දදර්ශ ॥9॥
දූරාද්රථාත්සමවරුහ්ය නමංතමේන-
මුත්ථාප්ය භක්තකුලමෞලිමථෝපගූහන් ।
හර්ෂාන්මිතාක්ෂරගිරා කුශලානුයෝගී
පාණිං ප්රගෘහ්ය සබලෝऽථ ගෘහං නිනේථ ॥10॥
නංදේන සාකමමිතාදරමර්චයිත්වා
තං යාදවං තදුදිතාං නිශමය්ය වාර්තාම් ।
ගෝපේෂු භූපතිනිදේශකථාං නිවේද්ය
නානාකථාභිරිහ තේන නිශාමනෛෂීඃ ॥11॥
චංද්රාගෘහේ කිමුත චංද්රභගාගෘහේ නු
රාධාගෘහේ නු භවනේ කිමු මෛත්රවිංදේ ।
ධූර්තෝ විලංබත ඉති ප්රමදාභිරුච්චෛ-
රාශංකිතෝ නිශි මරුත්පුරනාථ පායාඃ ॥12॥